ŴaLevi 16:29 - Tonga Bible 1986

²⁹ “Likaŵanga langulu muyaya mwaku imwe kuti mu mwezi wa chinkhonde ndi chiŵi pa zuŵa la chumi la mwenzi wo, mukajisunganga, kuti mutatenge nchitu cha, manyi ndi mwenicharu pamwenga mlendo wakutandara mukati mwinu,

ŴaLevi 16:29 Referans Kwoze

Yesaya 58:3

‘Chifukwa chine tafunga, ndipo iwe kuti utichiwona cha? Chifukwa chine tajorovya ndipo iwe kuti uziŵa ichi cha?’ Ehe, mu zuŵa lakufunga kwinu mupenja vyakumukondwereskani vyakumwija, ndipo muyuzga ŵa nchitu ŵinu wose.

Maŵerengedu 29:7

“Pa zuŵa la chumi la mwezi uwu wa chinkhonde ndi chiŵi, mukaŵanga ndi unganu wakupaturika, mujiyuyuwe; mungachitanga nchitu cha,

Danyele 10:12

Ndipo wanguti, “Ungopanga, Danyele, chifukwa kutuwa zuŵa lakudanga lo ungunweke mtima wako kuziŵa, ndi ungujiyuyuliya paurongo paku Chiuta wako, mazu ghako ghavwika, ndipo ndaza chifukwa cha mazu ghako.

Yesaya 58:5

Kumbi kufunga ko ndisankha ine nkhwa viyo, zuŵa lakujorovye munthu? Kumbi nkhukotama waka mutu pasi mwa kuthaŵiriya, ndi kutandika chigudulu ndi choto kusi kwake? Kumbi ichi ndichu mungadana kuti nkhufunga, ndi zuŵa lamalondeka ku Ambuya?

Sumu 35:13

Kweni ine, po iwo ŵangutama, ndinguvwara chigudulu, ndingujisuzga mzimu pa kufunga kurgha; ndinguromba pakusindamiya mutu wangu pa chifuŵa.

ŴaLevi 23:36

Mu mazuŵa ghankhonde ndi ghaŵi mukaperekanga sembe zapa moto ku Ambuya; pa zuwa la chinkhonde ndi chitatu muchitenge ungano wakupaturika ndi kupereka sembe yapa moto ku Ambuya; mbungano wakusopa; kuti mu kachitanga nchitu cha.

ŴaLevi 23:21

Ndipo zuŵa lenilo mukamemezanga ungano wakupaturika; kuti mukachitanga nchitu yanthazi cha. Ili ndilangulu muyaya mu malo ghinu ghakujamo mu migonezi yinu yose.

Chituwa 20:10

Kweni zuŵa la chinkhonde ndi chiŵi ndi sabata ku Ambuya Chiuta wako; mwaku lo kuti uchitiyengemo mlimu we wose cha; iwe pamwenga mwana wako munthurumi, pamwenga mwana wako munthukazi, pamwenga wanchitu wako munthurumi, pamwenga wachitu wako munthukazi, pamwenga ng'ombe yako, pamwenga mlendo wakuja ndi iwe;

ŴaHebere 4:10

Chifukwa yo wasere mu chipumulu chake, iyo nayo wapumuliya ku nchitu zake, uli ndimo Chiuta wangupumuliya ku nchitu zake.

1 ŴaKorinte 11:31

Kweni asani tajeruzganga taŵeni mu uneneska, mphanyi kuti tatinge teruzgikenge cha.

Danyele 10:3

Ndengavi kurgha vyakunowa, chingana ndi nyama ndi vinyo vyengavi kusere mu mlomo wangu, ndengavi chingana nkhujitukutizga mafuta kwa ŵasabata ŵatatu ŵamphumphu.

