Mataio 21:22 - Tokelauan New Testament

²² Ma ko ho he mea lava e gogō atu ai koutou i te tatalo, ka vēnā lava oi maua e koutou, kāfai koutou e talitonu.”

Mataio 21:22 Referans Kwoze

Mataio 7:7

“Gogō atu, oi fōki atu ai ki a te koutou; hakili atu, oi maua ai e koutou; tukituki atu, oi tatala mai ai te faitotoka ki a te koutou.

Maleko 11:24

Ko te mea ia e lea atu ai au ki a te koutou: Kāfai koutou e tatalo ma gogō atu ki he mea, talitonu kua maua e koutou, oi ka fōki atu ai ki a te koutou ho he mea lava e gogō atu koutou ki ei.

1 Ioane 3:22

E maua e ki tātou mai ia te ia, ho he mea e gogō atu ki tātou ki ei, auā ko ki tātou e uhitaki ki nā mea e fakatonu mai e ia, ma e fai e ki tātou nā mea e fiafia ia ki ei.

Mataio 18:19

“Ko tētahi mea tēnei e lea atu ai au ki a te koutou: ho he taimi lava e mālilie ai he toka lua o koutou i te lalolagi ke tatalo atu ki ei, ka vēnā lava oi fai mo ki lāua e toku Tamana i te lagi.

Iakopo 5:16

Ko te mea ia, e tatau ke fakamāhani koutou i te takutaku atu o agahala a tētahi ki tētahi ma tatalo tētahi mo tētahi, kae ke mālōlō ai koutou. Ko te tatalo a te tino lelei, e mālohi ma e fehoahoani lahi lele ki a te ia.

Ioane 14:13

Ho he mea lava e gogō atu koutou ki ei i toku igoa, e fai e au, kae ke fakailoa ai te mamalu o te Tamana, e ala i te Ataliki.

Ioane 16:24

Ke pa mai ki te taimi nei, ko hēki gogō lele atu koutou ki he mea i toku igoa; gogō atu oi maua ai e koutou, kae ke kātoatoa ai te koutou fiafia.

Ioane 15:7

Ke tūmau te koutou tahi ia te au, ma ke tūmau taku kupu ia te koutou. Oi fōki atu ai ho he mea lava e tatalo atu koutou ki ei.

Mataio 7:11

Kāfai la koutou, e ui lava e kino, kae e koutou iloa oi fōki nā mea lelei ma autou fānau, ka hē hili atu nei la te lahi o nā mea lelei ka fōki atu e te koutou Tamana i te lagi, ki nā tino e gogō atu ki a te ia!