1 Mikoka 28:9 - Tonga Bible 1986

⁹ “Ndipo iwe Solomoni mwana wangu umuziŵe Chiuta wa ausu, umutatariye ndi mtima wakufikapo, ndi umoyo wakuzomera; chifukwa Chiuta wapenjapenja mitima yose, ndipo waziŵa lunguluku le lose. Asani utumpenja umusaniyenge; kweni asani utumureka wakutayenge muyaya.

1 Mikoka 28:9 Referans Kwoze

Yeremiya 29:13

Pakundipenja mukandisanianga asani mundipenjenge ndi mtima winu wose.

Yeremiya 24:7

Ndikaŵapaskanga mtima wakuziŵa kuti ine ndine Ambuya; ndipo ŵakaŵanga ŵanthu ŵangu, ine ndikaŵanga Chiuta wawo, pakuti ŵakaweriyanga kwangu ndi mtima wawo wose.

1 ŴaKaronga 8:61

Muchite mitima yinu kuŵa yakuneneska kwakufikapo pa Ambuya Chiuta widu, kwenda mu marangu ghake ndi kusunga malangulu ghake, nge ndi zuŵa lino.”

2 Mikoka 15:2

ndipo wanguruta kwa chikumana ndi Asa, ndipo wanguti kwaku iyo, “Mundivwe Asa ndi Yuda yose ndi Benjamini: Ambuya ŵe namwe penipo mweche nawo, Asani mutumpenja mumusaniyenge, kweni asani mutumjowo nayo wamjowoninga.

Sumu 9:10

Ndipo wo ŵaziŵa zina linu ŵaŵika chigomekezgu chawo mwaku imwe, Ambuya, kuti mwaŵajowo cha akumupenjani.

1 Samuele 16:7

Kweni Ambuya anguti kwaku Samuele, “Reka kulereska pa kawonekero kake nanga mphautali wa msinkhu, wake, chifukwa ine nda mukana; pakuti ine kuti ndiwona mo munthu wawone cha; munthu walereska pa kawonekero ka kubwaro, kweni Ine ndilereska mtima.”

Yohane 4:24

Chiuta ndi Mzimu: ndipo ŵakusopa iyo ŵatenere kumsopa mu mzimu ndi mu uneneska.”

Yeremiya 17:10

“Ine Ambuya ndipapaska mzimu, nditesa mtima, kupaska ku munthu we yose kwakulingana ndi thowa zake, kwakulingana ndi chipasi cha machitidu ghake.”

Sumu 139:2

Imwe muziŵa chose cho ndichita, kutuliya kutali muwamo maghanaghano ghangu ghose.

Yeremiya 9:24

kweni yo watumbwa watumbwiye mwaku ichi, chakuti wawamo ndi watindiziŵa ine, kuti ndine Ambuya akuchita chifundu, cheruzgu ndi urunji mu charu, pakuti mu vinthu ivi ndimu ine ndikondwere, atiti Ambuya.”

Yohane 17:3

Ndipo chenichi mbumoyo wamuyaya, kuti ŵanthu ŵakuziŵeni imwe, Chiuta yija muneneska ndi so Yesu Kristu mweniyo mungutuma.

Hoseya 4:1

Vwani mazu gha Ambuya imwe mwa ŵaYisraele; chifukwa Ambuya ŵe ndi mlando ndi ŵakuja mu charu. Palivi chigomezgu, chingana mbulemu, pamwenga kuziŵa Chiuta mu charu.

Yeremiya 31:34

Ndipo munthu kuti warunguchizgenge so mwanasi wake nanga ndi mwana munyake cha kuti, ‘Ziŵa Ambuya,’ pakuti wose ŵakandiziŵanga, kutuwa ku mumana mpaka ku mura, atiti Ambuya; pakuti ndikagowokiyanga mautimbanizi ghawo, ndipo uheni wawo kuti ndikawukumbukanga so cha.”

