1 ŴaKaronga 19:10 - Tonga Bible 1986

¹⁰ Wanguti, “Ndachitiya sanje weniukongwa Ambuya, Chiuta wa maŵanja; pakuti ŵaYisraele ŵajowo phanganu linu, ŵabwangandukiya pasi viguŵa vinu vya sembe, ŵabaya ŵamchimi ŵinu ndi lipanga, ndipo ine, ine pe ndija ndajako, ndipo ŵapenja umoyo wangu, kuti akoso.”

1 ŴaKaronga 19:10 Referans Kwoze

1 ŴaKaronga 18:4

ndipo penipo Yezebelu wangubaya ŵa mchimi ŵa Ambuya, Obadiya wanguto ŵa mchimi machumi pe chumi (100) wanguŵabisa machumi ghankhonde ghankhonde mu mphanji, ndipo wanguŵapaska kurgha ndi maji.)

1 ŴaKaronga 18:22

Eliya wanguti ku ŵanthu, “Ine, ndipo ine pe, ndine ndajapo mchimi wa Ambuya; kweni ŵa mchimi ŵaku Bala mbanthu wo ŵe machumi pe chumi ghanayi ndi machumi ghankhonde (450).

Chituwa 34:14

(pakuti kuti mukasopanga so chiuta munyake cha, pakuti Ambuya, Yo zina lake ndi Sanje, ndi Chiuta wa sanje),

Chituwa 20:5

kuti ukavilambiyanga chingana nkhuvitataliya cha; pakuti ine Ambuya Chiuta wako ndine Chiuta wa sanji, wakusiskiya pa ŵana uheni wa auskeu, mpaka ku mwandanu wa chitatu ndi wachinayi waku wo ŵatinditinkha;

1 ŴaKaronga 18:30

Sono Eliya wangunena ndi ŵanthu wose, “Ndereni kunu kufupi.” Ŵanthu wose ŵanguza kufupi, ndipo wangurongose so chiguŵa cha sembe cha Ambuya cho chinguwiskika pasi.

Maŵerengedu 25:13

ndipo likamuŵiyanga iyo ndi ku mphapu yake pavuli pake, phanganu la mzukuru wa muyaya, chifukwa wanguchitiya sanji Chiuta wake, ndi kuŵachitiya mphepeska ŵaYisraele.’ ”

Maŵerengedu 25:11

“Finehasi mwana waku Eleazara, mwana waku Aroni mzukuru, wawezge vuli ukari wangu pa ŵaYisraele, pakuti wenga ndi sanji mu malo mwa sanji yangu mukati mwawo, kuti ndireke kuŵamara ŵaYisraele mu sanji yangu.

Yohane 2:17

Ndipo ŵasambizi ŵake ŵangukumbuka kuti kungulembeka, “Rwana la nyumba yinu lindirghenge.”

Mika 7:2

Ŵarunji ŵakumara pa charu, ndipo palivi murunji mukati muŵanthu; wose ŵalindizga ndopa; ndipo yose wasaka mbali wake ndi ukondi.

Mika 6:16

Chifukwa mwasunga vilayizgu vyaku Omri, ndi vyakuchita vyose vya nyumba yaku Ahabu; ndi mwayenda mufundu zawo; ndi mupasuweninge, ndi ŵakujamo ŵinu wakafyonyekanga; viyo mukayeyekanga ndi ŵanthu.”

Hoseya 5:11

Efraimu wasuzgika ndi kupwetekeka mu cheruzgu, chifukwa wanguŵika mtima wake pa vyaŵakaŵaka.

Yeremiya 2:30

Ndaŵapuma ŵana ŵinu kwambura kakwanduwapo, ŵalivi kuphwere kuwere ku umampha. Lipanga laku wamweni labaya ŵamchimi ŵako, uli ndi nkharamu yakurazuka.

Sumu 119:139

Ukari wangu ukole nge ndi moto mukati mwangu, chifukwa wakupindikana ŵangu kuti ŵaphwere vilangulu vinu cha.

Sumu 69:9

Kujipereka kwangu ku nyumba yinu kukole nge ndi moto mukati mwangu, ndipo matozu gha ŵakutoza imwe ghawa paku ine.

1 ŴaKaronga 22:8

Ndipo karonga ŵaYisraele wanguti kwaku Yehosafati, “Wachalipo munthu yumoza mweniyo tingafumbako gha Ambuya, Mikaya mwana waku Imla; kweni nditumutinkha, pakuti kuti wachimapo ghamampha paku ine cha, kweni ghaheni pe.” Yehosafati wanguti, “Karonga wareke kukamba viyo.”

