Wakutaula 8:16 - Tonga Bible 1986

¹⁶ Po ndinguti ndapereka mtima wangu kuziŵa vinjeru, ndi kuwona nchitu zo zichitika panu pasi, chifukwa chine kuti chingana ndi msana pamwenga usiku maso gha munthu kuti ghawona tulo cha;

Wakutaula 8:16 Referans Kwoze

Wakutaula 2:23

Pakuti mazuŵa ghake ghose ghazaza ndi urwirwi, ndipo nchitu yake ndi vitima; nanga mbusiku mtima wake kuti upumuwa cha. Ichi nachu so nchawaka.

Wakutaula 1:13

Ndipo ndingupereka mtima wangu kupenja ndi kusanda mwa zeru vyose vyo vichitika pasi pa mtambo; ndi nchitu yambura kukondweska yo Chiuta wapereka ku ŵana ŵa ŵanthu kuti ŵasuzgike nayo.

Sumu 127:2

Nkhwaŵaka kuyuka ndi mlenji ndi kuswera pakugona, kutakataka ukongwa chifukwa cha kurgha; chifukwa Ambuya apaska chipumulu kwaku ŵeniwo atanja.

Wakutaula 8:9

Chose ichi ndinguchisanda po mtima wangu wapenjanga mwaku vyose vyo vichitika panu pasi, penipo munthu wapweteka munthu munyake pakumuwusa.

Wakutaula 8:7

Chifukwa kuti waziŵa cha cho chikaŵangako, pakuti ndiyani yo wangaziŵa kumunene mo chikaŵiyanga?

Wakutaula 7:25

Ndingung'anamuka mtima wangu kuziŵa ndi kusanda ndi kupenja zeru kuti ndisaniye unandi wa vinthu ndi kuziŵa uheni wa ŵazereza ndi kupusa ko nkhufuntha.

Wakutaula 5:12

Twakunowa nthulo twa wakutakataka, kaya waturgha vimana pamwenga vinandi; kweni kuguta kwa musambasi kuti kukamugoneskanga tulo cha.

Wakutaula 4:8

munthu yo walivi nanga njumoza, kaya mwana munthurumi pamwenga mbali, kweni uli kulivi umari ku suzgu yake yose, ndipo maso ghake kuti ghaguta ndi usambasi cha, viyo kuti watijifumba cha kuti, “Kumbi ine ndisuzgikiya yani pakujikanizga ku malikondwa?” Ichi nacho so nchawaka ndipo ndi nchitu yambura kukondweska.

Chiyambo 31:40

Viyo ndimo, ndinguŵiya; chifundizi chingundipweteka ndi msana, kuzizira kungundipweteka ndi usiku, ndipo tulo twangu tungukamuka mu maso ghangu.

Wakutaula 1:14

Ndawona chinthu chose cho chachitika panu pasi, ndipo ehe, chose nchawaka ndi suzgu ya mtima.

Wakutaula 1:17

Ndipo ndingupereka mtima kuziŵa vinjeru, ndi kuziŵa kufuntha ndi uzereza. Ine ndikupanikizga kuti ichi nachu so ndi suzgu ya mtima.