1 Timoteo 3:16 - Tokelauan New Testament

¹⁶ Kua iloa uma lele e ki tātou, te uiga kehe o te mealilo e uiga ki to tātou talitonuga: Na hau ia i tona tino tagata, na fakamāonia te hako o ia e te Agaga, ma na kitea ia e agelu. Na tālaki e uiga ki a te ia ki nukukehe, na talitonu ki a te ia te lalolagi, ma na kavake ki te lagi e te Atua.

1 Timoteo 3:16 Referans Kwoze

Ioane 1:14

Na liu tino tagata te Kupu ma nae mau fakatahi ma ki mātou, ma tumu i te alofa tūnoa ma te fakamāoni. Na kikila ki mātou ki tona mamalu, te mamalu o te Ataliki e tokatahi o te Tamana.

Epelu 1:3

E kitea e ala i te Ataliki te uiga kehe o te mamalu o te Atua, ma e fōliga tutuha lelei lava ia ma te Atua, ma ko te mamana o tana kupu e tūmau ai pea nā mea i te lagi ma te lalolagi. I te kua uma o te fakamamāga e ia o agahala a te lalolagi, oi nofo ai ki lalo i te itū taumatau o te Tupu Hilihilikehe.

Maleko 16:19

Kua uma te vāgana atu o te Aliki ko Iehu ki a te ki lātou, oi hikitia ake ai ki te lagi ma nofo i te itū taumatau o te Atua.

Loma 16:25

Tātou tuku atu te vīkiga ki te Atua. E ia mafaia oi fakamautū te koutou fakatuatua, e tuha ai ma te Tala Lelei e kō tālakia e uiga Iehu Keliho, ma e tuha ai ma te fakailoa maiga o te meamoni lilo nae mumuni i nā tauhaga e lahi lele kua teka.

Luka 24:4

Oi tutū ai i kinā, kua hē ki lātou hāfia te uiga o te mea tēnei, kae nā lava e teki ni tamāloa e toka lua kua tutū i o lātou tafa, ma ko o lā kofu e huhulu pupula.

Kolohe 1:23

Ko koutou la e tatau ke tūmau i te fakavae o te koutou fakatuatua, ma ke nahe māluelue lele mai te fakamoemoe na maua e koutou i te koutou lagonaga o te Tala Lelei. E mo te Tala Lelei tēnei kua kavea ai ia au tēnei ko Paulo, ma kaukauna — te Tala Lelei tēia kua folafola ki tagata uma o te lalolagi.

1 Ioane 1:2

I te fakailoa maiga o te ola tēnei, na kitea e ki mātou; ko ki mātou la e molimau ki te mea na kikila ki mātou ki ei, ma fakailoa atu ki a te koutou e uiga ki te ola e hē gata nae i ei ma te Tamana, ma na fakailoa mai ki a te ki mātou.

1 Petelu 3:22

tēia kua fano ki te lagi ma e i te itū taumatau o te Atua, ma e pule ia i agelu uma, taupulega ma mālohiaga uma i te lagi.

1 Petelu 1:12

Na fakailoa e te Atua ki nā pelofeta iēnei, ko te gāluega a ki lātou e mo koutou kae hē mo ki lātou lava. Na fakailoa atu e ki lātou nā mea kua koutou iloa i te taimi nei mai nā kavefekau na ki lātou folafolagia te Tala Lelei, e ala i te mana o te Agaga Paia na uga ifo mai te lagi. Ke pa lava ki nā agelu, e fia ki lātou iloa lele nā mea iēnei.

Kolohe 2:2

E fai e au te mea tēnei kae ke fakatumulia ai ki lātou i te loto mākeke ma fuhia fakatahi i te alofa, ma lahi ai te mautinoa o ki lātou e ala i to lātou mālamalama e uiga ki te mealilo a te Atua, ko Keliho tēnā.

Kolohe 1:27

Ko te fuafuaga a te Atua, ke fakailoa atu tana mealilo ki ona tagata, te mealilo e vē he koloa tāua ma te gali, mo mālō uma. Ma ko te mealilo la, ko Keliho e i loto ia te koutou, ko tona uiga, ka i ei fakatahi koutou i te mamalu o te Atua.

