Yeremiya 44:10 - Tonga Bible 1986

¹⁰ Ŵalivi kujiyuyuwa mpaka ku zuŵa lino, chingana nkhuti ŵawope cha, chingana nkhwenda mu dangu langu ndi malangulu ghangu ghenigho ndinguŵika paurongo pinu ndi paurongo pa auskemwe.

Yeremiya 44:10 Referans Kwoze

Nthanthi 28:14

Wakutumbikika ndi munthu mweniyo watopa Ambuya nyengo zose, kweni mweniyo wangangamiska mtima wake watuwa mu suzgu.

Chivumbuzi 15:4

Njani warekenge kopa imwe, Ambuya, ndi kukankhuska zina linu? Pakuti ndimwe pe mwe ŵakupaturika. Chifukwa mitundu yose yikazanga, ndipo yilambiyenge paurongo pinu; pakuti vyeruzgu vinu vyakurunjika vyawoneka pakweru!”

1 Petro 5:6

Viyo mujiyuyuliye kusi ku janja laukumu laku Chiuta, alinga kuti wamtumphuskeni ku nyengo yakwenere,

Yeremiya 8:12

Kumbi ŵanguchita soni penipo wanguchita ukazuzi? Awa, kuti ŵanguchita soni ndi keni kamana cha; ŵengavi kuziŵa kuzimbwa. Chifukwa cho ŵakawanga mukati mu ŵakuwa, penipo ndikaŵalanganga ŵakathereskekanga, atiti Ambuya.

ŴaRoma 11:20

Mbwenu; zingufyolekako mu uwura-chivwanu chawo, ndipo iwe ume nganganga mu chivwanu chako, ungajitumphuskanga cha, kweni wopanga.

Luka 23:40

Kweni munyake yo wangwamuka, wangumchenya, watinge, “Asi utopa chinganga ndi Chiuta? Pakuti we mu chisusa chenicho pe.

Mateyu 27:54

Kweni kenturione yo, ndi wo ŵapamoza nayo ŵakulindizga Yesu, wachiwona chiyeuyeu ndi vyo vinguŵapo ŵangopa ukongwa, ndipo ŵanguti, “Nadidi mwenuyu ndi Mwana waku Chiuta.”

Malaki 4:2

Kweni imwe mutopa ine mwamuwona dazi la urunji lichituwa ndi uchizgi mu mapapiku ghake. Mwamuruta ndi kuchilipuka nge ndi mathole ghachituwa mu khola.

Ezekiele 9:4

Ndipo Ambuya angunena nayo, “Ruta mu msumba, porota mu Yerusalemu, ulembe chisimikizgu pa visku vya ŵanthu wo ŵaliya ndikufwifwinthiya pa maunyakazi ghose gho ghachitika mukati mwake.”

Yeremiya 36:24

Kweni karonga pamoza ndi ŵateŵeti ŵake ŵeniwo ŵanguvwa mazu yagha ghose, kuti ŵangutenthema cha, ndipo ŵengavi chingana nkhuparuwa vyakuvwara vyawo.

Yeremiya 10:7

Njani yo wangareka kumopani imwe, mwa Karonga ŵa mitundu? Pakuti mwe ŵakwenere kopeka; mukati mu ŵazeru wose ŵa mitundu ya ŵanthu ndi mu maufumu ghawo ghose mulivi wakuyana ndi imwe.

Yesaya 66:2

Ivi vinthu vyose janja langu lavichita, viyo vinthu ivi vyose vyangu, atiti Ambuya. Kweni uyu ndiyo munthu kwaku yo ndikalereskanga, mweniyo ngwakujiyuyuwa ndi wakujisuska mu mzimu, yo watenthema pa mazu ghangu.

Yesaya 57:15

Pakuti viyo watiti wapachanya ndi Mutali yo, mweniyo waja mu umuyaya, yo zina leke ndi Wakupaturika: “Ndija pachanya pa malo ghakupaturika, ndipo so pamoza ndi yo ngwa mtima wakupe ndi wakujiyuyuwa, kusisipuska mzimu wa wakujiyuyuwa, ndi kuyuska so mtima wa wakupe.

Nthanthi 16:6

Pakujithereska ndi kugomekezgeka mphulupulu yilipika, ndi so ndi kopa Ambuya munthu wareka uheni.

Nthanthi 14:16

Munthu wazeru wacheŵa ndipo watuwako ku uheni, kweni wakupusa wataya kujikanizga, ndi watuŵa mukata kuphwere.

Nthanthi 8:13

Kopa Ambuya nkhutinkha uheni. Kunyada ndi kujikuzga ndi nthowa ya uheni ndi kirongoro kwakupuruska nditinkha.

Sumu 51:17

Sembe yakurondeka ndi Chiuta ndi mzimu wakusweka; mtima wakusweka ndi wakupe, A Chiuta, imwe kuti muyeyenge cha.

Sumu 34:18

Ambuya ŵepafupi ku ŵakusweka mtima, ndi kuwombo mizimu yakutekenyeka.

