Ioane 15:2 - Tokelauan New Testament

² Ko nā lālā uma ia te au e hē fua mai ai ni fua, e tipi kehe e ia, kae ko nā lālā e fua mai ai ni fua, e teuteu fakamamā e ia, ke ātili fua mai ai ni fua e lahi.

Ioane 15:2 Referans Kwoze

Mataio 3:10

I te taimi foki lava tēnei, ko te toki kua hāuni ke ta ki lalo nā lākau i nā aka; ko nā lākau uma e hē fua mai ai ni fua lelei, e ta ki lalo oi togi ki te afi.

Mataio 15:13

Ka kua tali mai ia Iehu, “Ko nā lākau uma e hēki totōa e toku Tamana i te lagi ka laga uma ki luga.

Fakaaliga 3:19

Ko nā tino e alofa au ki ei, e akoaki ma fakahala e au; koutou la ke mataala ma liliu kehe mai autou agahala.

Ioane 15:8

Ka fakaalia te mamalu o toku Tamana i te lahi o nā fua e fua mai ia te koutou; ma ko te mea ia e kavea ai koutou ma hoko o oku.

Mataio 13:12

Auā ko te tino kua i ei hana mea, ka toe fōki ki ei kae ke lava ai ma totoe mo ia; kae ko te tino e hēai hana mea, ka kave kehe mai ia te ia ke pa lava ki he tamā mea kua ia te ia.

Mataio 3:12

Kua i tona lima tana huō tuihaito ke lūlū kehe ai nā atigi haito, ma fakaputu nā fuāhaito ki loto o tona falehaito; kae ka huhunu e ia nā atigi haito i te afi e hē mafai ke mate.”

Mataio 21:19

Kua ia kitea atu he mati i tafa o te auala, oi fano ai ki ei; kae kua nā ko nā lau oioti te i ei. Oi lea vē ai ki te lākau, “Ko koe e hē toe fua lele.” I te taimi lava tēnā na mamago ai ma mate te mati.

Epelu 12:15

Tautuanā e hēai he tino e liliu kehe mai te alofa tūnoa o te Atua. Nahe i ei lele he tino e vē he lākau kona e tupu ake ma fai ma fakafītāuli ona ko tona kona.

Ioane 15:16

E hēki koutou filifilia au, kae na kō filifilia koutou ma tōfia ke olo ma fua mai ni fua e lahi, te itūkāigā fua e tūmau pea. Oi fōki atu ai e te Tamana ki a te koutou, ho he mea lava e gogō atu koutou ki ei, i toku igoa.

Luka 8:13

Ko nā fatu haito na lūlū ki luga o te kelekele fatufatua, e fakatuha ki nā tino e ki lātou lagona te kupu ma talia ma te fiafia. Kae e hēai ni o lātou aka; e talitonu oioti i he taimi pukupuku, kae pa mai loa te taimi o nā tofotofoga, e vave lele oi uma to lātou talitonu.

1 Ioane 2:19

Ko nā tino iēnei na oatu mai ia te ki tātou, kae e hē ni tino e o ki tātou; anei ake ni tino e o ki tātou, e vēnei ake koi nonofo fakatahi ma ki tātou. Kae na olo kehe kae ke manino ai e hēai he tino o ki lātou e hau mai ia te ki tātou.

Tito 2:14

Na ia tuku atua ia mo ki tātou, ke fakahao ai ki tātou mai nā mea kino uma, ma kavea ai ki tātou ma ona tagata, e mamā ma naunau ke fai nā mea e lelei.

1 Kolinito 13:1

Kāfai au e tautala i gagana a tagata ola ma agelu kae e hē ia te au te alofa, ko taku lāuga e hēai he mea e kehe ai ma te pakē o he lali pe ko te tatagi o he logo.

Loma 8:28

E iloa e ki tātou, i mea uma lele, ko te Atua e galue mo te lelei fakatahi ma ki lātou e alolofa ki a te ia, ki lātou kua kalagagia e ia e tuha ma te mea e fofou ia ki ei.

Ioane 17:12

Ka koi i ei au ma ki lātou, na puipui malu e au ki lātou i te mana o tō igoa, te igoa na kē tuku maia ki a te au. Na leoleo e au ki lātou, ma e hēki i ei he tino o ki lātou na galo, vaganā ai te tino na tonu lava e galo — kae ke taunuku ai te kupu i te tuhituhiga paia.

Mataio 13:33

Kua toe fai foki tētahi talafakatuha e Iehu ki a te ki lātou: “Ko te Mālō o te lagi e fakatuha vēnei. Na kave e he fafine ni fefete oi palu ki ni fuagā falaoa e tolu ke pa lava ki te taimi kua fefete uma ai te paluga kātoa.”

Mataio 7:19

Ma ko ho he lākau e hē fua mai ai ni fua lelei, e ta ki lalo oi togi ki te afi.

Mataio 25:29

Auā ko ho he tino e i ei hana mea, ka toe fakaopoopo ki ei ma ka lahi lele ai ma totoe mo ia; kae ko te tino e hēai hana mea, e pa lava ki te tamā mea a ia, ka kave kehe mai ia te ia.

Maleko 4:20

Ka ko iētahi tino, e vē ko nā fatu haito na lūlū ki luga o te kelekele lelei. E lagona e ki lātou te fekau oi talia ai e ki lātou ma fua mai ai nā fua: ko iētahi e taki tau toluhefulu, e taki tau onohefulu iētahi, ka ko iētahi e taki tau helau.”

Ioane 15:1

Kua toe vāgana atu ia Iehu, “Ko au ko te vine moni, ka ko toku Tamana ko te galue vine.

Ioane 15:3

Ko koutou kua uma te fakamamā i nā akoakoga kua tuku atu e au ki a te koutou.

Ioane 15:6

Ko nā tino e hē tūmau to lātou tahi ia te au, e togi kehe e vē ko he lālā ma mamago ai; ko nā lālā vēnei e fakaputu ma togi ki loto o te afi ma mu ai.

Loma 11:17

Ko iētahi o lālā o te ōlive e tauhi lelei, kua tagau kehe ma kua hohoko ki ei he lālā o te ōlive ola vale. Ko koutou tagata nukukehe e vē ko te ōlive ola vale, ma i te taimi nei kua maua fakatahi e koutou na fakamanuiaga ona ko koutou kua kavea ma vāega o te ōlive e tauhi lelei.

Loma 11:22

E ki tātou kiteagia i kinei te agalelei ma te fakahāuā o te Atua. E fakahāuā ki a te ki lātou kua pakukū ki te agahala, kae agalelei ki a te koutou — pe kāfai e tūmau pea koutou i tona alofa. Kae kāfai e hēai, ko koutou foki la ka tagau kehe.