1 Corintios 3:12 - Totonac Coyutla

¹² La̠ta xli̠­lhu̠hua hua̠nti̠ tamak­tla­hua­má̠­nalh eé chiqui maka­pi­tzí̠n tali̠­chi­qui̠­na­má̠­nalh hua̠ntu̠ ta̠yaniy cumu la̠ oro, plata y lacuán chí­huix, y maka­pi­tzí̠n tali̠­chi­qui̠­na­má̠­nalh hua̠ntu̠ ni̠ ta̠yaniy cumu la̠ pák­lha̠t, mátlu̠c y móko̠t.

1 Corintios 3:12 Referans Kwoze

2 Timoteo 4:3

Porque lak­cha̠ma quilh­ta­macú acxni̠ cris­tianos niaj cati­ta­kax­mat­pú­tulh hua̠ntu̠ xax­li̠­ca̠na xta­la­ca­pa̠s­tacni Dios huata xma̠n huá nata­pu­tzay hua̠ntu̠ a̠tzinú tala­kati̠y, hasta lhu̠hua cris­tianos nata­pu­tzay xak­chu­hui̠­nacán hua̠nti̠ naca̠­liakchu­hui̠­naniy hua̠ntu̠ xma̠n sac­stucán takax­mat­putún.

2 Timoteo 3:7

Uma̠­kó̠lh lac­chaján anka­lhi̠ná talac­pu­tza­má̠­nalh li̠huana̠ nata­ca­tzi̠y lácu luu aksti̠tum nata­la­tama̠y, pero niaj lay taaka­ta̠ksa xta­lu­lóktat Dios.

2 Timoteo 2:20

Cumu la̠ hui­xinín catzi̠­yá̠tit pi̠ anta­nícu tla̠na hui­lá­calh nac aktum lanca chiqui lhu̠hua jalá̠n kalhi̠cán, maka­pi­tzí̠n pula̠tu xla oro, vasos xla plata, y na̠ kalhi̠cán maka­pi­tzí̠n xla pák­lha̠t chu xla li̠lh­támat tíyat; a̠máko̠lh hua̠ntu̠ xla oro o plata caj xma̠n ca̠pu̠­hua̠­yancán acxni̠ tla­huacán lanca pa̠xcua o caj li̠cá̠cni̠t li̠ka­lhi̠cán, y maka­pi­tzí̠n jalá̠n hua̠ntu̠ xla quihui chu xla li̠lh­támat caj chu­natá li̠mac­la­ca­squincán.

Apocalipsis 21:18

Xapá̠­tzaps hua̠ntu̠ xli̠s­ti­li­hui­li̠­cani̠t a̠má lanca ca̠chi­quí̠n, huá xli̠t­la­hua­cani̠t lak­li̠­la­káti̠t lac­slipua chí­huix hua̠ntu̠ hua­nicán jaspe, y xli̠­lanca a̠má ca̠chi­quí̠n hua̠k xatlá̠n oro xli̠t­la­hua­cani̠t, xta̠­chuná cumu la̠ la̠n xata­xaca vidrio.

Apocalipsis 3:18

Huá xpa̠­la­cata cca̠­ma̠­lac­nu̠­niyá̠n quioro la̠qui̠ milacán nat­la­hua­yá̠tit. Quioro luu xatlá̠n porque xlakstu oro, antá ma̠chi­chi̠­cani̠t nac lhcúya̠t, ma̠s­ta­lan­qui̠­cani̠t y ma̠x­tu­ní­calh xli̠­hua̠k hua̠ntu̠ ni̠tlá̠n xka­lhi̠y. Milacán cali̠t­la­huátit la̠qui̠ xli̠­ca̠na lac­rrico nahua­ná̠tit. Xa̠huachí cca̠­hua­niyá̠n pi̠ aquit caqui­mak­lhtí̠tit xas­na­papa milha­ka̠tcán hua̠ntu̠ nali̠­lha­ka̠­na­ná̠tit porque qui̠­taxtuy xalh­tan­tala lapá̠tit, y na̠ caqui­la̠­mak­lhtí̠hu qui­li̠­cuchu hua̠ntu̠ aquit cma̠sta̠y la̠qui̠ naca̠­la­ca­ma̠­nu̠­ca­ná̠tit nac mila­kas­ta­pucán y nala­ca­ca̠x­la­yá̠tit porque xla­ka­xo̠­ko̠­ni̠­tátit, y nala­ca­hua̠­na­ná̠tit.