Kolohe 1:6

E kaumai pea lava e te Tala Lelei nā fakamanuiaga, ma e halalau ki te lalolagi kātoa, e vē foki lava ko te mea na pa koutou ki ei, talu mai te aho muamua na koutou lagona ai e uiga ki te alofa tūnoa o te Atua, ma iloa lelei ai e koutou tona uiga moni.

Luka 22:43

Oi fakakitea ai he agelu mai te lagi ki a Iehu, ma fakamākeke ki a te ia.

Mataio 3:16

Na uma loa te papatiho o Iehu, oi fanake loa ki luga mai te vai. I te taimi lava tēnā na māvā ai te lagi, ma na ia kitea atu te Agaga o te Atua kua fanaifo ki lalo e vē he lupe, ma tū ki ona luga;

1 Ioane 3:5

E iloa e koutou ko Keliho na hau ke kave kehe nā agahala, ma e hēai lele hana agahala.

Epelu 12:2

ma kikila pea ki a Iehu, tē na ia kamatagia ma fakakātoatoagia to tātou fakatuatua mai te kāmataga ki te ikuga. E hēki fakavāivai lele ia Iehu ona ko te hātaulo. Kae ona ko te fiafia e fakatalitali mo ia, e hēki popole lele ai ki te tūlaga takuvalea o te mate i luga o te hātaulo, ma i te taimi nei la, kua nofo i te itū taumatau o te nofoāliki o te Atua.

1 Timoteo 3:9

e tatau ki lātou ke pipiki mau ki te meamoni kua fakaalia e uiga ki te talitonuga, ma te lotofuatia e mamā.

Ioane 20:12

ma na ia kitea atu ai ni agelu e toka lua e kofu papae, e nonofo mai i te mea nae i ei ai te tino o Iehu, ko tētahi i nā fogāulu ma tētahi i nā vae.

Mataio 1:23

“Ka to he taupou ma fānau mai e ia he tama, ka fakaigoa e ki lātou ki a Emanuelu” (ko tona uiga “Ko te Atua e fakatahi ma ki tātou”).

Fakaaliga 7:9

Kua uma atu te mea tēnei, oi kō kitea atu ai he kaifenua e tokalahi — e hē mafai ke faitau e he tino te tokalahi! Na ōmamai mai lanu uma, nuku uma, mālō uma ma gagana uma, ma e tutū i mua o te nofoāliki ma te Punuamāmoe. E kokofu papae ma tāofi nā laupama i o lātou lima.

1 Petelu 1:20

Na filifilia ia e te Atua ka ko hēki gaohia te lalolagi, ma na fātoā haele mai i nā toe aho iēnei, ke fehoahoani ki a te koutou.

Epelu 7:7

E mautinoa lelei lava, e hili atu te tāua o te tino e ia faia te fakamanuiaga i lo te tino e fakamanuia.

Efeho 6:19

Tatalo foki mo oku, ke tuku mai e te Atua ki a te au he fekau kāfai au kua lava hāuni ke tautala, kae ke tautala ai au e aunoa ma he mataku, ke fakailoa ki tagata te mea lilo e uiga ki te Tala Lelei.

Efeho 1:9

na fakatino ai e te Atua te mea na fofou ia ke fai, ma fakailoa mai ki a te ki tātou tana fuafuaga lilo kua uma te tonu ia te ia ke fakataunuku e ala ia Keliho.

Kalatia 4:4

Kae i te pa maiga o te taimi tonu na fuafuagia, oi uga mai ai e te Atua tona lava Ataliki. Na fānau mai i he fafine, ma na ola ake i lalo o nā Tūlāfono Iutaia,

1 Kolinito 15:47

Ko te uluaki Atamu na gaohia i te kelekele, na hau mai te kelekele; ko te lua o Atamu na fanaifo mai te lagi.

1 Kolinito 2:7

Ko te poto e folafola e ki mātou ko te poto lilo o te Atua tē e mumuni mai tagata, kae kua uma te ia filifilia ke maua ai e ki tātou ni vīkiga, ka ko hēki faia te lalolagi.

Loma 10:18

Kae ko au la e fehili: E moni nei ko hēki fakalogo ki lātou ki te fekau? Ko te meamoni, kua lagona e ki lātou — auā e lea mai te tuhituhiga paia: “Ko o lātou leo kua halalau ki te lalolagi kātoa; ko a lātou kupu kua pa ki nā pito uma o te lalolagi.”

