Kolose 3:8 - En Taar Weru a nunuwu' é Tontemboan

⁸ Taan intarépé', tiya'o waya sé kasalé-salé'an léwo' anio' ang katouan iow, menge'bo-nge'bow, mae'bow akar ing karangoan, mawasa-wasa in léwo' a sé tou walina, mengawuruk i ngaran é tou wo mawa'ba', en itu tioo kumesot am ba'ba' miow.

Kolose 3:8 Referans Kwoze

Efesus 4:29

Tioo awéan nunuwu' sé ra'ica loor kumesot am ba'ba' miow. Taan manuwu'o mangé i nunuwu' sé loor eng kumeter in até é tou walina an tutuw im paperlun éra. E nunuwu' tanu siitu méé oka ing kamang a sé tou sé mengalinga in itu.

Efesus 4:22

Ampa'paan in ituo tela'uo mio' em peri ing katouan uré. Eng katouan uré tanu siitu ra'ica loor, ampa'paan makiitke' ing kasalé'an in owak sé ra'ica wutul si mengasélé'kow icamu wo luméwo' ing katouan iow.

Efesus 5:4

Tioo ka'i awéan ai camu makua sé nunuwu' kotor, sé nunuwu' ra'ica wana torona kuma'pa sé nunuwu' ra'ica masoma. En itu ra'ica patus pengakua miow. Taan aweso taré kamu mengakuao mangé i makapulu'sama' a si Amang Kasuruan.

Kolose 3:5

Ampa'paano in itu tiya'o waya eng kasalé-salé'an in owak ang katouan iow, tanumai, mabersina, najis, kasalé'an in owak andumoro' in cabul, kasalé'an léwo', longi' am baya-waya si ro'na ipeputé wo i mengaapo' a sé opo-opo'.

Efesus 4:26

Sa kamu mae'bow, tioo mengaéma' ing kamesé-meséaan. Tioo eng kae'bowan itu yéma' miow akar i muntep si yéndo,

Ibrani 12:1

Tumo'tolke' mai indior, keli en tou sé imamuali sairi im paémanen éra torona icita. Kita pakali'ciren é tou keli itu tanuoka ing kambung makali'cir icita. Ampa'paan in ituo mayoo tiya'ta waya em pamuléngen wo ing kamesé-meséaan si makaléngkété' ai cita, wo kasake' talesen am pekowaan si pakasarunta.

Kolose 3:9

Tioo kamu mengatowo a si esa wo si esa, ampa'paan eng katouan uré wo em peri uré itu aitela'uo miow.

1 Petrus 2:1

Ampa'paan in ituo kamu ra'io toro mengéma-ngéma' pakasa ing kaléwo'an, pakasa sé mengauwak, pakasa sé punek, menii-niim ing kasuutan wo mengaléwo' i ngaran é tou walina.

2 Korintus 12:20

Em ipaindé-indé'ku sapaoka an tutuw aku maai ai camu kéréanku kamu ra'ica tanu im pinaarapku, wo kaséréan iow ka'i aku ra'ica tanu si paarapen iow. Ipaindé-indé'ku oréoka awéan sé mengindo-indoan roma', mengkanatan, mengkae'bowan, mengawerotke' in owakna in esa, mengaroros, memaa-maar a sé tou andumoro' sé raica wutul, mengatirayo wo mengalicoko.

1 Korintus 3:3

ampa'paan akar intarépé' kamu makiité' im pakawerot ing kayo'baan. Icuaku in taniitu, ampa'paan an uner iow awéané' sé kokanat wo meindo-indoan roma'. En itu mamuali tuus sapaoka kamu makiité' im pakawerot ing kayo'baan wo menonou asalo makiit ing kasalé'an in tou.

Matius 5:22

Taan icua-Ku ai camu, si séi si mae'bow a si poowna musti ukumen. Wo si séi e mengawa'ba' si poowna, musti isaru' an dior é Mahkamah Agama. Wo si séi ka'i e makua si poowna bodok, sia patus itiya' an api ra'ica mape'de-pe'del.

