Loma 9:4 - Tokelauan New Testament

⁴ Na filifilia ki lātou e te Atua ke fai ma ona tagata, ma fakakikila ki lātou ki tona mamalu; na ohi ana feagaiga ma ki lātou ma tuku atu ki ei nā Tūlāfono; kua iloa e ki lātou te faiga o nā tāpuakiga; kua maua e ki lātou nā folafolaga a te Atua;

Loma 9:4 Referans Kwoze

Efeho 2:12

I te taimi tēnā, ko hēki koutou iloa ai ia Keliho, ma nae hē taua koutou i loto o te faigāmālō o tagata o Ihalaelu, ma hē aofia i loto o nā feagaiga na folafola e te Atua ki a te ki lātou. Ko koutou nae ola i te lalolagi tēnei e aunoa ma he fakamoemoe ma aunoa ma te Atua.

Loma 9:6

E hē vēakē la ko te folafolaga a te Atua kua hē fakataunukua; auā e hē ko tagata uma na tupuga mai ia Ihalaelu ni tagata e o te Atua.

Gāluega 2:39

Auā ko te folafolaga a te Atua, na fai ki a te koutou ma autou fānau vēnā ki nā tino uma lele e nonofo mamao — ki lātou uma kua valakaugia e te Atua to tātou Aliki, ke ōake ki a te ia.”

Epelu 9:1

Ko te feagaiga muamua e i loto ai nā tūlāfono mo te faiga o nā tāpuakiga, vēnā ma te faiga o he mea ke fai ai nā tāpuakiga i te lalolagi.

Loma 8:15

Auā ko te Agaga tēia kua tuku atu e te Atua ki a te koutou, e hē ia faia koutou ma pologa, ma fai ma mea e mātataku ai koutou; kae ko te Agaga te kavea ai koutou ma fānau a te Atua, ma i te mana o te Agaga e kālalaga vē atu ai ki tātou ki te Atua, “Te Tamana, To mātou Tamana!”

Ioane 1:17

Ko nā Tūlāfono, na tuku mai e te Atua kui mai ia Mohe; kae ko te alofa tūnoa ma te meamoni, na kui mai ia Iehu Keliho.

Epelu 9:10

ona ko nā mea iēnei ni mea tau meakai, meainu, ma nā faiga kehekehe e mafai ai ia tagata ke fakamamāgia. Ko nā mea uma iēnei ni tūlāfono mo te kikila atu i fafo, e fakaaogā oioti ke pa ki te taimi e hui ai e te Atua i ni mea fou e hili atu te lelei.

Epelu 9:3

I tua atu o te kie pupuni tona lua, nae i ei ai te Falekie nae fakaigoa ko te Nofoaga e Hili te Paia.

Ioane 1:47

I te kitea atuga e Iehu ko Natanielu e hau ki a te ia, oi lea ai vēia, “Kikila, he Ihalaelu moni tēnei; he tino e hē mafai ke pepelo!”

Mataio 21:33

Kua lea atu ia Iehu, “Fakalogo mai ki tētahi talafakatuha. E i ei he tino na fano oi totō he tōvine e o ia. Kua ati fakatāmilo e ia he pa, ma keli he fātānoa ke tatau ai te vine, ma fau he fale ke leoleo ai te tōvine. Oi tuku ai e ia te tōvine ke lihi e ni nofolihi, kae fano i hana malaga ki hētahi atunuku.

Loma 3:2

E lahi, kāfai e kikila ki nā itū kehekehe. Muamua, na tuku e te Atua tana fekau ki nā tino Iutaia ke ki lātou taupaua.

2 Kolinito 11:22

Ni tino Epelu nei ki lātou? E vēnā foki au. Ni tino Ihalaelu nei ki lātou? E vēnā foki au. Ni lāpuna nei ki lātou e o Apelaamo? E vēnā foki au.

Kalatia 3:16

Kikila, na fai e te Atua nā folafolaga ki a Apelaamo ma ki tona lāpuna. E hē leamai te tuhituhiga paia, “nā lāpuna o ia”, ko tona uiga ni tino e tokalahi, kae e leamai “tona lāpuna”, ko tona uiga he tino e fokotahi, ko tona igoa ko Keliho.

Epelu 9:5

I luga o te Puha e i ei ai nā kēlupi (e fakailoa ai te fakatahi ki ei o te Atua), ma o lātou kapahau e falōlō ma pa lele ki luga o te mea e fakamāgalo ai nā agahala. Kae e hē ko tēnei te taimi e fakamālamalama manino atu ai nā mea uma iēnei.

Epelu 9:6

E vēnei la te fakatūlagaga o nā mea iēnei. Ko nā ohitāulaga e olo i aho uma ki loto o te Falekie pito ki fafo, mo te fakatinoga o nā tiute o ki lātou,