Yeremiya 43:6 - Tonga Bible 1986

⁶ ŵanthurumi, ŵanthukazi, ŵana, ŵana ŵanthukazi ŵa ŵakaronga, ndi munthu yose mweniyo Nebuzaradani nduna ya ŵalonda ŵangusiya ndi Gedaliya mwana waku Ahikamu, mwana waku Shafani; ndi so Yeremiya mchimi ndi Baruki mwana waku Neriya.

Yeremiya 43:6 Referans Kwoze

Yeremiya 39:10

Nebuzaradani, nduna ya ŵalonda, wangusiyamu mu charu chaku Yuda, ŵanthu ŵanyake ŵakusauka ŵeniwo ŵengavi kuŵa ndi kanthu, ndipo wanguŵapaska minda ya mphereska ndi minda pa nyengo yeniyo pe.

Yeremiya 40:7

Nduna zose za maŵanja mu charu chapakweru ndi ŵanthu, ŵanguvwa kuti karonga wa Babiloni wakumika Gedaliya mwana waku Ahikamu kuŵa mumirizi mu charu chiya. Ndipo ŵanguvwa kuti wakupereka kwaku iyo ŵanthurumi, ŵanthukazi, ndi ŵana, ŵa ŵakusauka ŵeniwo ŵengavi kutoreke ku umkoli ku Babiloni;

Chitenje 3:1

Ine nde munthu yo wawona suzgu pasi pa ndodo yakukara kwake;

Yeremiya 41:10

Sono Ishimaele wanguŵachita uŵanda ŵanthu wose ŵakujapo wo ŵenga mu Mizipa, ŵana ŵanthukazi ŵakaronga ndi ŵanthu wose wo ŵangujapo mu Mizipa, wo Nebuzaradani nduna ya ŵalonda ŵa ŵakaida wangupereka kwaku Gedaliya mwana waku Ahikamu. Ishimaele mwana waku Netaniya wanguŵayole ku umkoli ndipo wangusoka wangwambukiya ku Amoni.

Yeremiya 52:10

Karonga wa Babiloni wangubaya ŵana ŵaku Zedekiya pa maso pake ndi ŵaraŵara wose ŵaku Yuda pa Ribla.

Yohane 21:18

Nadidi ndikuneneske, Penipo wenga wampupuka, wajichinyiriyanga wija, ndipo wendayendanga ko wakhumbanga; kweni utakuti wakota, ukatambasuwanga manja ghako, ndipo munyake wakaghanaghananga, ndipo wamkukutole kweniko iwe ulive kukhumba.”

Yeremiya 38:22

Ehe, ŵanthukazi wose wo ŵakusiyika mu nyumba ya karonga waku Yuda ŵarongozgekiyenge ku ŵaraŵara ŵa karonga wa Babiloni ndipo ŵakambanga kuti, ‘Mabwezi ghinu ghamagomekezgeka ghamupusikani ndipo ghamuthereskani; sono po marundi ghinu ghaphatiya mu ulambwe, ŵatuwako kwinu.’

Yeremiya 43:3

Kweni ndi Baruki mwana waku Neriya ndiyu wachita kumikana ndi ifwe, kutipereka ifwe mu janja la ŵaKaldiya, kuti ŵatibaye pamwenga kutiyole ku umkoli ku Babiloni.”

Yeremiya 45:1

Mazu gho Yeremiya mchimi wangurongoro kwaku Baruki mwana waku Neriya, penipo walembanga mazu yagha mu buku wachimunene Yeremiya, mu chirimika cha chinayi chaku Yehoyakimu mwana waku Josiya karonga waku Yuda:

Yeremiya 40:11

Kwakukozgana so, penipo ŵaYuda wo ŵenga mu Moabu ndi mukati mu Amoni ndi mu ŵaEdomo ndi mu vyaru vinyake ŵanguvwa kuti karonga wa Babiloni wakusiyamo ŵanyake mu Yuda ndi kuti wakumika Gedaliya mwana waku Ahikamu, mwana waku Shafani kuŵa mumirizi paku iwo,