Epelu 2:11 - Tokelauan New Testament

¹¹ E fakamamā e ia ia tagata mai a lātou agahala, ma ko ia fakatahi ma ki lātou uma e fakamamāgia, e fokotahi lava to lātou Tamana. Ko te mea ia e hē mā ai ia Iehu oi takua ki lātou ni tino e o tona kaukāiga.

Epelu 2:11 Referans Kwoze

Epelu 10:14

Ko te tāulaga la tēnā e fokotahi, kua ia fakakātoatoa ai te lelei o ki lātou kua fakamamāgia mai te agahala, ke pa ki te fakavavau

Epelu 10:10

Ona na fai e Iehu Keliho te mea na fofou ki ei te Atua, kua fakamamāgia uma ai ki tātou mai te agahala, e ala i te tāulaga na ia ofo atu ai tona lava tino i te taimi lava tēnā e fokotahi, mo tagata uma.

Ioane 20:17

Kua vāgana atu ia Iehu ki a Malia “Koe nahe paki mai ki a te au, auā ko au ko hēki fanake ki toku Tamana. Kae fano ki nā uho o oku oi lea ki ei, ko au ka fanake ki toku Tamana ma te koutou Tamana, ki toku Atua ma te koutou Atua.”

Epelu 13:12

Ko Iehu foki na oti i fafo o te kakai, kae ke fakamamā ai ia agahala a tagata i tona toto.

Loma 8:29

Ko ki lātou kua uma te filifilia e te Atua, kua uma foki te tōfia e ia muamua ke kavea ke vē ko tona Ataliki, kae ke kavea ai te Ataliki e vē ko te ulumatua i he kau uho tokatahi.

Ioane 17:19

Ona ko ki lātou, e ofo kātoatoa atu ai au mo koe, kae ke mafai ai foki ke ofo kātoatoa atu ki lātou mo koe, ma te fakamāoni.

Ioane 17:21

Ko au e tatalo ke mafai ki lātou uma ke tahi. Te Tamana, ke tahi ko ki lātou ke vē he tino e tahi, ma ke tahi ki lātou ma ki mātou e vē oi tahi koe ma au ma tahi au ma koe. Ke tahi ki lātou kae ke talitonu ai te lalolagi ko au na uga mai e koe.

Mataio 25:40

Ma ka tali vē atu te Tupu ki ei, ‘E takutino atu e au ki a te koutou: ho he taimi lava na koutou faia ai te mea tēnei ki hētahi o ki lātou nei oku uho e pito hili te fakaalofa, na koutou faia te mea tēnā ki a te au!’

Epelu 2:14

Ona la ko nā fānau, e vē oi fakaigoa ai ki lātou e ia, ni tino e o te kanofi ma te toto, na ia faia ai ia ia lava, ke vē ko ki lātou. Na fai e ia te mea tēnei, kae ke kavea ai tona mate ma auala e fakatōkilalo ai te Tiāpolo, tē e pule ki te oti,

Kalatia 4:4

Kae i te pa maiga o te taimi tonu na fuafuagia, oi uga mai ai e te Atua tona lava Ataliki. Na fānau mai i he fafine, ma na ola ake i lalo o nā Tūlāfono Iutaia,

Gāluega 17:26

Mai te tamāloa e fokotahi, na ia faia ia tagata lanu kehekehe uma ke nonofo i te lalolagi kātoa. Ko ia lava te na ia fuafuagia muamua nā taimi ma nā gataaga o nā mea e nonofo ai ki lātou.

Epelu 11:16

Kae ko te nuku e mokomoko ki ei ko he nuku i te lagi e hili atu te lelei. Ma ko te Atua e hē mā ke takua ia e ki lātou ko to lātou Atua, auā kua uma te ia hāunia o he kakai mo ki lātou.

Maleko 8:38

Auā ko ai lava he tino i tēnei tupulaga hē talitonu ma te agahala, e mā ia te au ma aku akoakoga, ka vēnā foki oi mā te Ataliki o te Tagata i te tino tēnā, kāfai e hau i te mamalu o tona Tamana fakatahi ma te kau agelu paia.”

Mataio 28:10

Kua vāgana atu ia Iehu, “Koulua nahe mātataku. Olo oi lea ki oku uho ke olo ki Kalilaia, ma ka ki lātou kitea au i kinā.”

Gāluega 17:28

e vē oi lea ai hētahi tino, ‘E ala ia te ia, kua ola ma gāoioi ma tūmau ai pea ki tātou.’ E vē foki ko nā kupu a iētahi tino fatuholo o koutou, ‘Ko ki tātou uma ni fānau lava e a ia.’

Luka 9:26

Auā ko ai lava e mā ona ko au ma aku akoakoga, ka vēnā foki oi mā te Ataliki o te Tagata i te tino tēnā, kāfai e hau i tona mamalu ma i te mamalu o tona Tamana ma o te kau agelu paia.

Maleko 3:34

Kua fakaholo atu tana kikila ki nā tino e laupae mai i ona tafa, oi vē atu ai tana kupu, “Kikila, iēnei oku mātua ma oku uho!

Epelu 3:1

Te kau uho Kelihiano, koutou iēnā kua kalagagia foki e te Atua! Māfaufau ki a Iehu, tēia na uga mai e te Atua ke kavea ma Ulu Ohitāulaga ke fehoahoani ki nā mea uma e tālaki e ki tātou, ma e talitonu ki tātou ki ei.