Sumu 79:3 - Tonga Bible 1986

³ Ŵakudiska ndopa za ŵanthu ŵinu nge ndi maji; ndopa zikudika nge ndi maji kuzunguliya Yerusalemu yose, ndipo pengavi nanga njumoza wakuŵaŵika.

Sumu 79:3 Referans Kwoze

Yeremiya 16:4

Ŵakafwanga ndi zinthenda za kubaya. Kuti ŵakaŵatenjenga cha nanga nkhu ŵaŵika nako cha; ŵakaŵanga nge ndi vundira pa charu. Ŵakamaranga ku lipanga, ndi kuchilala, ndipo vitende vyawo vikaŵanga kurgha kwa viyuni vya mude ndi vikoko vya charu chapasi.

Yeremiya 14:16

Ndipo ŵanthu, kwaku ŵeniwo ŵachimiya, ŵakapong'ekanga kubwalo mu miseu ya Yerusalemu, ŵakubayika ndi chilala ndi lipanga, pakaŵangavi ndi wakuŵaŵika, iwo, ŵawoli ŵawo, ŵana ŵawo ŵanthurumi ndi ŵana ŵawo ŵanthukazi. Pakuti ndikadiranga utimbanizi wawo paku iwo ŵeneko.

Chivumbuzi 11:9

Ndipo ŵanthu ŵamu makhamu ndi mafuku ndi marongororedu ndi mitundu ŵamlereska vitanda vyawo mazuŵa ghatatu ndi nusu, ndipo kuti ŵamzomera cha kuti vitanda vyawo viŵikike mu muunda.

Chivumbuzi 18:24

Ndipo mwaku iyo ndimuzingusanirika ndopa za ŵamchimi ndi ŵakupaturika, inya ndi zaku wose wo ŵangubayika pa charu chapasi.”

Chivumbuzi 17:6

Ndipo ndingumuwona munthukazi yo wakuloŵe ndopa za ŵakupaturika ndi ndopa za ŵakaboni ŵaku Yesu. Ndipo pakumuwona ndingurwita ndi chirwita chikuru.

Chivumbuzi 16:6

Chifukwa ŵanthu ŵangudiska ndopa za ŵakupaturika ndi ŵamchimi, ndipo mwapaska iwo ndopa, kuti ŵamwenge. Mbakwenere kuzimwa!”

ŴaRoma 8:36

Uli ndimo kwalembeke, “Pa chifukwa chaku imwe tibayika msana wose; tapimika nge ndi mberere zakwachibayika.”

Mateyu 23:35

viyo kuti ziziyenge paku imwe ndopa zose zirunji zakudikiya pa charu, kutuwa ku ndopa zo zaku Abelu murunji yo mpaka ku ndopa zaku Zekariya mwana waku Barakiya, yo mungukosore pakati pa kasopi ndi jochero.

Yeremiya 34:20

ndikaŵaperekanga mu janja la ŵakupindikana ŵawo ndi mu janja laku ŵeniwo ŵapenja kuŵabaya. Viŵanda vyawo virghikenge ndi viyuni vya mude ndi vinyama vya charu chapasi.

Yeremiya 25:33

“Ndipo wo mbakubayika ndi Ambuya mu zuŵa lo ŵakawonekanga kutuwa ku chigoti chimoza cha charu chapasi kwachifika ku chigoti chinyake. Ŵanthu kuti ŵakaŵatenjenga, nanga nkhuŵaunjika, pamwenga kuŵaŵika cha; ŵakaŵanga vundira pa chisku cha charu chapasi.

Yeremiya 15:3

“Ndikaŵamikiyanga mitundu yinayi yaŵakuphwanya, atiti Ambuya: lipanga kwachibaya, ŵagaru kuparuwa, viyuni vya mude ndi vikoko vya pacharu chapasi kuparuwa ndi kuparang'a.

Sumu 141:7

Nge ndi nkhuni yo yafyoka ndi kugaŵikana tumana-tumana, viyo ndimo viwanga vyawo vikambininikiyanga pa mlomo wa muunda.

Sumu 79:10

Yitifumbiyengenji mitundu, kuti, “Wepani Chiuta winu?” Mphanyi tawona kuti mwayisuzga mitundu, chifukwa cha kudika kwa ndopa za ŵateŵeti ŵinu!

Zefaniya 1:17

Ndiŵaziyenge ŵanthu ndi suzgu, mwakuti ŵendenge nge mbachiburumutiya, chifukwa ŵanangiya Ambuya; ndopa zawo zipungulikenge nge ndi fuvu, ndi munofu wawo nge ndi mtawi.