Yesaya 58:13

“Asani mukanizga rundi linu kusabata, kutuwako kukuchita vyakumukondweskani mu zuŵa langu lakupaturika, kudana sabata zuŵa lakukondweska ndi zuŵa lakupaturika la Ambuya kuŵa lakutumbikika; asani mutilitumbika, ndi kureka kwenda mu nthowa zapa mtima winu, pamwenga kupenja vya pa mtima winu vyakumkondweskani, pamwenga kurongoro vyaukata;

Sumu 69:10

Pondingujiyuyuwa ndi kufunga, chingunditore kusunjizgika ku ŵanthu.

Ezra 3:1

Unguti wafika mwezi wa chinkhonde ndi chiŵi ŵaYisraele ŵenga mu mizi yawo, ndipo wose ŵanguwungana pamoza ku Yerusalemu.

1 ŴaKaronga 8:2

Ndipo wose ŵaYisraele ŵamguwungana ku karonga Solomoni pa dghera mu mwezi wa Etanimu, wo ndi mwezi wa chinkhonde ndi chiŵi.

ŴaLevi 23:3

Mazuŵa ghankhonde ndi limoza ghakuchitiya nchitu: kweni pa zuŵa la chinkhonde ndi chiŵi ndi sabata la chipumulu chakupaturika, kuwungana pamoza kusopa; kuti mukachitanga nchitu cha; ndi sabata ku Ambuya mu malo ghinu ghose ghakujamo.

Chituwa 30:10

Aroni wakapepeskanga pa masengwe ghake kamoza pa chirimika, ndi ndopa za mpasku wa uheni wa mphepeska wakapepeskiyanga wo kamoza mu chirimika mu migonezi yinu; nchakupaturika chakuruska ku Ambuya.”

Chituwa 12:16

Pa zuŵa lakudanga mukaŵanga ndi ungano wakupaturika, ndi pa zuŵa la chinkhonde ndi chiŵi ungano wakupaturika; palivi mlimu wo ukachitikanga pa mazuŵa gho; kweni chenicho we yose watenere kurgha, chenicho pe mungaziŵa kuchirongoso imwe.

Machitidu gha Ŵakutumika 27:9

Ndipo yati yakapo nyengo yikuru, ndipo pakuŵa sono laurwani lwendo lapa nyanja (chifukwa nyengo ya chifunga nayo ndipo yarutapo kali), Paulo wanguŵachenjezga, ndi kuŵakambiya,

Chituwa 31:14

Mukasunganga sabata, chifukwa ndakulanguliyani kuti ndakupaturika, we yose wakulikazuzga wakabayikanga; we yose wakuchita mlimu mwaku lo, wakadumulikangako ku ŵanthu ŵake.

Chituwa 31:15

Milimu yikachitikanga mu mazuŵa ghankhonde ndi limoza, kweni zuŵa la chinkhonde ndi chiŵi ndi sabata la chipumulo pe, lakupaturika ku Ambuya; we yose wakuchita mlimu we wose pa zuŵa la sabata wakabayikanga.

ŴaLevi 3:17

Ili likaŵanga dangu la muyaya mu migonezi yinu yose, mu malo ghinu ghose ghakujamo, lakuti mureke kurgha mafuta chingana ndi ndopa.”

1 Samuele 7:6

Viyo ŵanguwunjikana pa Mizpa, ndipo ŵangunegha maji ŵangughadira paurongo pa Ambuya, ŵangufunga zuŵa liya, ndipo penipa ŵanguti, “Tanangiya Ambuya.” Ndipo Samuele wangweruzga ŵaYisraele pa Mizpa.

Ezra 8:21

Penipo ndingumemeza kufunga kurgha, kuwa ku msinji Ahava, kuti tijiyuyuwe paku Chiuta widu, kupenja nthowa yakurunjika kwaku Iyo paku ifwe ndi ŵana ŵidu, ndi vyuma vidu vyose.

ŴaLevi 25:9

Sono mukambanga mbata yakuvwika kosekose, pa zuŵa la chumi la mwezi wa chinkhonde ndi chiŵi. Mukambanga mbata kosekose mu charu chose pa zuŵa lakupepeska.