Galatia 5:15

Taan kamu ra'ica toro tanuoka sé binatang mengkang-karétan wo menlo'-lo'motan. Mareti-retio wosama' kamu ra'ica mempatéan.

Roma 13:13

Mayoo kita menonou in loor, tanu sé tou menonou ang kasendotan. Tioo mengéma-ngéma' ing kasalé-salé'an ing kuman wo mengele-ngelep sé ra'io masoma wo malangu-langu, tioo mengéma-ngéma' andumoro' in sina wo makiit ing kasalé'an sé ra'ica loor, tioo meindo-indoan roma' wo mangana-nganat.

Yudas 1:8

Taniitu ka'i wo sé guru ra'ica wutul. Séra itu tampangipin wo anggapen éra em pinangipi éra itu wutul akar séra mengaéma' sé andumoro' in sina, paepesen érake' im beren eng kawasa i Amang Kasuruan wo ka'i mengaojat pakasa sé mahluk sé parayo-rayo wo pasiri-siriin an sorga.

2 Petrus 2:18

Séra menganuwu' mapaké i nunuwu' mengaangkai in owak wo ra'ica wana torona. Wo em pasusui éra ka'i andumoro' ing kasalé'an in owak mabersina en tumawér sumawel sé tou sé ra'ipé' uré icumesot an uner é tou sé mengakiit in sususuien ra'ica wutul itu.

Yakobus 2:7

Séra itu ka'i maojat i Ngaran i parayo-rayo wo pasiri-siriin, taan asi Ngaran ituo, kamu imamuali anu i Amang Kasuruan.

1 Timotius 1:20

An uner éra awéan si Himeneus wo si Aleksander. Séra in dua itu aisarakankuo a si kikiiten é sétang. Niéma'ku in taniitu wosama' séra mape'dis e maojat i ngaran i Amang Kasuruan.

1 Timotius 1:13

Indior aku maojat si Apo' Yesus. Paokoienku wo paséro'ku ka'i sé tou maéman ai Sia. Mandé in taniitu, aituru'-Na eng kaupusan-Na a yaku ampa'paan aku ra'ipé' maéman ai Sia si Toyaang i Amang Kasuruan wo ra'ica kailekanku sapa e niéma'ku.

Galatia 5:26

Wo tioo mengatirayo, tioo mengaéma' sé tou walina mae'bow, wo tioo kokanat si esa wo sé walina.

Galatia 5:20

mengaapo' a sé opo-opo', mengasihir, mengkaséké'an, meindo-indoan roma', menganganat, mengkae'bowan, mengawerotke' in owakna in esa, mengaéma' im petanéan, mengaéma' sé tou mentan-tanéan,

Markus 7:22

mengasina, mengalongi', kaléwo-léwo'an, mengauwak, mengaéma' sé karican, mengana-nganat, mengaojat, mengatirayo wo keté até.

Wahyu 16:9

Sé tou rinengis im paso' in api si ra'io icakua, akar ojaten éra e ngaran i Amang Kasuruan si makakawasa ing kawangkuran-kawangkuran itu. Wo séra ra'ica mape'dis wo ka'i ra'ica rumayo wo sumiri' Sia.

Yudas 1:13

Séra itu tanuoka in sempa' wangker si tumela'u in lewa' wo i noo an ta'sic. Séra itu ka'i tanuoka sé sumesendot sé ra'ica metu'tul si asalo mengéra-ngéra en tampana. En tampa é tou itu tinu'tulo i Amang Kasuruan asi tampa uli-ulit riréimbeng akar ing kauré-uré.

2 Petrus 2:7

Taan si Lot linowir i Amang Kasuruan, ampa'paan sia tou si mengaéma' im butul an dior-Na. En até i Lot ra'ica mento' mawendu ampa'paan im paémaan é tou sé ra'ica makailek in ukum wo asalo makiit ing kasalé'an in owak sé ra'ica loor.

Efesus 4:25

Ampa'paan kamu mamualio tou weru, ra'io toro ka'i mengatowo. Makuao mangé im butul asi esa wo sé walina, ampa'paan kita im baya puté-puté anggota in owak i Kristus.