2 Mikoka 18:5 - Tonga Bible 1986

⁵ Viyo karonga waku Yisraele wanguwunjika ŵamchimi machumi pe chumi ghanayi (400), wanguti kwakuwo, “Kumbi tirutenge ku Ramoti-gileada, pamwenga tireke?” Ndipo iwo ŵanguti, “Rutaninge chifukwa Chiuta wawuperekenge mu janja la karonga.”

2 Mikoka 18:5 Referans Kwoze

Chivumbuzi 19:20

Ndipo chingukoleka chikoku cho ndi pamoza nacho mchimi-mtesi yo, mweniyo wanguchita minthondwi pa maso pake, mwaku yeniyo wanguŵarandizgiya ŵeniwo ŵanguronde lisimbu la chikoku, ndi wo ŵalambiyanga chikozgu chake. Yaŵa ŵaŵi ŵangupong'eka ŵamoyo mu nyanja ya moto yo njakukole ndi fukunyira.

2 Timote 4:3

Chifukwa yikazanga nyengo penipo ŵarekenge kuvwiyapo chisambizgu cho chizirima kweni pakuŵa ndi makutu ghakunyenye, ŵajiunjikiyenge ŵasambizgi kwakuyana ndi malikhumbira ghaku ŵija;

Mika 3:11

Ŵarongozgi ŵake ŵateruzgiya chimbundi, ŵazukuru ŵake ŵasambizgiya mphoto, ŵamchimi ŵake ŵaloska chifukwa cha ndrama; ndipuuli ŵayegeme ku Ambuya ndi ŵatiti, “Kumbi Ambuya ŵe mukati mwidu cha? Uheni kuti ukatiwiyanga cha.”

Mika 2:11

Asani munthu wangenda ndi mtima wakupusika ndi kukamba utesi, ndi kuti, “Nkhataulanga kwaku iwe ndiza vinyo ndiso ndi vyakumwa vyakuloŵeleska,” ndiyo wangaŵa wakutaula wa ŵanthu yaŵa!

Ezekiele 13:22

Chifukwa kwautesi mwachitiska chitima wakurunjika nanga ine kuti ndamuchitiska chitima cha, ndi mwalimbiska muheni, kuti ndamuchitiska chitima cha, ndi mwalimbiska muheni, kuti wareke kung'anamukako ku nthowa yake yiheni mwakuti wataske umoyo wake;

Yeremiya 42:20

kuti pakupuruka kwinu mukafwanga. Pakuti mungundituma ku Ambuya Chiuta winu kuti, ‘Tirombe ku Ambuya Chiuta widu, ndipo chose cho Ambuya Chiuta widu wakambenge utitauliye ndipo tikachichitanga.’

Yeremiya 23:17

Ŵakamba kwakukiyakiya kwaku wo ŵanyoza mazu gha Ambuya, ŵatiti, ‘Kukaŵanga umampha kwaku imwe,’ ndi kwaku yose wakuchita vyamu mtima wake, watiti, ‘Palivi uheni wo ukakuziyanga.’ ”

Yeremiya 23:14

Ndipo mu ŵamchimi ŵa Yerusalemu ndawonamo chinthu chakofya: ŵachita ureŵi ndipo ŵatenda mu mautesi; ŵalimbiska manja gha ŵakuchita uheni, viyo kuti palivi yumoza yo waweko ku mautimbanizi ghake; wose ŵaŵa nge ndi Sodomu ndipo ŵakujamo ŵake nge ndi Gomora.”

2 Mikoka 18:14

Ndipo wanguti wafika ku karonga wanguti kwaku iyo, “Mikaya, kumbi tirutenge ku Ramotigileada kwa chipota homwa pamwenga tireke?” Ndipo iyo wanguŵamuka, “Rutaninge, mwamkuŵa ndi mwaŵi; ŵamperekeka mu janja linu.”

2 ŴaKaronga 3:13

Ndipo Elisha wanguti ku karonga waYisraele, “Nde nawe ndi chine iwe? Ruta ku ŵamchimi ŵa ausu, ndi ŵamchimi ŵa anyoko.” Kweni karonga waYisraele wanguti kwaku iyo, “Awa, MbAmbuya wo ŵadana ŵakaronga ŵatatu yaŵa kuŵapereka mu janja laku Moabu.”

1 ŴaKaronga 18:19

Viyo sono tuma ndi uwungang'e ŵaYisraele wose kwangu pa phiri Karmele, ndi ŵamchimi machumi pe chumi ghanayi ndi machumi ghankhonde (450) ŵaku Bala ndi ŵa mchimi machumi pe chumi ghanayi (400) ŵaku Ashera, ŵeniwo ŵaturgha pa gome laku Yezebelu.”

1 ŴaKaronga 4:13

Bengaberi, mu Ramoti-gileada (wenga ndi mizi yaku Jairi, mwana waku Manase, yo yemu Gileada; ndipo wenga ndi chigaŵa cha Argobu, cho chemu Bashani, misumba yikuru machumi nkhondi ndi limoza (60) ya malinga ndi mipiringizgu ya mkuŵa);

2 Mikoka 18:4

Ndipo Yehosafati wanguti ku karonga waku Yisraele, “Fumba danga mazu ghaku Chiuta.”

2 Mikoka 18:6

Kweni Yehosafati wanguti, “Kumbi kuno kulivi mchimi wa Ambuya pade, kuti timfumbe iyo?”

1 ŴaKaronga 12:9

Ndipo wanguti kwaku wo, “Nchine cho mutindipanga kuti nkhamuke ŵanthu wo ŵangundifumba kuti, ‘Uyuyuske goŵa lo ausu ŵakuŵika paku ifwe’?”

Yeremiya 23:16

Viyo atiti Ambuya ŵa maŵanja, “Rekani kutegherezga ku mazu gha ŵamchimi ŵeniwo ŵatimuchimiyani, ŵatukuzazani ndi vyakugomezga vyambura kanthu: ŵakamba viwona vya maghanughanu ghawo, kuti vyakutuwa ku mlomo wa Ambuya cha.