Chituwa 14:4 - Tonga Bible 1986

⁴ Ndipo ndikanonopaskanga mtima waku Farao ndipo wakaŵandondoloskanga, ndipo ine ndirondenge unkhankhu paku Farao ndi liŵanja lake lose; ndipo ŵaEgipiti ŵakaziŵanga kuti Ndine Ambuya.” Ndipo ŵanguchitade viyo.

Chituwa 14:4 Referans Kwoze

ŴaRoma 9:17

Chifukwa lembo lo lititi kwaku Farao, “Kwaku chenichi ndicho ndingukuyuskiya, chakuti ndirongolenge mwako nthazi yangu, ndipo chakuti zina langu liwandiyenge mu charu chose chapasi.”

Chituwa 7:5

Ndipo ŵaEgipiti ŵakaziŵanga kuti ndine Ambuya, ndichirongo nthazi zangu pa Egipiti ndi kutuzga ŵanthu ŵangu ŵaYisraele mukati mwawo.”

Chituwa 7:3

Kweni ndamunonopeska mtima waku Farao ndipo chingana ndamukwandaniska visimikizgu vyangu ndi vyakuziziswa mu charu cha Egipiti,

Chituwa 9:16

Kweni pa chifukwa ichi ndamuzomerezgani kuŵa ŵamoyo, kumurongoni nthazi yangu, alinga kuti zina langu litaulike mu charu chose chapasi.

Chituwa 7:17

Viyo atiti Ambuya, “Paku ichi ukaziŵanga kuti Ndine Ambuya, ehe, ndikakosonga maji gho ghemu Nile ndi ndodo yo yemu janja langu, ndipo ghakasandukanga ndopa,

ŴaRoma 11:8

uli ndimo kwalembeke, “Chiuta waŵapaska mzimu wakugompho, maso ghakuti ŵareke kulereska, ndi makutu ghakuti ŵareke kuvwa, mpaka ku zuŵa lenilino.”

Ezekiele 39:13

Ŵanthu wose mu charu ŵakaŵaŵikanga, ndipo yikaŵanga mbiri ya chitumbiku chikuru kwakuruska kwaku iwo pa zuŵa lo nkharongori yanga unkhankhu wangu, atiti Ambuya Chiuta.

Ezekiele 28:22

Kamba kuti, Viyo atiti Ambuya Chiuta: “Ehe, ndimikana nawe, Sidoni, ndikavumbuwanga unkhankhu wangu mwaku iwe. Ndipo ŵakaziŵanga kuti ine ndine Ambuya, po ndifiska vyeruzgu vyangu mukati mwake, ndi kuvumbuwa utuŵa wangu mwaku iyo;

Ezekiele 20:9

Kweni pa chifukwa cha zina langu, ndingureka alinga kuti lireke kufipiskika mu maso gha mitundu yo iwo ŵaja mukati mwawo, mu maso ghaku ŵeniwo ndingujiwoneska pakuŵatuzga iwo mu charu cha Egipiti.

Nehemiya 9:10

ndipo munguchita visimikizgu ndi vyaminthondwi paku Farao ndi ŵateŵeti ŵake ndi ŵanthu wose ŵa charu chake, pakuti munguziŵa kuti wanguchita mwa mutonyolo pa auskefwe; ndipo mungujichitiya zina, uli ndimo lilili kufika msana wale.

Chituwa 18:11

Sono ndiziŵa kuti Ambuya mbara akuruska ŵachiuta ŵanyake wose, chifukwa angupozomoska ŵanthu wo ku magoŵa gha ŵaEgipiti, penipo ŵanguŵayuzga.”

Chituwa 14:8

Ndipo Ambuya angunonopeska mtima waku Farao karonga wa Egipiti ndipo wangundondoloska ŵaYisraele ŵachiruta ndi kugiya.

ŴaRoma 9:18

Viyo na, mweniyo wakhumba wamchitiya lisungu, ndipo mweniyo wakhumba wangangamiska.

Chituwa 10:27

Kweni Ambuya angunonopeska mtima waku Farao ndipo kuti wanguzomerezga cha kuti ŵarutenge.