Yesaya 45:19

Kuti ndingukamba mu ubendi cha, mu charu cha mdima; ndengavi kukamba ku mphapu yaku Yakobe, ‘Ndipenjeni mu soka linu.’ Ine Ambuya ndikamba uneneska, nditaula chenicho ncha kurunjika.

2 ŴaKaronga 20:3

“Kumbukani sono, Ambuya, nditukuŵeyereni mwenimo ndayende paurongo pinu mu ukongorekwa ndi mtima wose, ndipo ndachita cho nchamampha mu maso ghinu!” Ndipo Hezekiya wanguliya kwakuŵaŵa.

Yeremiya 22:16

Ŵangweruzga mlando wa wakusauka ndi wakusuzgika, viyo kwenga umampha. Pakuchita viyo asi nkhundiziŵa ine? atiti Ambuya.

Chituwa 15:2

Ambuya ndi nthazi yangu ndi sumu yangu, ndipo aŵa iwo utaski wangu: mweniyo ndi Chiuta wangu, ndipo ndikamurumbanga, Chiuta wa ada, ndipo ndikamukuzganga.

1 Mikoka 29:9

Ŵanthu ŵangukondwa chifukwa vyose ivi vinguperekeka kwa wanangwa, pakuti ndi mtima wose ŵangupereka ndi likondwa ku Ambuya. Davidi karonga nayo wangukondwa ndi chimwemwe chikuru.

1 ŴaKaronga 8:39

vwani imwe kuchanya ko malo gha uja winu, ndipo gowokiyani, ndi chitani, mupaske kwaku yose yo mwaziŵa mtima wake, kwakulingana ndi nthowa zake zose (chifukwa imwe, ndimwe pe, muziŵa mitima ya ŵana ŵa ŵanthu);

Machitidu gha Ŵakutumika 17:30

Viyo nadi Chiuta wangujumphiskiya maso pa nyengo zo za ujira; kweni sono walanguliya ŵanthu wose kosekose kung'anamuka:

ŴaHebere 4:13

Ndipo palive chakulengeka chambura kuwoneka paurongo pake: kweni vyose vye nkhuli ndi mwazi ku maso ghaku mweniyo te ŵachifukwa nayo.

Sumu 101:2

Ndikajisunganga mu nthowa yambura kalema. A, kumbi muzenge zuŵanji kwaku ine? Ndendenge ndi mtima wakutowa mu nyumba yangu;

Sumu 7:9

Zomerani kuti uheni wa ŵaheni umare. Kweni imwe zengani ŵakurunjika, imwe mutesa mzimu ndi mitima, ndimwe Chiuta wakurunjika.

Marangu 31:21

Ndipo penipo viheni vinandi ndi masuzgu vyaza paku wo, sumu iyi yikazanga paurongo pawo nge mbukaboni (pakuti yikaŵanga yambura kuruwika mu milomo ya mphapu zawo), pakuti ndiziŵa vifukwa vyenivyo ŵachita kwamba kale, ine ndenga ndindaŵatole mu charu cho ndingurapiya kuŵapaska.”

ŴaHebere 12:28

Viyo, taŵakuronde ufumu wambura kusukunika, tiŵe ndi kuwonga, mwaku wo tisope Chiuta kwakumkondweska ndi uwopa Chiuta ndi wofe:

2 ŴaKaronga 22:2

Wanguchita cho chenga chakurunjika mu maso gha Ambuya, wangwenda munthowa zose zaku Davidi awiske, ndipo wengavi kung'anamukiya ku marghe pamwenga ku maze.

Machitidu gha Ŵakutumika 1:24

Ndipo ŵanguromba, ŵakuti, “Imwe, Ambuya, mwaŵakuziŵa mitima yaku wose,

Yohane 21:17

Wanena nayo so kachitatu, “Simoni, mwana waku Yohane kumbi utindanja ine?” Petro wanguvwa chisungu, chifukwa wanena nayo kachitatu yaka, “Utindanja ine?” Wangunena nayo, “Ambuya imwe muziŵa vyose; muziŵa nadi kuti nditanja imwe.” Yesu wamnene, “Liska mberere zangu.

