Yeremiya 43:5 - Tonga Bible 1986

⁵ Kweni Yohanani mwana waku Kareya ndi ŵakulanguliya wose ŵa maŵanja gha nkhondo ŵanguto wose waku japo ŵaku Yuda, wo ŵanguwe kuzachija mu charu chaku Yuda, kutuwa ku mitundu yose kweniko ŵangudikiskikiya,

Yeremiya 43:5 Referans Kwoze

1 Samuele 26:19

Mu chifukwa ichi vwani mbuyangu karonga ku mazu gha mteŵeti winu. Asani mba Mbuya wo amuyuskani mtima kumikana ndi ine, iko aronde chisopo; kweni asani mbanthu, ŵaŵe ŵakutembeka pa maso pa Ambuya, chifukwa zuŵa linu ŵandidikiskiya kutali mwakuti ndireke kuŵa ndi chigaŵa mu ufumu wa Ambuya, ndikuti, ‘Ruta, ukateŵete ŵachiuta ŵanyake.’

2 ŴaKaronga 25:22

Ndipo paku wo ŵangusiyika mu charu chaku Yuda, wo wanguŵasiya Nebukadanezara karonga wa Babiloni wangumikapo Gedaliya, mwana waku Ahikamu, mwana waku Shafani kuŵa mweruzgi mura.

Yeremiya 40:10

Ine ndikajanga pa Mizipa, kumumiyani paurongo pa ŵaKaldiya wo ŵakazanga kwaku ifwe; kweni imwe unjikani vinyo, ndi vipasi vya chipwepwe ndi mafuta, ndipo muvilonge mu viyaŵi vinu, ndipo muje mu misumba yinu yeniyo mwato.”

Yeremiya 41:10

Sono Ishimaele wanguŵachita uŵanda ŵanthu wose ŵakujapo wo ŵenga mu Mizipa, ŵana ŵanthukazi ŵakaronga ndi ŵanthu wose wo ŵangujapo mu Mizipa, wo Nebuzaradani nduna ya ŵalonda ŵa ŵakaida wangupereka kwaku Gedaliya mwana waku Ahikamu. Ishimaele mwana waku Netaniya wanguŵayole ku umkoli ndipo wangusoka wangwambukiya ku Amoni.

Yeremiya 41:17

Ndipo wanguruta ndi ŵanguja pa Geruti Kimihamu pafupi ndi Betelehemu, pakukhumba kuya ku Egipiti,