Gāluega 20:28

Ko te mea ia, koutou ke mataala ma kikila lelei te lafu māmoe kua tuku atu e te Agaga Paia ke kikila e koutou. Ke kavea koutou ma leoleomāmoe o te Ekalehia a te Atua, tēia kua ia kavea ke fai mo ia, e ala i te toto o tona Ataliki.

Kalatia 2:8

Auā ko te mana o te Atua te na kavea ai au ma apohitolo mo tagata nukukehe, e vē foki lava ona kavea ia Petelu ma apohitolo mo tagata Iutaia.

Loma 9:5

na tupuga mai ki lātou i nā tino Epelu takutakua, ma na tupuga mai ai foki ia Keliho. Ke vīkia te Atua tē e aoao tana pule, ke pa lava ki te hēgata. Amene.

Gāluega 10:34

Ma na kāmata ai oi tautala vēnei atu ia Petelu: “Kua mautinoa e au i te taimi nei ko te Atua e hē fakapito ki he tino.

Loma 8:3

Na fai e te Atua te mea e hēki mafai e te Tūlāfono, ona ko te vāivai o te natula fakatetagata. Na taku halagia e ia te agahala i te natula fakatetagata, i te uga maiga e ia o tona Ataliki, tēia na hau ma he natula agahala fakatetagata e vē foki lava ko ki tātou, ke fakauma ai te agahala.

Gāluega 14:27

Kua pa atu ki lāua ki Anitioka, oi fakapotopoto ai e ki lāua ia tagata o te Ekalehia, ma fakamatala ai ki ei nā mea na fai e te Atua ki a te ki lāua, ma te auala na ia hāuniagia ke mafai ai ia tagata nukukehe ke talitonu.

Ioane 16:28

Ko au na hau mai te Tamana ki te lalolagi; ma i te taimi nei, ka kō tukua te lalolagi kae fano ki te Tamana.”

Ioane 13:3

Kua uma ai te iloa e Iehu ko te pule kātoa kua tuku ake e te Tamana ki a te ia, ma ko ia na hau mai te Atua ma e toe fano foki lava ki te Atua,

Luka 24:51

Ka koi fakamanuia atu e ia ki lātou, oi fano kehe ai, kua hikitia ake ki te lagi.

Fakaaliga 17:7

Kua fehili mai te agelu ki a te au, “He ā te ofo ai koe? Ka kō fakamālamalama atua la ki a te koe te uiga lilo o te fafine ma te manu fekai tēia e tiketike ai, te manu fekai e fitu ona ulu ma hefulu ona nifo hua.

Fakaaliga 17:5

I tona muāulu e tuhi ai he igoa e hē iloa e iētahi tino te uiga, e vēnei: “Te kakai takutakua ko Papelona, te mātua o fafine talitāne uma, ma tē e tutupu mai ai ia āmio mātagā uma i te lalolagi.”

Epelu 8:1

Ko te uiga moni o te mea e lea atu ai ki mātou, e i ei to tātou Ulu Ohitāulaga, e nofo i te itū taumatau o te nofoāliki o te Atua i te lagi.

2 Tehalonia 2:7

Ko te mālohiaga fakalilolilo o te Tino Kino kua kāmata oi galue, kae ko te mea e tuku e tutupu ka hē mafai lele ke tutupu, heiloga e kave kehe muamua e te Atua te tino e ia tāofiofiagia.

2 Tehalonia 1:10

i te Aho e hau ai ke kavatu ki ei nā vīkiga mai tagata uma o ia, ma fakaeke atu ki ei te mamalu mai ia te ki lātou uma kua talitonu. Ko koutou foki ka i ei fakatahi ma ki lātou, ona ko koutou kua talitonu ki te fekau na lea atu ai ki mātou.

Gāluega 1:19

Na fakalogo ki ei nā tino uma nae nonofo i Ieluhalema, oi fakaigoa ai e ki lātou te fenua tēnā i te lātou gagana, ko Akeletama, ko tona uiga, “Fenua o te Toto”.)

Ioane 17:5

Te Tamana, fakailoa ko i te taimi nei e ala i tō fakatahi ma au, toku mamalu, te mamalu nae ia te au fakatahi ma koe, ka ko hēki faia te lalolagi.