Yohane 2:25

chifukwa iyo wanguziŵa wose, ndipo kuti wangukavuka cha kuti yumoza wasimikizge pa munthu; chifukwa mwenecho waziŵanga cho chenga mu munthu.

Hoseya 4:6

Ŵanthu ŵangu ŵanangika chifukwa chakuŵavi zeru, chifukwa mwapata zeru, ine nane nditukupata kuŵa mzukuru wangu. Chifukwa waruwa dangu laku Chiuta wako, nane ndiruwenge ŵana ŵako.

Marangu 4:35

Chingukambika kwaku imwe kuti Ambuya ndi Chiuta yija palivi munyake.

2 ŴaKorinte 4:6

Pakuti ndi Chiuta yo wanguti, “Kutuwa mu mdima ukweru uŵalenge.” Ndiyo waŵaliya mu mitima yidu kungweruska mziŵiru wa unkhankhu waku Chiuta mu chisku chaku Yesu Kristu.

Chiyambo 8:21

Ndipo penipo Ambuya angunuska fungu la kukondweska, Ambuya anguti mu mtima wawo, “Kuti ndiwerezgengepo so cha kutemba charu chifukwa cha munthu, chifukwa cha maghanaghano ghaheni ghamu mtima wa munthu kuturiya ku uhurwa wake; ndipo so kuti ndikawerezgangapo cha kumara chinthu chose chamoyo uli ndimo ndachitiya.

Ezekiele 38:10

“Viyo atiti Ambuya Chiuta: Pa zuŵa liya maghanghaano ghakazanga mu mtima wako, ndipo ukarungurukanga chiŵembu chiheni.

Yeremiya 11:20

Kweni, Ambuya mwe, ŵa maŵanja, imwe muteruzga mu urunji; imwe mutesa mtima ndi mzimu; ndiwoneskeni thayu linu paku iwo, pakuti ndapereka kwinu mlando wangu.

Nthanthi 17:3

Mumphika wakusungapo ngwa siliva ndipo ng'anjo nja golide, ndipo Ambuya ŵatesa mitima.

Ezra 8:22

Chifukwa ndenga ndi soni kupempha kutipaska ŵankhondo ndi ŵapakavalo kutivikiriya ku ŵarwani mu nthowa, tingumunene karonga kuti, “Janja laku Chiuta widu le paku wose wo ŵatumwanja, kuŵachitiya umampha, ndipo ukuru wake we ndi nthazi kwananga wose wo ŵatumujowo.”

Chituwa 3:16

Ruta, ukaŵawunjike pamoza ŵaraŵara ŵa ŵaYisraele, ndipo ukaŵanene kuti, ‘Ambuya, Chiuta wa auskwemwe Chiuta waku Abrahamu, waku Yisaki, ndi waku Yakobe, wandiwoneke ine, wakati, “Ndakuwonani, ndi vyo vyachitikiya imwe mu Egipiti;

Yeremiya 20:12

Ambuya mwe ŵa maŵanja, imwe mutesa ŵarunji, imwe muwona mtima ndi zeru, ndiwoneskeni thayu linu paku iwo, pakuti ndapereka kwinu mlando wangu.

Sumu 18:2

Chiuta ndi jarawi langu, linga langu, ndi mpozomoski wangu, Chiuta wangu, jarawi langu, mwaku mweniyo ndidingang'a, ndi nguru yangu, ndi mtaski wangu wa nthazi, linga langu lakukho.

Chivumbuzi 2:23

Ndipo ŵana ŵake nkhaŵabayanga ŵakafwanga; ndipo yiziŵenge mipingu yose kuti ndine ndipenjapenja zeru ndi mtima: ndipo nkhakupaskaninga munthu we yose kwakulingana ndi machitidu ghinu.

