Danyele 11:35 - Tonga Bible 1986

³⁵ Ndipo ŵanyake ŵaku wo ŵazeru ŵakawanga, mwakuti ŵapepeteke ndi ŵaphotoleke, ndi ŵatuŵiskike kufika ku nyengo yaku umari, chifukwa yeche ŵaka nyengo yakutemeka.

Danyele 11:35 Referans Kwoze

Zekariya 13:9

Ndipo ndiŵikenge chigaŵa chachitatu ichi mu moto, ndi kuchisongono mo munthu wasongonore siliva, ndi kuchesa mo golide liteseke. Ŵadanange zina langu, ndipo ndiŵamukenge. Ndinenenge kuti, ‘Mbanthu ŵangu’; ndipo ŵanenenge kuti, ‘Ambuya ndi Chiuta widu.’ ”

Chivumbuzi 7:14

Ndingunena nayo, “Fumu, muziŵa ndimwe.” Ndipo wangunena nane, “Yaŵa mbeniwo ŵatuwa mu suzgu yikuru yo, ndipo ŵasuka makhanju ghawo ndi ŵaghatuŵiska mu ndopa za Mwana-mberere yo.

Chivumbuzi 2:10

Ungopanga cha vyo ukomwenge. Awonani, diabolo yo wakhumba kupong'a ŵanyake ŵa mwaku imwe mu ulinda, alinga kuti mweseke; ndipo mukasuzgikanga mazuŵa chumi. Uŵe wamagomekezgeka mpaka nyifwa, ndipo nkhakupaskanga ndumbu ya umoyo.

Nthanthi 17:3

Mumphika wakusungapo ngwa siliva ndipo ng'anjo nja golide, ndipo Ambuya ŵatesa mitima.

Yakobe 1:2

Mwa ŵabali ŵangu, muchipime chimwemwe pe, penipo pose muŵiyamo mu mesedu ghamtundumtundu,

Danyele 11:40

“Pa vyengo ya umari, karonga waku malaŵi warwenge nayo, kweni karonga waku nkhonde wamurotokiyenge nge ndi kavuruvuru, ndi magareta, ndi ŵakukwera ŵakavalo, ndi ngaraŵa zinandi; ndipo ŵazamsere mu vyaru ndi kuchapariya, ndi kuporotamo.

Danyele 8:10

Lingukuwa ukongwa kufika ku liŵanja la kuchanya ndi lingupong'a pasi mpingu wa nyenyezi zinyake ndi linguzidyakadyaka.

Marangu 8:16

Mweniyo wangukukuhiŵani mbozwa ndi mana ghenigho auskemwe ŵengavi kughaziŵa, mwakuti wamuchepeskeni ndi wamweseni, kumuchitiyani umampha pa umari.

Chivumbuzi 17:17

Chifukwa Chiuta wakuŵikiya limu mu mitima yawo kuchita khumbo lake, ndi kuchita khumbo limoza, kupaska ufumu wawo ku chikoku, mpaka po mazu ghaku Chiuta ghafiskika.

Chivumbuzi 14:15

Ndipo mungelo munyake wangutuliya mu kasopi ndi kubongo ndi mazu ghakuru kwaku yo wanguja pa mtambo wo, “Mutume chisenga chinu, muvunenge: chifukwa ora laza lakuvuniya, pakuti vuna ya charu yacha.”

Yohane 20:25

Viyo ŵasambizi ŵanyake wangumnene, “Taŵawona Ambuya!” Kweni iyo wanguŵanene, “Kwambura kuti ndawona mu manja ghake mabamba gha mizumali yo, ndi kuweskamo munwi wangu mo mizumali yingukhomeka, ndi kuŵika janja langu mu liŵaghara lake, kuti nkhavwananga cha.”

Yohane 15:2

Mphanda yose mwaku ine yambura kupasa, atiyipantha: ndipo yose yakupasa atiyitenguliya, mwakuti yipase vinandi.