Chituwa 14:3

Pakuti Farao wakakambanga kuti ŵaYisraele ‘Ŵawira mu charu; bozwa laŵajariya mukati.’

Chituwa 14:5

Penipo wangumunene karonga wa Egipiti kuti ŵanthu ŵa ŵathaŵa, maghanaghano ghake ndi gha ŵaŵanda ŵake ghangusintha pa ŵanthu ŵa; ndipo wanguti, “Nchine chenicho tachita, po tazomerezga ŵaYisraele kuruta ndi kureka kutiteŵete?”

Chituwa 14:23

ŴaEgipiti ŵangundondoloska ndi ŵanguweremo pavuli pawo mukati mu nyanja, ŵakavalo wose ŵaku Farao magareta ghake, ndi ŵankhondo ŵapa ŵakavalo ŵake.

Chituwa 14:25

Kuphatizga kukoroŵeka mawilo gha magareta viyo kuti ŵaghaguguzanga ndi unonono ukuru; ndipo ŵaEgipiti ŵanguti, “Tiyeni tithaŵe ku ŵaYisraele pakuti Ambuya atuŵarwiya paku ifwe.”

ŴaLevi 10:3

Sono Mosese wanguti kwaku Aroni, “Ichi ndicho Ambuya akamba, ‘ndikajirongonga mtuŵa mwaku weniwo ŵe pafupi nane, ndipo paurongo pa ŵanthu wose ndikaŵanga ndi unkhankhu.’ ” Ndipo Aroni wanguja chisisi.

Ezekiele 32:15

Nditakuti ndachitiska phasulu charu cha Egipiti penipo vyose vyo vyazaza mu charu cho vikawaranga, po ndikabayanga wose ŵakujamo, penipo ndipo ŵakaziŵanga kuti ndine Ambuya.

Chituwa 6:7

ndipo ndikakuchitaninga kuŵa mtundu wakundamweni, ndipo ndikaŵanga Chiuta winu, ndipo mukaziŵanga kuti ndine Ambuya Chiuta winu, mweniyo wakutuzgani kusi ku mphingu za ŵa Egipiti.

Chituwa 10:2

Ndipo unene mwana wako munthurumi ndi mzuku wako munthurumi, ndi uli mo ndachitiya ndi ŵaEgipiti, ndi visimikizgu vyo ndaŵawoneska alinga kuti muziŵe kuti ndine Ambuya.”

Chituwa 12:28

Viyo ŵaYisraele ŵanguruta ndi ŵanguchita kwakukozgana; uli ndimo Ambuya angulanguliya Mosese ndi Aroni ndimu ŵanguchitiya.

Yoswa 11:20

Pakuti yenga nchitu ya Ambuya kunonopeska mitima yawo kuti ŵazichirwanga ndi ŵaYisraele mu nkhondo, mwakuti ŵaparghanikiye limu tetete, kuti ŵaronde lisungu cha kweni kuti ŵadumulikiye limu, nge ndimo Ambuya angulanguliya Mosese.

Ŵeruzgi 4:7

Ndipo ndikatuzganga Sisera, wakurongozga mura wa nkhondo yaku Yabini, kwachikumana nawe pa msinji Kishoni ndi magareta ghake ndi maŵanja ghake gha nkhondo; ndipo ndikamuperekanga mu janja lako.”

Ezekiele 38:16

ukazanga kurwana ndi ŵanthu ŵangu ŵaYisraele, ngendi mtambo ubenekere charu. Mu mazuŵa gha umari ndikutonge kuti umikane ndi ŵanthu ŵangu, mwakuti mitundu yindiziŵe, alinga kuti pakuporote mwaku iwe Gogi, ndivumbuwe utuŵa wangu paurongo pawo.

Ezekiele 38:23

Viyo ndikarongonga ukuru wangu ndi utuŵa wangu ndikajiziŵiskanga ndamweni mu maso gha mitundu yinandi, penipo ndipo ŵakaziŵanga kuti ine ndine Ambuya.”