1 Petro 5:2

liskani muskambu waku Chiuta wo we mwinu, pakuulereze kwakupemberezgeka cha, kweni kwakukhumba, kwakuyana ndi kukhumba kwaku Chiuta; kwaupiripiri nako cha, kweni kwaphamphu;

Machitidu gha Ŵakutumika 17:23

“MwaŵaAthene, ndiwona kuti mwaku vyose mwe ŵakusopa ukongwa, chifukwa ndichisorotapo ndi kuthoŵa vyo musopa ndingusaniya chisoperu nacho, po pangulembeka, ‘Kwaku Chiuta Wambura Kuziŵikwa.’ Viyo mweniyo musopa mwambura kumziŵa, ine ndikutauliyani iyo.

Yohane 8:55

ndipo kuti mwaŵaziŵa cha; kweni ine ndituŵaziŵa, asani ndinganena kuti ndirive kuŵaziŵa ndiŵenge wakukozgana ndi imwe, mutesi, kweni ndituŵaziŵa, ndipo ndisunga mazu ghawo.

Yohane 1:47

Yesu wangumuwona Natanele wachiza kwake, wanguti kwaku iyo, “Awonani, muYisraele nadi, mwaku mweniyo mulive urghargha!”

Sumu 89:26

Wakakambanga nane, ‘Imwe ndimwe Ada ndi Chiuta wangu; ndimwe muvikiriyi wangu ndi mtaski wangu.’

1 ŴaKaronga 3:6

Ndipo Solomoni wanguti, “Mungurongo chifundu chikuru ku muŵanda winu Davidi ada, chifukwa wangwenda paurongo pinu mu ukongorekwa, mu urunji, ndi mukunyoroka kwa mtima kwaku imwe, ndipo munguŵaŵikiya chifundu chikuru ichi, ndipo munguŵapaska mwana munthurumi wakuja pachitengo chawo msana wale.

Yesaya 1:28

Kweni vigaruka ndi ŵaheni ŵakaphwanyikiyanga pamoza, ndi wose wo ŵakana Ambuya ŵakamaranga.

Chiyambo 28:13

Ndipo ehe, Ambuya anguma pachanya pake ndi anguti, “Ndine Ambuya, Chiuta waku Abrahamu ausu ndi Chiuta waku Yisaki; charu chenicho wagonapo ndikachipaskanga kwako ndi ku mphapu yako;

2 ŴaKorinte 8:12

Chifukwa asani upusuwo ulipo, mpasku ngwamarondeka uli ndimo munthu waliri nacho, uli ndimo wauriyavi cha.

1 ŴaKorinte 15:34

Yukiyani ku urunji, ndi kuti mungalakwa cha; chifukwa ŵanyake mbajira mu kumuziŵa Chiuta; ndikamba namwe ichi alinga kuti mulengeke lilengu.

Chiyambo 6:5

Ambuya anguwona kuti utimbanizi wa munthu wenga ukuru mu charu ndiso mateskedu ghose gha maghanaghano gha mu mtima ghenga ghaheni pe nyengo zose.

2 ŴaKorinte 9:7

Munthu yose wapaske uli ndimo wajiteme mu mtima wake; kwachigwinini cha, pamwenga kwakukakamizgika cha; chifukwa Chiuta watanja mpaski wamasangu.

1 ŴaKaronga 8:43

vwani imwe kuchanya ko malo gha uja winu, ndipo chitani kwakulingana ndi chose cho mulendo wadaniya kwaku imwe; mwakuti ŵanthu wose ŵa charu chapasi ŵaziŵe zina linu ndi kumopani imwe nge ndimo ŵachitiya ŵa khamu linu Yisraele, mwakuti ŵaziŵe kuti nyumba iyi ndazenga yidanika ndi zina linu.

2 ŴaKaronga 21:22

wangujowo Ambuya Chiuta wa ŵambuyake, ndipo wengavi kwenda mu nthowa ya Ambuya.