1 San Pedro 1:7

Xafuerza naca̠­liucxilh­ca­ná̠tit lhu̠hua tapa̠tí̠n para xli̠­ca̠na li̠pa̠­hua­ná̠tit Cristo, xta̠­chuná cumu la̠ oro, la̠qui̠ naca­tzi̠cán pi̠ xlakstu oro ma̠chi­chicán nac lhcúya̠t. Amá cris­tiano hua̠nti̠ aksti̠tum li̠pa̠­huán Dios, para ta̠yaniy la̠tachá túcuya̠ tapa̠tí̠n nalak­chín nac xla­táma̠t xli̠­ca̠na pi̠ a̠tzinú lanca xta­palh ni̠ xachuná oro, porque oro lak­sputa, pero a̠má min­ta­ca̠­naj­latcán hua̠ntu̠ hui­xinín kalhi̠­yá̠tit ma̠squi lhu̠hua hua̠ntu̠ ca̠li̠­tzak­sa­ni­ca­ná̠tit y ni̠tu̠ nali̠­lac­la­ta̠yay, acxni̠ Quim­pu̠­chi­nacán Jesu­cristo namín xli̠­maktiy xli̠­ca̠na pi̠ nali̠­pa̠­xu­huay y tali̠­pa̠hu nali̠­ma̠x­tucán.

Apocalipsis 2:14

Ma̠squi lac­pu­hua­ná̠tit pi̠ aksti̠tum lapá̠tit, huí actzú hua̠ntu̠ aquit cli̠s­tac­ya̠­hua­pu­tuná̠n: nac milak­sti̠­pa̠ncán tala­má̠­nalh hua̠nti̠ tahuán quin­ta­li̠­pa̠­huán pero ni̠ tamak­xtek­ya̠­hua­putún xta­la­ca­pa̠s­tacni xamaká̠n Balaam, hua̠nti̠ ti­stac­yá̠­hualh Balac xla­cata pi̠ caca̠­ma̠t­lá­hui̠lh tala̠­ka­lhí̠n israel­itas, xlá ca̠ma̠uxcá̠­ni̠lh xla­cata pi̠ cata­li̠­huá̠­yalh a̠má tahuá hua̠ntu̠ xca̠­li̠­la­ka­chix­cu­hui̠­cani̠t tzincun, xa̠huachí na̠ ca̠huá­nilh pi̠ tla̠n ma̠squi cata­xa­kát­li̠lh túnuj lac­pus­ca̠tní̠n y cata­maka­pa̠­xú­hualh xmac­nicán.

Hebreos 13:9

Luu cuentaj cat­la­huátit ni̠tu̠ tili̠­taak­ska­hui­ta­pa̠­yá̠tit a̠túnuj tala­ca­pa̠s­tacni hua̠ntu̠ naca̠­hua­ni­ca­ná̠tit pi̠ huá luu a̠tzinú mili̠­ma̠­kan­tax­ti̠tcán para xli̠­ca̠na maka­pa̠­xu­hua­pu­tu­ná̠tit Dios, huata caj xma̠n huá cali̠­pa̠­huántit xta­pá̠x­qui̠t Dios, cali̠­mak­xtéktit pi̠ huá cali̠­tat­lí­huek­lhli mina­cujcán, y niaj huá cama̠­kan­tax­ti̠­pu­tútit hua̠ntu̠ huancán pi̠ “ni̠ nahua­yá̠tit tamá tahuá”, o la̠tachá túcuya̠ caj tas­maní̠n, porque xli̠­hua̠k tama̠­ko̠lh tas­maní̠n ne̠c­xnicú luu li̠ma­cuani̠t.

2 Timoteo 3:13

Pero la̠ta ámaj nahuán quilh­ta­macú xli̠­hua̠k a̠ma̠ko̠lh lac­li̠xcáj­nit lac­chix­cu­huí̠n a̠tzinuj tat­la̠­hua­le̠ni̠t nahuán porque chuná cumu la̠ xlacán taak­ska­hui­mi̠­na­má̠­nalh nahuán na̠chuná sac­stucán tataak­ska­hui­ta­ma̠­má̠­nalh y nata­lak­tzan­ka̠­ta̠yay.

