Matius 10:5 - En Taar Weru a nunuwu' é Tontemboan

⁵ Yutus i Yesus sé sangapulu' rua murit-Na itu wo itaar-Na ai séra, “Tioo kamu mangé am paento'an é tou ra'ica Yahudi kuma'pa muntep ang kota é tou Samaria.

Matius 10:5 Referans Kwoze

Yohanes 4:9

Isowat i wéwéné Samaria itu ai Sia, “Ra'ica patus si Tuang mangilek elepen a yaku. Si Tuang tou Yahudi wo yaku tou Samaria, kéitu réén si Tuang mangilek elepen a yaku?” (Icuana in taniitu ampa'paan sé tou Yahudi ra'ica mengakarapi wo sé tou Samaria).

1 Tesalonika 2:16

Séra itu rumaméji mengala-ngala' icami wosama' kami ra'ica toro kumua in taar i Amang Kasuruan a sé tou ra'ica Yahudi, émaan éra sé tou itu ra'ica malowir. Wo in taniitu eng kamesé-meséaan éra mengawe-ngaweso akar ra'io icakua. Wo intarépé' eng kae'bowan i Amang Kasuruan itumenao iséra.

Lukas 17:16

An tutuw sia icateka'o mangé a si Yesus wo sia kumundu an dior ing kécéi-Na wo méé i makapulu'sama' ai Sia. Si tou itu, tou Samaria.

Kisah Para Rasul 10:45

Am bitu awéan ka'i sé tou sinunato sé maéman a si Yesus sé icumiitai si Petrus an Yope owo. Séra mangaya-ngaya'ka' an tutuw séra suméré si Amang Kasuruan tumambérai i Roh Le'nas a sé tou ra'ica Yahudi.

Lukas 9:2

Kumawus angé in itu, yutus-Na séra mangé kumua in abar andumoro' i Amang Kasuruan Kumawasa tanu Kolano wo ka'i sumama' sé tou sumakit.

Kisah Para Rasul 1:8

Taan an tutuw i Roh Le'nas tumumpa mai ai camu, kamu makéré oka kawasa. Wo kamu mamuali oka sairi andumoro' Yaku an Yerusalem, am pakasa in Yudea wo an Samaria wo akar an tempok ing kayo'baan.”

Yohanes 20:21

Wo icua-Na sumawel ai séra, “Eng kaeluran mewali-wali wo icamu! Yaku ayutuso mai i Amang-Ku ang kayo'baan, taniituo ka'i camu, yutus-Ku mangé am bisa-wisa ang kayo'baan anio'.”

Yohanes 7:35

Ampa'paano in itu, sé kikiiten é tou Yahudi mengkung-kuanan, “Am bisa réén en angéan-Na akar kita ra'io ka'i meta'up wo Sia? Awéan réén em basa-Na i maangé a sé tou Yahudi sé imanangkéi an sangkum é tou Yunani? Masalé' réén Sia sumusui a sé tou Yunani?

Yohanes 4:5

Wo Sia icateka' an esa kota an sangkum in Samaria, e ngaran ing kota itu Sikhar. Eng kota itu mentawian wo en tana' si aiwéé i Yakub indior a si toyaangna Yusuf.

Lukas 10:33

Taan awéan esa tou Samaria mawaya' lumangkoi am bitu. An tutuw sérénna si tou rinampok itu, mai eng kaupusanna a si tou itu.

Matius 4:15

“En tana' Zebulon wo en tana' Naftali, an tembir in lour Galilea, an lewet in doyongan Yordan, en tampa itu paento'an é bangsa ra'ica Yahudi.

Yohanes 8:48

Wo isowat é kikiiten é agama Yahudi a si Yesus, “Wutul em pakua ami anio', Ico tou Samaria wo rinasuko i sétang.”

Yohanes 4:20

Sé apo-apo' ami tou Samaria, indior mengaapo' a si Amang Kasuruan am bawo ing kuntung anio', taan ipakua é tou Yahudi an Yerusalemke' en tampa é tou mengaapo' a si Amang Kasuruan.”

Lukas 10:1

Kumawus in itu, si Yesus sumisir ka'i pitu ngapulu' murit walina. Wo yutus-Na séra e rumior ai Sia mangé marua-rua tou ang kota-kota wo an tampa-tampa en angéan-Na sa.

Matius 22:3

An tutuw em pésta itu tumo'tolo, iru'du'na sé atana en tumowa sé tou sé nienotnao wosama' lumilio mai am pésta itu. Taan sé tou itu ra'ica kiim lumili mai.

Markus 6:7

Towan-Na sé sangapulu' rua murit-Na wo yutus-Na séra mangé marua-rua tou en sumusui a sé tou a mangé mbitu. Wéan-Na ka'i kawasa séra e musér sé roh léwo'.

Lukas 9:1

Tinowa i Yesus sé sangapulu' rua murit-Na wo wéan-Na ing kaketeran wo ing kawasa ai séra wosama' ro'na musér sé roh léwo' wo sumama' in saki-sakit é tou.

Yohanes 17:18

Tanu Si Amang imutuso mai Yaku ang kayo'baan, taniitu ka'i Aku mutus iséra ang kayo'baan.