Wahyu 14:4 - En Taar Weru a nunuwu' é Tontemboan

⁴ Séra itu sé tou menonou le'nas, tanuoka sé tuama si ra'ipé' kawisa tumekel ang karapi é wéwéné ampa'paan séra miara ing kale'nasan. Sé tou itu uli-ulit makiit si Toyaang i Domba am bisa-wisake' en angéan-Na. Séra itu sé tinu'buso an uner é tou e mamuali raragés kataré a si Amang Kasuruan wo a si Toyaang i Domba.

Wahyu 14:4 Referans Kwoze

Wahyu 3:4

Taan an Sardis awéané' sé tou sé ra'ica kumotor ing karai éra. Séra maya' oka mewali-wali wo Yaku mekarai ing karai kulo', ampa'paan séra patus tumerima in itu.

2 Korintus 11:2

Kamu icae'bowku tanuoka si Amang Kasuruan manganat icamu. Kamu tanuoka si esa mangala'un si ra'ipé' sumangkum ako tumekel ang karapi i tuama, si aijanjikuo icawéng wo si esa tuama, siao si Kristus.

Yakobus 1:18

Kita niéma'-Na mamuali toya-toyaang-Na ang karapi in Taar wutul kumiit ing kasalé'an-Na. En itu icasalé'-Na wosama' kita mamuali wuéna kataré-taré asé im pakasa sé niéma'-Na.

Wahyu 5:9

Wo séra kumantar esa kakantaren weru tana'i: “Icoo em patus tumerima ing gulungan kitap itu, wo muka' in ségél-ségélna. Ampa'paan Ko sumangkumo pinaté, wo ang karapi in enda'-Mu, tinu'bus-Muo séra torona i Amang Kasuruan, séra itu mai am pakasa in suku, i nunuwu', i negara wo im bangsa.

Yohanes 12:26

Si séike' en sumelewir Yaku musti kumiit Yaku. Wo am bisake' en angéan-Ku, am bitu ka'i awéan si maselewir Yaku. Si séi e maselewir Yaku sia siriin oka i Amang-Ku.”

Yohanes 10:27

En suara-Ku pengalingan é domba-Ku. Katuusan-Ku séra wo séra kumiit Yaku.

Wahyu 17:14

Séra merang oka en sumundur si Toyaang i Domba, taan si Toyaang i Domba ra'- ica kinakalaan éra, ampa'paan Sia Tuang am pakasa é tuang, wo Kolano am pakasa é kolano. Si Toyaang i Domba itu mewali-wali wo sé tou sé tinowao, sé sinisiro wo sé le'tek ai Sia, muntung oka.

1 Korintus 6:20

Ampa'paan kamu tinelesano i Amang Kasuruan ang kerapi in sosor em bééna siituo en enda' i Kristus. Ampa'paan ituo pakéno sumama-sama' en owak iow e rumayo wo sumiri' si Amang Kasuruan.

Yohanes 8:12

Kekawus in itu, icua i Yesus sumawel a sé tou keli in tana'i, “Yakuo en sendot ing kayo'baan. Si séi eng kumiit Yaku, sia itu ra'io menonou ang kariréimbengan, taan sia menonou an sendot si méma' isia menonou akar ing kauré-uré.”

1 Petrus 2:9

Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

Efesus 1:14

E Roh Le'nas ituo e imamuali jaminanta sapaoka ulit terimanta oka waya sé aijanjio i Amang Kasuruan a sé tou-Na. An tutuw itu iwekar-Na oka kita asé pakasa ing kaléwo'an ing kayo'baan anio'. Anaé, mayoo irayota si Amang Kasuruan ampa'paan ing kawangko'-Na.

1 Korintus 16:15

Poo-poow, tantu katuusano miow si Stefanus wo sé pamaléna. Séra itu, sé tou kataré-taré mape'dis wo maémano a si Yesus an Akhaya. Wo séra imééo in owak an tawoien en sumelewir sé tou le'nas.

Kisah Para Rasul 20:28

Ampa'paan in ituo, musti téiran iow sumama-sama' en owak iow in esa wo sé jamaat si aiwéé i Roh Le'nas en téiran iow. Téiran iow sé jamaat i Amang Kasuruan tanu si gembala matéir sé domba-Na. Sé jamaat itu mamuali anu i Amang Kasuruan ampa'paan linowir-Na séra in enda'-Na in esa.

Yohanes 13:37

Icua i Petrus a si Yesus, “Tuang, kéitu réén aku ra'ipé' makawoo kumiit si Tuang intarépé'? Icasalé'ku maangé ang karapi-Mu mandé ka'i aku patén ampa'paan makiit Ico.”

Matius 25:1

“Eng Kakolanoan in Sorga meputé wo in andéan anio': awéan sangapulu' mangala'un mindo in sosoloan mangé sumungkul si tuama kumawéng.

Matius 8:19

Wo mai si makailek wutul in Torat wo kumua a si Yesus, “Guru, yaku kumiit oka si Guru, am bisake' en angéan i Guru.”

1 Timotius 4:3

Pengasusui éra a sé tou ra'ica toro kumawéng, wo ra'ica toro ka'i kuman sé piraan kakanen sé ra'ica toro kanen. En ulitna pakasa eng kakanen niéma'o i Amang Kasuruan ro'na kanen. Wo sé tou maéman sé makaileko in sususuien wutul, sa séra kuman, kumua owo mangé makapulu'sama' a si Amang Kasuruan wo ro'nao kuman.

1 Korintus 7:28

Taan sa si tuama masalé' kumawéng, en itu ra'ica meséa'. Taniitu ka'i, sa si mangala'un masalé' kumawéng, en itu ra'ica meséa'. Taan sé tou icumawéngo, mendam oka ing keli kawenduan ang katouanna. Si icasalé'ku woo wosama' kamu ra'ica mamendam ing kawenduan itu.

Matius 19:12

Awéan tou ra'ica icakawéng ampa'paan ketounake' mai tanuo siitu. Awéan ka'i ra'ica icakawéng ampa'paan niéma' é tou walina akar mamuali tanu siitu. Awéan ka'i sé ra'ica icumawéng ampa'paan kasalé'anna in esa, wosama' séra ro'na maké in témpo éra en sumelewir si Amang Kasuruan. Si tou makawoo tumerima in sususuien-Ku anio', lébé loor terimana en itu.”

Efesus 5:27

wosama' séra ro'na wéan-Na tampa an dior-Na tanu jamaat sé iparangka-rangka', ra'ica wana kaséaan kuma'pa icumeleso kuma'pa si kaputé in itu. Sé jamaat itu mamuali oka le'nas wo ra'ica wana e ro'na méé kaséaan.

Ibrani 12:23

Kamu imayo ka'i am paumungan é toyaang luluna i Amang Kasuruan, e ngaran éra aipatico an sorga. Wo kamu meta'up ka'i wo si Amang Kasuruan, si maakim waya sé tou, wo meta'up ka'i wo sé roh é tou sé nianggap wutul i Amang Kasuruan, sé niéma'o makaleke-lekep.

Wahyu 21:22

Ra'io kaséréanku mai em Balé Le'nas an untep ing kota itu, ampa'paan em Balé Le'nas ituo si Amang Kasuruan in esa, si Casuruan Si Makakawasa wo ka'i si Toyaang i Domba itu.

Wahyu 21:23

Eng kota itu ra'io ka'i maperlu si yéndo wo si serap en sumendot, ampa'paan si Amang Kasuruan si wuta in darayo wo in sisiri', iméé mai in sendot, wo si Toyaang i Domba ituo en sosoloanna.