2 Mikoka 34:27

chifukwa mtima wako ngwakoloŵa ndipo wajipepuwa paurongo paku Chiuta unguti wavwa mazu kususka malo yagha ndi ŵanthu ŵake, ndipo sono wa jipepuwa paurongo pangu ndi kuparuwa vyakuvwara vyake ndi kutenje paurongo pangu, ine nane ndakuvwa, atiti Ambuya.

2 Mikoka 33:19

Kuromba kwake naku so, ndi mo Chiuta wanguŵeyereke ndi iyo, ndi maulakwi ghake ghose ndi ubendezi wake, ndi malo mo wanguzenga malo gha pachanya, ndi kuŵika Ashera, ndi vikozgo vya kusema, wenga wandape; ehe, vikulembeka mukati mu Makani gha Ŵamchimi.

2 Mikoka 33:12

Ndipo pakuŵa mu suzgu wanguŵeyere Ambuya Chiuta wake, ndi kujiyuyuwa ukongwa pa maso paku Chiuta wa ambuyake.

2 Mikoka 32:26

Kweni Hezekiya wanguti wajithereska, iyo ndi ŵamu Yerusalemu kandundu kaku chiuta kangureka mu mazuŵa ghose ghaku Hezekiya.

2 ŴaKaronga 22:19

chifukwa mtima wako wenga wakuzomera, ungujiyuyuwa paurongo pa Ambuya, unguti wavwa mo ndingukambiya kumikana ndi malo yagha, ndi kumikana ndi ŵakujamo mwaku gho, kuti ŵakaŵanga mapopa ndi thembu ndipo iwe unguparuwa vivwaro vyako ndipo unguliya paurongo pangu, Ine nane ndakuvwa, atiti Ambuya.

1 ŴaKaronga 21:29

“Kumbi wawona mo wajiyuyuliya Ahabu paurongo pangu? Chifukwa chakuti wajiyuyuwa, kuti ndikatolenga suzgu yo mu mazuŵa ghake cha, kweni mu mazuŵa gha ŵana ŵake ndikatolenga suzgu yo pa nyumba yake.”

Chituwa 10:3

Viyo Mosese ndi Aroni ŵangwachisere kwaku Farao ndi ŵanguti kwaku iyo, “Viyo atiti Ambuya, Chiuta wa ŵaHebere, ‘Mpaka zuŵanji ukakananga kujiyuyuwa paurongo pangu? Ŵazomerezge ŵarutenge ŵanthu ŵangu, alinga kuti ŵakanditataliyenge.

Chituwa 9:30

Kweni ndiziŵa imwe ndi ŵaŵanda ŵinu kuti mutopa Ambuya Chiuta winu cha.”

Chituwa 9:17

Imwe mweche kujikuzga pa ŵanthu ŵangu, ndipo mukana kuŵazomerezga kuruta.

Sumu 78:10

Kuti ŵangusunga phanganu lawo ndi Chiuta cha; ŵangukana kuvwiya langulu lake.

Yeremiya 6:15

Kumbi ŵanguchita soni pakuchita unyakazi? Awa, kuti ŵanguchita soni nanga mkhamana cha; ŵengavi kuziŵa kuzimbwa. Chifukwa cho ŵakawiyanga pamoza ndi wo ŵatauwa; pa nyengo yo ndikaŵalanganga, ŵakathereskekanga,” atiti Ambuya.

Yeremiya 26:4

Iwe ukakambe kwaku wo, ‘Viyo atiti Ambuya, Asani mureka kutegherezga kwangu, kwenda mu dangu langu lenilo ndingukupaskani,

Yeremiya 32:23

ndipo ŵangusere ndi kuchihara. Kweni kuti ŵanguvwiya mazu ghinu cha chingana nkhwenda mudangu linu, ŵangukana kuchita vyo munguŵalanguliya kuchita. Chifukwa cho imwe mwaŵafikiskiya viheni ivi vyose.

Yeremiya 44:23

Chifukwa mungocha vyachema, ndi mungulakwiya Ambuya ndi kuti munguvwiya cha mazu gha Ambuya pamwenga kwenda mu dangu lawo ndi mu malangulu ghawo ndi virunguchizgu vyawo, reka chiheni ichi chakuwiyani, uli ndimo kuliri msana wale.”

Yesaya 42:24

Njani wangumupereka Yakobe ku wakuparghang'a, ndi Yisraele ku ŵakupoka? Kuti ŵenga Ambuya cha ŵeniwo ifwe talakwiya, mu nthowa zaku mweniyo kuti ŵangukhumba kwendamo cha, ndi dangu laku mweniyo kuti ŵangukhumba kuvwiya cha?

Yeremiya 5:3

Ambuya mwe, asi maso ghinu ghapenja uneneska? Imwe munguŵapuma, kweni kuti ŵanguvwa kuŵaŵa cha; imwe munguŵamara, kweni kuti ŵangukhumba kususkikacha. Ŵalimbiska visku vyawo kwakuruska jarawi ŵakana kung'anamuka mtima.