Gāluega 16:23 - Tokelauan New Testament

²³ Kua uma te kini tīgāina o ki lāua, oi togi ai ki te falepuipui ma te fakatonuga ki te leoleo falepuipui, ke loka mau te toka lua.

Gāluega 16:23 Referans Kwoze

Fakaaliga 2:10

Koutou nahe mātataku i nā mea ka puapuagātia ai koutou. Kikila, e i ei nā tino o koutou ka togi e te Tiāpolo ki te falepuipui ke tofotofo ai koutou, ma e hefulu ia aho ka maua ai koutou i nā fakafītāuli. Koutou ke fakamāoni pea lava e tuha lava pe oti ai koutou, oi fōki atu ai e au ki a te koutou te ola, ke fai ma pale e fakailoa ai te koutou manumālō.

2 Timoteo 2:9

Ona e kō tālakia te Tala Lelei, kua maua ai au i nā puapuagā, ma noanoa i nā filifili ukamea e vē he tino holi tūlāfono. Kae ko te kupu a te Atua e hē noanoagia i ni filifili ukamea.

Filemoni 1:9

Kae ona ko au e alofa ki a te koe, ka hē kō fakatonua atu ai koe kae ko au ka fakatālohaga atu. E fai e au te mea tēnei e ui lava ko au ko Paulo, te hui o Keliho Iehu, ma i te taimi nei ko he pagotā ona ko toku tautua ki a Keliho.

Efeho 4:1

Ko au la, tē kua kavea ma pagotā ona ko au e tautua ki te Aliki, e fakatagi atu ki a te koutou: ola ko i he ōlaga e talafeagai ma te tāua o te kalaga kua kalagagia ai koutou e te Atua.

Efeho 3:1

Ona ko te mea tēnei, ko au ko Paulo, te pagotā a Keliho Iehu, e tatalo ki te Atua mo koutou tagata nukukehe.

Gāluega 16:36

Oi lea vē atu ai te leoleo falepuipui ki a Paulo, “Kua kaumai te fakatonuga a nā fakamahino ke tatala koulua ma Hila ke olo. Ōmai la keina olo i te fīlēmū.”

Gāluega 16:27

Kua teki ake ki luga te leoleo falepuipui, ma i te ia kiteaga ko nā faitotoka o te falepuipui kua mātalatala, na vē ake ai tona manatu ko nā pagotā kua hōhola kehe; oi na unu ake ai tana pelu ma tau pule ki tona ola.

Gāluega 12:18

I te aho alafaki, na matuā hē hāfia lava e nā leoleo i te falepuipui, pe ko he ā te kua tupu ki a Petelu.

Gāluega 12:4

Na uma te puke o Petelu, oi kave ai ki te falepuipui, ma tukulima atu ai ke leoleo e ni vāega fitafita tau toka fa. Na fuafua e Helota ke fai te fakamahinoga o Petelu i mua o tagata, kāfai e uma te Pāheka.

Gāluega 9:2

ma lea ki ei mo ni tuhi ke fakailoa atu ai ia ki nā hūnako i Tamaheko, kae ke ia pukea ai ho he tino e i loto o te maopoopoga e takua ko te Ala o te Aliki i kinā, ko taulelea ma fafine, ma fakafoki ki Ieluhalema.

Gāluega 8:3

Kae ko Haulo nae taumafai lava ke fakahēai te Ekalehia; na fano ki loto o nā fale o tagata takitahi ma toho ki fafo nā tino kua talitonu ki a Iehu, ko taulelea ma fafine, ma fakatonu ke kave oi togi ki te falepuipui.

Gāluega 5:23

“E pa atu ki mātou ki te falepuipui e loka mau te fale kātoa, ma ko nā faitotoka e kikila lelei e nā leoleo; kae tatala atu e ki mātou nā faitotoka kua hē i loto te kau apohitolo!”

Gāluega 5:18

ma na puke ai e ki lātou te kau apohitolo ma tuku ki te falepuipui.

Luka 21:12

Kae ko hēki tutupu nā mea uma iēnei, ko koutou ka puke ma fakahāuāgia; ka tuku atu koutou ke fakamahino i loto o nā hūnako, ma tuku ki loto o nā falepuipui; ka kave koutou ki mua o nā tupu ma nā kōvana, ona ko au.

Mataio 26:48

Oi fakatonu ai e te tino ka ia fakalatagia ia Iehu nā tino, kua lea vē atu ki a te ki lātou, “Ko te tino e hogi au ki ei ko ia tēnā e puke e koutou.”

Fakaaliga 1:9

Ko au ko Ioane, he uho ki a te koutou, ma ko he hoko e o Iehu. Ko au he hoa e o koutou, ma e talia ma te onohai e ki tātou nā puapuagā e maua ai nā tino e o ki lātou te Mālō. Ko au na kave ki te motu ko Patamo ona nae kō folafolagia te kupu a te Atua ma te meamoni na fakaalia e Iehu.

2 Kolinito 6:5

Ko ki mātou e kini, e falepuipui ma ogohia i te nunu fetunaki mai o tagata; e gālulue fītatā ma tau hē maua he moe, ma fia kakaia.

2 Kolinito 11:23

Ni kaukauna nei ki lātou e a Keliho? Ko au e vē he vale — kae ko au he kaukauna e hili lele atu ia te ki lātou! E hili atu toku galue mālohi, e lahi atu nā taimi nae i te falepuipui ai au, e lahi atu nā taimi na kini ai au, ma e lahi atu nā taimi na mea e mate ai au.