1 Timoteo 6:3

Para tícu ma̠siyuy y li̠chu­hui̠nán túnuj tala­ca­pa̠s­tacni hua̠ntu̠ ni̠ ta̠ta­la­cas­tuca xta­lu­lóktat Cristo na̠ ni̠para hua̠ntu̠ aquinín ma̠si­yu­yá̠hu,

Colosenses 2:8

Luu cuentaj cat­la­huátit xla­cata pi̠ ni̠ti̠ caca̠­liak­ska­huimí̠n hua̠ntu̠ ni̠ kalhi̠y xta­lu­lóktat tachu­huí̠n ma̠squi lacuán y lak­ska­lalán takax­mata, porque tama̠­ko̠lh hua̠nti̠ chuná tali̠­ma̠­kalh­chu­hui̠­ni̠­na­má̠­nalh ni̠ antá taquilh­pa̠i̠má̠­nalh nac xta­la­ca­pa̠s­tacni Cristo huata huá tali̠­chu­hui̠nán hua̠ntu̠ min­ti̠­lha­ni̠­tanchá xtas­ma­ni̠ncán chu xta­la­ca­pa̠s­tac­nicán cris­tianos hua̠nti̠ luu akchi­pa̠­nam­putún uú nac ca̠quilh­ta­macú.

2 Corintios 2:17

Aquinín ni̠tu̠ caj cli̠t­la­ja­ma̠­náhu tumi̠n xta­chu­huí̠n Dios cumu la̠ tat­la­huay maka­pi­tzí̠n, huata cumu ma̠n Dios quin­ca̠­ma̠­lac­scu­jumá̠n y quin­ca̠ucxilhmá̠n, chuná tancs cma̠­kan­tax­ti̠­yá̠hu quin­tas­cu­jutcán cumu la̠ xlá lakati̠y.

Romanos 16:17

Nata̠lán, aquit cca̠­li̠­ma̠aka­tzan­ke̠yá̠n xla­cata pi̠ hui­xinín cuentaj cat­la­huátit tícuya̠ chixcú ca̠ma̠­paj­pi­tziy hua̠nti̠ tali̠­pa̠­huán Cristo, o para tícu ca̠lac­pu­tzaniy xla­cata pi̠ nata­li̠­ta­mo­kos­ta̠yay aktum tala̠­ka­lhí̠n. Huá chuná cca̠­li̠­hua­niyá̠n porque hua̠nti̠ chuná lama caj ni̠ aka­ta̠k­sni̠t a̠má xala­cuán tas­tac­ya̠hu hua̠ntu̠ hui­xinín ca̠li̠­ma̠­kalh­chu­hui̠­ni̠­ca­ni̠­tátit. Hua̠nti̠ chuná lama hui­xinín ni̠ cakax­páttit acxni̠ chuná ca̠ma̠­kalh­chu­hui̠­ni̠­pu­tuná̠n y ni̠ amigoj cat­la­huátit.

Hechos 20:30

Luu ská­lalh cata­hui­látit porque hasta hua̠nti̠ lac­xtum ca̠ta̠­ca̠­naj­la­yá̠tit la̠nchú maka­pi­tzí̠n nata­ta­la­kas­pit­ta̠yay y nata­lak­makán xta­la­ca­pa̠s­tacni Dios y nata­tzucuy tama̠­siyuy taaksaní̠n y lhu̠hua nata­li̠­pa̠­huán.

2 Corintios 4:2

Aquinín ni̠tu̠ ctla­hua­ma̠­náhu hua̠ntu̠ li̠xcáj­nit y li̠ma̠­xaná; ni̠ti̠ tu̠ cliak­ska­hui­ma̠­náhu hua̠ntu̠ ni̠chuná quin­ca̠­li̠­ma̠­pek­si̠yá̠n Dios, huata hua̠ntu̠ aksti̠tum cli̠­chu­hui̠­na­ná̠hu y cma̠­lu­lo­ká̠hu xta­chu­huí̠n. Y Dios cli̠­ma­ca̠­ná̠hu pi̠ sta­lanca catzi̠y hua̠ntu̠ cca̠­hua­nimá̠n la̠qui̠ hui­xinín tla̠n naqui­la̠­ca̠­naj­la­ni­yá̠hu.

1 Corintios 3:11

Porque chú niajlay tícu cati­ma̠­la­ca­tzu­qui̠pá pu̠lactum li̠túm ta­scújut xta̠­chuná cumu la̠ ma̠la­ca­tzu­qui̠ni̠t Jesu­cristo.

1 Corintios 3:13

Pero acxni̠ namín Jesu­cristo xla­cata naquin­ca̠­ta̠t­la­huayá̠n taxokó̠n xli̠­hua̠k aquinín cris­tianos acxnicú chú nata­siyuy xaní­cuma̠ tlak tla̠n ta­scújut hua̠ntu̠ ta̠yaniy o hua̠ntu̠ nalac­lako̠y, porque nali̠­ma̠­pa­si̠cán lhcúya̠t, antacú nata­siyuy xatícu tla­huani̠t tla̠n xta­scújut.