Ioane 10:36 - Tokelauan New Testament

³⁶ Kae vē la ki a te au, ko te Tamana lava ia te na ia filifiliagia au, ma na ia uga maia au ki te lalolagi. E vēhea la ona lea koutou ko au e fāifāi ki te Atua ona ko au na lea atu, ‘Ko au ko te Ataliki o te Atua?’

Ioane 10:36 Referans Kwoze

Ioane 3:17

Auā e hēki uga maia e te Atua tona Ataliki ke fakamahino ia tagata o te lalolagi, kae na uga mai ke fakaola, e ala ia te ia.

Ioane 20:31

Kae kua tūhia nā mea iēnei kae ke talitonu ai koutou, ko Iehu ko te Mehia, te Ataliki o te Atua, ma e ala i te koutou fakatuatua kia te ia, ka maua ai e koutou te ola fakavavau.

Ioane 6:27

Koutou nahe gālulue mo nā meakai e pala; kae gālulue mo nā meakai e tūmau pea lava te lelei, ma e maua ai te ola e fakavavau. Ko nā meakai iēnei ka fōki atu ki a te koutou e te Ataliki o te Tagata, auā kua ia te ia te fakatagaga mai te Atua te Tamana.”

Loma 9:5

na tupuga mai ki lātou i nā tino Epelu takutakua, ma na tupuga mai ai foki ia Keliho. Ke vīkia te Atua tē e aoao tana pule, ke pa lava ki te hēgata. Amene.

Ioane 20:28

Kua tali atu ia Toma ki a te ia, “Toku Aliki ma toku Atua!”

Ioane 19:7

Kua tali mai nā tino Iutaia, “E tuha ai ma te mātou tūlāfono, ko te tagata tēnei e tatau tāmate, auā kua fai tana fakamatalaga ko ia ko te Ataliki o te Atua.”

Ioane 17:21

Ko au e tatalo ke mafai ki lātou uma ke tahi. Te Tamana, ke tahi ko ki lātou ke vē he tino e tahi, ma ke tahi ki lātou ma ki mātou e vē oi tahi koe ma au ma tahi au ma koe. Ke tahi ki lātou kae ke talitonu ai te lalolagi ko au na uga mai e koe.

Ioane 17:18

E uga atu e au ki lātou ki te lalolagi, e vē lava ona uga mai au e koe ki te lalolagi.

Ioane 17:8

Kua uma te tuku atu e au ki ei o te fekau na tuku mai e koe ki a te au, ma kua ki lātou taliagia; e iloa e ki lātou e hako ko au na hau mai ia te koe, ma talitonu ko koe te na uga maia au.

Ioane 6:69

Ko ki mātou kua talitonu ki a te koe, ma kua ki mātou iloa ko koe ko te Tokatahi Paia na hau mai te Atua.”

Ioane 6:57

Ko te Tamana te puna o te ola, tē na ia uga maia au, ma ko au e ola ona ko ia. E vēnā foki la ona ola ho he tino e kai ki toku kanofi, ona ko au.

Ioane 6:38

auā ko au e hēki fanaifo mai te lagi ke fai te mea e loto au ki ei, kae ke fakataunuku te finagalo o tē na ia uga maia au.

Ioane 5:30

“E hēai he mea e kō mafaia i haku pule tautahi; e kō fakamahinoa e vēia ona fakatonu mai ai au e te Atua. Ko taku fakamahinoga la e tonu, auā ko au e hē taumafai ke fai te mea e fofou au ki ei, ka ko te mea e fofou ki ei tē na ia uga maia au.

Ioane 3:34

Auā ko tē na uga mai e te Atua, e tautala i te kupu a te Atua, auā kua tuku atu kātoa ki ei, te Agaga o te Atua.

Luka 1:35

Ka kua tali mai te agelu, “Ka fanaifo te Agaga Paia ki ō luga, ma ko te mana o te Hilihilikehe ka fakamalumalu ifo ki ō luga. Ko te mea ia ka paia ai te tama ka fānau mai, ma ka takua ai ko te Ataliki o te Atua.

Mataio 27:43

E talitonu ki te Atua ma lea ko ia ko te Ataliki o te Atua. Tātou kikila la pe i na fofou te Atua ke fakaola ki a te ia i te taimi nei!”

Kalatia 4:4

Kae i te pa maiga o te taimi tonu na fuafuagia, oi uga mai ai e te Atua tona lava Ataliki. Na fānau mai i he fafine, ma na ola ake i lalo o nā Tūlāfono Iutaia,

Loma 8:3

Na fai e te Atua te mea e hēki mafai e te Tūlāfono, ona ko te vāivai o te natula fakatetagata. Na taku halagia e ia te agahala i te natula fakatetagata, i te uga maiga e ia o tona Ataliki, tēia na hau ma he natula agahala fakatetagata e vē foki lava ko ki tātou, ke fakauma ai te agahala.

Ioane 8:42

Oi lea atu ai ia Iehu ki ei, “Kāfai e hako ko te Atua ko te Tamana moni ia o koutou, e tatau la koutou ke alolofa mai ki a te au, auā ko au na hau mai te Atua, ma ko tēnei au kua i kinei. Ko au e hēki hau i haku pule, kae ko au na uga mai e ia.

Mataio 27:54

I te kiteaga e te takitakikau o te toka helau fakatahi ma nā fitafita nae ki lātou leoleoa ia Iehu, te mafuie ma iētahi mea na tutupu, oi na ofo lele ai ki lātou ma lea vē, “E hako lava, ko ia tēnei ko te Ataliki o te Atua.”

Ioane 10:35

E iloa e ki mātou ko te mea e lea mai ai te tuhituhiga paia e hē mafai ke toe kave keheagia; ma na tākua e te Atua nā tino na kaumaia tana kupu, ni atua.