Ioane 15:26

“Ka hau te Fehoahoani — ko te Agaga, e ia fakaalia te meamoni e uiga ki te Atua, ma e hau mai te Tamana. Ka uga atu e au te Agaga ki a te koutou mai te Tamana, ma ka molimau ia e uiga ki a te au.

Ioane 6:62

E vēhea nei la kāfai kua koutou kitea atu te Ataliki o te Tagata, kua toe fanake ki luga ki te mea nae i ei ai muamua?

Luka 2:32

He mālamalama ke fakakitea ai tō finagalo ki tagata nukukehe, ma maua ai he vīkiga mo ō tagata Ihalaelu.”

Maleko 16:5

Oi ulu atu ai ki lātou ki loto o te tugamau ma ki lātou kitea atu he taumalo e nofo mai i te itū taumatau, e kofu i he kofu tatao paepae loloa e pa ki ona tapuvae; oi na mātataku lele ai ki lātou.

Maleko 1:13

Oi nofo ai i te vao i nā aho e fagafulu, ma fakaohooho ai e Hātani. Nae i ei foki nā manu fēkakai i kinā, ka ko Iehu nae tauhi e nā agelu.

Mataio 28:2

Kae teki lava kua to te mafuie lahi; kua fanaifo he agelu a te Aliki mai te lagi, kua fēke kehe te fatupae ma nofo ai i luga.

Mataio 13:11

Kua tali mai ia Iehu, “Kua uma te fakailoa atu ki a te koutou nā mealilo i te Mālō o te lagi, kae ko hēki fakailoa ki iētahi tino.

Mataio 4:11

Oi fano kehe ai te Tiāpolo, kae kua ōmamai nā agelu oi fehoahoani ki a Iehu.

1 Petelu 3:18

Auā ko Keliho na mate fakafokotahi oioti lava mo nā agahala, he tino āmiotonu na fai ma hui o nā tino hē āmiotonu, kae ke takitakia ai koutou ki te Atua. Na tāmate i tona tino tagata, kae na fakaola i te fakateagaga,

Loma 10:12

Ko te mea tēnei e aofia ai ia tagata uma, auā e hēai he mea e kehekehe ai ia tagata Iutaia ma tagata nukukehe; ko te Atua ko te Aliki ia e tahi o tagata uma, ma e ia kavatua nā fakamanuiaga e lahi mo ki lātou uma e kālalaga atu ki a te ia.

Loma 3:4

Hēai, e hē vēnā! E ui lava ko tagata uma lele e talapepelo, ka ko te Atua lava ia e fakamāoni, e vē oi lea mai ai te tuhituhiga paia, “E tatau ke kitea te hako o au kupu; e tatau ke mālō koe kāfai e fai hō fakamahinoga.”

Loma 16:26

Kae nei, kua fakailoa te meamoni ki te lalolagi kātoa e ala i nā tuhituhiga a te kau pelofeta; ma e tuha ai ma te fakatonuga a te Atua e fakavavau, ke mafai ai ia tagata nukukehe uma ke talitonu ma uhitaki ki te Atua.

2 Kolinito 1:19

Auā ko Iehu Keliho, te Ataliki o te Atua, tē nae folafola atu ki a te koutou e ki mātou — e au vēnā ma Hila ma Timoteo, e hē ko he tino e “Io” ma “Hēai” i te taimi e fokotahi, kae e “Io” i taimi uma lava;

1 Petelu 1:21

Ona ko nā mea kua koutou iloa e uiga ki a Keliho, kua talitonu ai koutou ki te Atua tē na ia fakatūa ia Keliho mai te oti, ma tuku atua ki a te ia te mamalu; ko te mea ia kua mautū ai te koutou fakatuatua ma te fakamoemoe ki te Atua.

1 Ioane 3:8

Ko ai lava e ia faia pea lava te agahala, ko ia tēnā e o te Tiāpolo, auā ko te Tiāpolo na agahala mai lava i te kāmataga. Ko tēnei tonu lava te mea na hula mai ai te Ataliki o te Atua, ke fakahēaogā nā gāluega a te Tiāpolo.

Luka 20:44

Ko Tavita lava ia te na lea ko te Mehia ko te ‘Aliki’; e vēhea la ona kavea he lāpuna o Tavita ma Mehia?”