Loma 7:18 - Tokelauan New Testament

¹⁸ E iloa e au e hēai he mea lelei e nofo i loto ia te au — i toku natula fakatetagata. Auā e ui lava ko te loto naunau ke fai te mea e lelei e ia te au, kae e hē kō mafaia oi fai.

Loma 7:18 Referans Kwoze

Ioane 3:6

E fānanau e tagata ola a lātou fānau. Kae nā ko te Agaga oioti te ia mafaia oi hūia koutou, ke kavea ma fānau a te Atua.

Kalatia 5:17

Auā ko te mea e fofou ki ei to tātou natula fakatetagata, e teteke ki te mea e fofou ki ei te Agaga, ma ko nā mea e fofou ki ei te Agaga, e teteke ki ei to tātou natula fakatetagata. Ko nā mea iēnei e lua e fetekeaki tētahi ki tētahi, ma ko tona uiga e hē koutou mafaia oi fai he mea e fofou koutou ki ei.

Loma 7:25

Tātou fakafetai ki te Atua, tē e ia faia te mea tēnei e ala ia Iehu Keliho! Ko tēnei la te tūlaga e i ei au: ko au e tautua ki te Tūlāfono a te Atua i toku māfaufau oioti, kae e tautua toku natula fakatetagata ki te tūlāfono e iku ki te agahala.

Kalatia 5:24

Ma ko nā tino e ia Keliho Iehu, kua tāmate e ki lātou o lātou natula fakatetagata, fakatahi ai ma te nauloto ma nā tuinanauga.

Filipi 2:13

auā ko te Atua e galue pea lava i taimi uma i loto ia te koutou, ke mafai ai ke i ei outou loto ma uhitaki ki te mea e finagalo ia ki ei.

Tito 3:3

Auā ko ki tātou foki nae vālelea, hē uhitaki ma nae hehē. Ko ki tātou nae fai ma pologa ki manakoga ma tuinanauga kehekehe. Ko ki tātou nae ola i he ōlaga tau fakakino ma te fuā; nae inohia ki tātou e tagata ma nae inoino foki ki tātou ki a te ki lātou.

Loma 7:19

E hē kō faia te mea lelei e fofou au ki ei, kae e fai e au te mea kino e hē fofou au ke kō faia.

Loma 7:15

Ko au e hē mālamalama i aku mea e fai; auā e hē kō faia nā mea e fofou au ki ei, kae e fai e au nā mea e inoino au ki ei.

Mataio 15:19

Auā e hau mai te loto nā manatu kino e tupu ai te tāmate tino, te mulilua, ma iētahi uiga hē taupulea; te kaihohoa, te talapepelo, ma te fai tala fakakino.

1 Petelu 4:2

E kāmata atu nei la, ko te koutou ola koi totoe i te lalolagi nei, e tatau ke pūlea e nā mea e finagalo ki ei te Atua, kae hē ko nā manakoga fakatetagata.

Filipi 3:12

Ko au e hē lea atu kua maua e au te mea tēnei, pe ko au kua lelei kātoatoa. Kae ko au e tauivi lava ke kō maua te fakailoga. Ko tēnei tonu foki lava te māfuaaga na kavea ai au e Keliho Iehu ke fai mo ia.

Luka 11:13

Kāfai la koutou, e ui lava e kino kae e koutou iloa oi fōki nā mea lelei ma autou fānau, ka hē hili atu nei la te lahi o nā taimi ka uga ifo ai te Agaga Paia e te Tamana i te lagi, ki nā tino e gogō atu ki a te ia!”

Loma 13:14

Kae tātou hiki ake nā meatau a te Aliki ko Iehu Keliho, ma nahe ki tātou toe manatu ki nā uiga mātagā fakatetagata ma te fakamaliega o ona tuinanauga.

Loma 7:5

Auā i te taimi nae ola ai ki tātou e tuha ai ma o tātou natula fakatetagata, ko nā tuinanauga kino na fakaohofia e te Tūlāfono nae galue i loto o ki tātou, ke maua ai ni fua mo te oti.