Yeremiya 6:21 - Tonga Bible 1986

²¹ Chifukwa cho atiti Ambuya; ‘Ehe, ndikaŵikanga paurongo pa ŵanthu yaŵa viguŵisku mwaku vyo ŵakaguŵanga: ŵawiskeu ndi ŵana ŵanthurumi pamoza, muzengezgani ndi bwezi ŵakamaranga.’ ”

Yeremiya 6:21 Referans Kwoze

Yesaya 8:14

Ndipo iyo wakaŵanga nyumba yakupaturika, ndi mwa wachiguwisku, ndi jarawe lakuguŵamo nyumba zose ziŵi viyo zaku Yisraele, chikhwiriki ndi chiŵana ku ŵakuja mu Yerusalemu.

Ezekiele 3:20

Ndipo so, asani munthu murunji watuwako ku urunji wake ndi wachita uheni, ndipo ine ndaŵika chiguŵisku paurongo pake, wakafwanga chifukwa iwe kuti wamchenjezga cha, wakafwanga pa uheni wake, ndipo nchitu zake za urunji zo wachita kuti zikakumbukikanga cha; kweni ndopa zake ndikazifumbanga pa janja lako.

Yeremiya 13:16

Paskani unkhankhu ku Ambuya Chiuta winu, wenga wandaze ndi mdima, marundi ghinu ghenga ghandaguŵe pa mapiri gha mdima, penipo imwe mupenja ukweru iyo wasanduskiyako mdima, watiusanduska mdima uzitu.

1 Petro 2:8

ndi, “Mwa wachiguŵisku, ndi jarawe la livwizu; Pakuti ŵaguŵa penipo, pakutafula pa mazu gho”; kwaku chenicho nacho ŵangutemeke.

ŴaRoma 11:9

Ndipo Davidi watiti, “Gome lawo liŵenge chikwiriki, ndi chiŵana, ndi chiwiska, ndi mbwerezga kwaku wo:

ŴaRoma 9:33

uli ndimo kwalembeke, “Awonani, ndiŵika mu Zioni mwa wachiguŵisku ndi jarawe la chiwiska: ndipo yo ngwakuvwana paku iyo kuti walengeskekenge cha.”

Ezekiele 5:10

Mu chifukwa cho auskeu ŵakarghanga ŵana ŵawo mukati mwinu, ndipo ŵana ŵakarghanga auskeu; ndikaŵikanga cheruzgu paku imwe, ndipo we yose wakujapo mwaku imwe ndikamdikiskiyanga ku mphepo zose.

Yeremiya 21:7

Pavuli atiti Ambuya, ndikaperekanga Zedekiya karonga waku Yuda, ndi ŵateŵeti ŵake, ndi ŵanthu ŵamu msumba uwu wo ŵakapozomokanga ku chideru, lipanga ndichilala, mu janja laku Nebukadanezara karonga wa Babiloni, ndi mu janja la ŵakupindikana ŵawo, mu janja laku wo ŵapenja kuŵabaya. Ŵakaŵakosonga ndi lipanga; kuti wakaŵafwiyanga lisungu, pamwenga kuŵareka, pamwenga kuŵa ndi chitima cha.’

Yeremiya 18:21

Chifukwa cho mupereke ŵana ŵawo ku chilala; muŵapereke ku nthazi ya lipanga, ŵawoli ŵawo ŵaŵe ŵambura ŵana, ŵaŵe vyoko. Ŵanthurumi ŵawo ŵafwe, ndi chideru, ŵanyamata ŵawo ŵabayike ndi lipanga mu nkhondo.

2 Mikoka 36:17

Pa chifukwa ichi Chiuta wanguŵaziya ndi karonga wa ŵaKildiya yo wangubaya ŵanyamata ŵawo ndi lipanga mu nyumba yawo yakupaturika, ndipo kuti yinguŵachitiya lisungu cha chingana mbanyamata pamwenga ŵamwali, khongwi pamwenga yo wenga khongwi lakukota ukongwa: wanguŵapereka wose mu janja lake.

ŴaLevi 26:37

Ŵakaguŵanga uyu mu munyake, nge mbakuthaŵa lipanga, chingana palivi wakuŵandondoloska; ndipo mukawulangavi nthazi zakumiya paurongo pa ŵamawongo ŵinu.

Yeremiya 8:12

Kumbi ŵanguchita soni penipo wanguchita ukazuzi? Awa, kuti ŵanguchita soni ndi keni kamana cha; ŵengavi kuziŵa kuzimbwa. Chifukwa cho ŵakawanga mukati mu ŵakuwa, penipo ndikaŵalanganga ŵakathereskekanga, atiti Ambuya.

Yeremiya 13:14

Ndipo ine ndikaŵabwanyaniskanga uyu ku munyake, ŵauskeu ndi ŵana pamoza, atiti Ambuya. Kuti ndikachitanga chitima pamwenga kuŵareka waka nanga nkhuŵa ndi lisungu nako cha, kuti ndireke kuŵananga.’ ”

Yeremiya 18:23

Kweni, imwe Ambuya, muziŵa viŵembo vyawo vyose kuti ŵandibaye. Mungaŵagowoke cha mautimbanizi ghawo, pamwenga kuzimwa uheni wawo pa maso pinu. Chondi muŵathereske paurongo pinu; muŵarange mu nyengo ya ukari winu.

Yesaya 8:15

Ndipo ŵanandi ŵakaguŵanga penipo, ŵakawanga ndi ŵakaswekanga, ŵakatghikanga ndi kutoreka.”