Mateyu 26:56

Kweni chose ichi chaŵapo, alinga kuti makani gha ŵamchimi ghafiskike.” Sono wasambizi wose, ŵangumusiya, ŵanguthaŵa.

Mateyu 16:17

Ndipo Yesu wanguti, “Wakutumbikika ndiwe, Simoni mwana waku Yona, pakuti vinjeru vya munthu kuti vingukuvumbuliya ichi cha kweni Ada wakuchanya.

Danyele 12:4

Kweni iwe Danyele usunge mazu yagha ndi uzighiriye buku mpaka nyengo ya umari. Wanandi ŵachimbiriyenge uku ndi uku, ndipo vinjeru vyazamkuwa.”

Danyele 11:33

Ndipo ŵanthu wo mbazeru mukati mwaku wo ŵasambizgenge ŵanandi, chingana ŵakawanga ndi lipanga ndi mlipu wo moto, umkoli, ndi uskowi mazuŵa ghanandi.

Danyele 11:29

“Pa nyengo yakutemeka wamuwe, ndi kuza so ku malaŵi kweni kuti kuŵenge nge mphanyengo yakudanga cha pamwenga yakumariya.

Danyele 11:27

Sono ŵakaronga yaŵa ŵaŵi mitima yawo yiganukiyenge pakuchita uheni, ŵakambenge utesi pa gome limoza, kweni ŵanduwenge kanthu cha; chifukwa umari wake uŵenge pa nyengo yakutemeka.

Danyele 9:27

Ndipo wakapangananga phanganu lakukho ndi ŵanandi mu sabata yumoza; ndi pakatikati pa sabata ŵalekeskekenge sembe yakubaya ndi sembe ya ufwa; pa phaphiku la vyaukazuzi, pakazanga yumoza yo wapasuwa mpaka umari wakulangulika upungulikiya pa wakupasuwa.”

Danyele 8:19

Wanguti, “Ehe, ndikuziŵiskenge vyo viŵengeko kuumari wa ukari; chifukwa umari ukaŵangapo pa nyengo yakutemeka.

Danyele 8:17

Viyo wanguza kufupi ko ndinguma; ndipo wanguti waza, ndingutenthema ndi ndinguwa kavunama. Kweni wanguti kwaku ine, “Ziŵa, wamwana wa munthu, kuti chiwona chikamba ndi nyengo ya umari.”

2 Mikoka 32:31

Hezekiya wangusakata mu nchitu zake zose. Viyo ndi mathenga gha Wakaronga ŵaku Babiloni gho ghangutumika kwake kufumba chisimikizgu chiya chinguchitika pa charu, Chiuta wangumureka yija kuti wamwese, kuti waziŵe vyose vyamu mtima wake.

Machitidu gha Ŵakutumika 13:13

Kweni ŵapamoza ndi paulo, ŵati ŵasoro pa Pafo, ŵanguza ku Perga waku Pamfulia: kweni Yohane wangupatukako kwaku wo, ndipo wanguwere ku Yerusalemu.

Habakuku 2:3

Chifukwa chiwona cheche kulindizga nyengo yake; yithaŵiriya ku umari yikapusikanga cha. Asani yingazuwulika, yilindizge; yizenge nadi, kuti yizuwulikenge cha.

Yesaya 27:9

Chifukwa cho, paku ichi kulakwa kwaku Yakobe kukapepeskekiyanga, ndipo ichi chikaŵanga chipasi chakufikapo cha kutuzgapo uheni wake: wachichita mya yose ya viguŵa vya sembe nge ndi mya yituŵa yakupereka tumana-tumana, palivi kuti Asherimi pamwenga viguŵa vya vyachema vyo vikajaririyanga kuma.

Danyele 12:3

Wo mbavinjeru ŵamuŵara nge nkhung'anima kwa mlengalenga; ndi wo ŵawezge ŵanandi ku urunji, nge ndi nyenyezi muyaya ndi muyaya.