1 ŴaKaronga 19:14

Wanguti, “Ndachitiya sanje Ambuya, Chiuta wa maŵanja weni ukongwa; pakuti ŵaYisraele ŵajowo phanganu linu, ŵataya pasi viguŵa vinu vya sembe, ŵabaya ŵamchimi ŵinu ndi lipanga, ndipo ine, ine pe ndija, ndajako, ndipo ŵapenja umoyo wangu, kuti ŵakoso.”

1 ŴaKaronga 19:2

Sono Yezebelu wangutuma thenga kwaku Eliya, kuti, “Viyo so ndimu ŵachitiyi ŵachiuta kwaku ine, ndi kuruskako so, asani umoyo wako ndirekenge kuwuchita ulaka mbumoyo wa yumoza waku wo pa nyengo nge ndi iyi la mawa.”

1 ŴaKaronga 18:20

Viyo Ahabu wangutuma ku ŵaYisraele wose ndi wanguwungang'a pamoza ŵa mchimi pa Phiri Karmele.

1 ŴaKaronga 18:17

Penipo Ahabu wanguwona Eliya, Ahabu wanguti kwaku iyo, “Kumbi ndiwe, iwe wakusuzga Yisraele?”

1 ŴaKaronga 18:10

Po aliri amoyo Ambuya Chiuta winu, kulivi mtundu pamwenga ufumu kweniko mbuyangu walivi kutumako kwachipenja imwe, ndipo asani ŵangakamba, kuti, ‘We kuno cha,’ wachitiskenge rapu ufumu wo pamwenga mtundu wo kuti ŵalivi kumusaniyani.

1 ŴaKaronga 20:35

Ndipo yumoza wa ŵana ŵa ŵamchimi wangunena ndi munyake pa langulu la Ambuya, wanguti, “Undipume, nditikupempha.” Kweni munthu yo wangukana kumupuma,

1 ŴaKaronga 20:22

Ndipo mchimi wangundere kufupi ndi karonga wa ŵaYisraele, wangunena nayo, “Zanga jikhomeske, ndipo ughanaghane umampha cho ukachitanga; pakuti mu nyengo ya maliwondwe karonga waku Siriya waka kweriyanga paku iwo.”

1 ŴaKaronga 20:13

Ndipo ehe, mchimi wanguza kwaku Ahabu karonga wa ŵaYisraele, wanguti, “Viyo atiti Ambuya, ‘Kumbi wachiwona chimzinda chose ichi? Awona, ndichiperekenge mu janja lako msana wale, ndipo ukaziŵanga kuti ine ndine Ambuya.’ ”

ŴaHebere 11:37

Wangupong'eka mya ŵanguchekeka, ŵangweseka, ŵangubayika ndi lipanga: ŵanguwurawura ŵakuvwara vikopa vya mberere ndi vikopa vya mbuzi: ŵakavu, ŵakusuzgika, ŵakuchitika uheni,

Marangu 31:16

Ndipo Ambuya anguti kwaku Mosese, “Ehe, we pafupi kura pamoza ndi ausu, sono yaŵa ŵanthu ŵakayukanga ndi kurondo ŵachiuta ŵalendo ŵa charu ichi, kweniko ŵakarutanga kwachiŵa mukati mwawo. Wakandisiyanga ine, ndi kuswa phanganu langu lo ndingupangana nawo.

2 ŴaKaronga 10:16

Ndipo wanguti, “Tiye pamoza nane ukawone phamphu langu lapa Ambuya.” Viyo wangumwendeska mu gareta.

Yeremiya 36:26

Ndipo karonga wangulanguliya Yeramelu mwana wakaronga, ndi Seraya mwana waku Azariele ndi Shelemiya mwana waku Abdeli kwachiŵako Baruki mlembi ndi Yeremiya mchimi yo, kweni Ambuya anguŵabisa.

Nehemiya 9:26

“Ndipuuli ŵenga ŵa mtafu ndi ŵangukugalukiyani ndi ŵangutaya dangu linu ku msana kwawo ndi ŵangubaya ŵamchimi ŵinu, ŵeniwo ŵaŵachenjezganga kuti ŵaweriyenge kwinu, ndipo ŵangutukana ukongwa.

Sumu 78:37

Mtima wawo kuti unguŵa wakunyoroka cha; kuti ŵanguŵa ŵakongorekwa mu phanganu lake cha.

Sumu 119:26

Po ndingusumuwa vyose vyo ndikuchita, imwe mungundamuka; ndisambizgeni virunguchizgu vinu!

Sumu 119:126

Ambuya ndi nyengo yakuti muchiti nchitu, chifukwa dangu linu lasweka.

Yesaya 49:4

Kweni ndinguti, “Ndatakataka kwa waka, ndataya nthazi zangu pambura kanthu ndi waka; ndipuuli urunji wangu kwakuneneska wendi Ambuya, mphoto yangu yendi Chiuta wangu.”