1 Mikoka 22:19

Sono khozgani mitima ndi umoyo winu kupenja Ambuya Chiuta winu. Sokani ndi muzenge nyumba ya kupaturika ya Ambuya Chiuta, mwakuti bokosi la phanganu la Ambuya ndi viyaŵi vyakupaturika vyaku Chiuta vitoleke mu nyumba yakuzengeke zina la Ambuya.”

1 Mikoka 28:8

Viyo sono paurongo paku Yisraele yose khamu la Ambuya, ndi mu makutu ghaku Chiuta widu, sungani ndi penjani marangu ghose gha Ambuya Chiuta winu mwakuti charu ichi chamampha chiŵi chinu, chiŵenge chihara cha ŵana ŵinu muyaya pavuli pinu.

2 Mikoka 6:30

imwe mumuvwe kuchanya ko ku malo ghinu ghakujamo, mumugowoke; mugaŵiye we yose kwakulingana nge ndimo muziŵiya mtima wake, ndi mendedu ghake (pakuti imwe mwija ndimwe muziŵa mitima ya ŵana ŵa ŵanthu);

Sumu 89:38

Kweni sono mwakaripiya karonga yo; mwamuthawa ndi kumupata.

Nthanthi 3:6

Mu nthowa zako zose zomeranga iwo ndipo iwo ŵakanyoroskanga nthowa zako.

Yesaya 38:3

wanguti, “Kumbukani sono Ambuya, nditukuŵeyereni, mwenimo ine ndayende paurongo pinu mu ukongorekwa ndi mtima wose, ndipo ndachita cho nchamampha mu maso ghinu.” Hezekiya wanguliya kwakuŵaŵa.

Marangu 10:12

“Ndipo sono ŵaYisraele mwe, cho Ambuya Chiuta winu wakhumba kwaku imwe nkhopa Ambuya Chiuta winu kwenda mu nthowa zake zose, kumwanja, kuteŵete Ambuya Chiuta winu ndi mtima winu wose, ndi umoyo winu wose,

1 Samuele 12:20

Samuele wanguti, “Rekani kopa mwachita uheni uwu wose, viyo sono rekani kupatukako kukurondo Ambuya, muteŵetiyeni ndi mtima winu wose;

2 Mikoka 12:5

Shemaya mchimi wanguza kwaku Rehoboamu ndi ku ŵana ŵa karonga ŵaku Yuda wo ŵanguwungana ku Yerusalemu chifukwa chaku Sheshaki, ndi wanguti kwaku wo, “Ambuya atiti, ‘Mwandijowo ine, nane so ndamrekani mu janja laku Sheshaki.’ ”

Sumu 7:10

Nguru yangu yendi Chiuta, yo wataska wakutowa mu mtima.

Sumu 17:3

Asani imwe mungayesa mtima wangu, asani mungachezga nane ndi usiku, asani mungandipima, kuti mukasaniyangamo uheni cha mwaku ine; mlomo wangu kuti ulakwa cha.

Nthanthi 4:4

ada ŵangundisambizga, ndipo ŵanguti kwaku ine, “Uchite kuti mtima wako ukoreske mazu ghangu; sunga marangu ghangu, ndi uje wamoyo;

Yeremiya 29:14

Ndikasanirikanga ndi imwe, atiti Ambuya, ndipo ndikakuwezgiyaninga umampha ndikukuunjikani pamoza kutuwa ku mitundu yose ndiku malo ghose kweniko ndikukudikiskiyani, atiti Ambuya, ndipo ndikakuwezgiyaninga ku malo kweniko ndingumutuzgani kuya ku umkoli.

Ezekiele 11:5

Ndipo Mzimu wa Ambuya unguza paku ine, ungunena nane, “Kamba, Viyo atiti Ambuya: ndimo mughanaghaniya, owe nyumba yaku Yisraele; pakuti ndiziŵa vinthu vyo vituza mu mtima winu.