Kolose 2:8 - En Taar Weru a nunuwu' é Tontemboan

⁸ Mareti-retio mangé kamu, oréoka awéan en tumawér icamu in sususuien andumoro' ing katouan sé ra'ica wana torona wo ra'ica wutul. En sususuien éra itu ra'ica asi Kristus owo, taan mengatuuré' asi kanaramen é tou indior wo ka'i a sé roh sé makakawasa ing kayo'baan.

Kolose 2:8 Referans Kwoze

1 Timotius 6:20

Timotius, musti téiranmu sumama-sama' waya sé aitoké i Casuruan ai co. Ra'ica toro kumiit memaa-maar sé ra'ica wana torona sé ra'- ica masiri' si Amang Kasuruan, wo ka'i tioo kumiit meindo-indoan roma' in andumoro' sé pakua é tou “kapinteran”, en ulitna siitu ra'ica kapinteran taan asalo meindo-indoan roma' andumoro' i nunuwu'.

Efesus 5:6

Tioo kamu isélé'kow é tou i nunuwu' sé ra'ica wana torona, ampa'paan en itu iméma' ing kae'bowan i Amang Kasuruan a sé tou sé ra'ica le'tek ai Sia.

Matius 7:15

“Maténga-téngamo mangé a sé nabi ra'ica wutul. Séra maai ai camu tanuoka domba, taan en ulitna séra itu serigala léwo'.

Galatia 4:9

Taan intarépé' Sia kinatuusano miow, kuma'pa lébé loor kamu patuulen katuusano i Amang Kasuruan. Kéitu réén kamu masalé'ke' maréng sumawel sumelewir a sé roh ing kayo'baan sé ra'ica keter wo lengéi? Kéitu réén kamu masalé'pé' mengaata in owak a sé roh itu?

Kolose 2:20

Kamu imatéo mewali-wali wo si Kristus, wo aiwekaro ang kawasa é roh ing kayo'baan anio'. Taan kéitu réén kamu imenonoué' tanu sé tou pakakawasan ing kayo'baan anio'? Kéitu réén kamu makiité' in atoran-atoran ing kayo'baan anio'? Tanumai,

2 Timotius 3:13

Taan sé tou léwo' wo sé tou mengauwak, séra itu makaléwo' oka. Séra mengauwak sé tou, taniitu ka'i wo sé tou walina maréng sumawel sumuli' muwak iséra.

2 Petrus 3:17

Taan kamu é poo-poow sé icaupusku, kailekano miow andumoro' sé itu. Ampa'paano in itu, mareti-retio mangé in sususuien é guru ra'ica wutul itu, wosama' kamu ra'ica kumiit in sususuien éra wo kamu ra'ica mekar im paémanen iow.

Ibrani 13:9

Tioo kamu isélé'kow in sususuien sé membam-balinaan sé ra'ica meputé wo in sususuien i Kristus. Lébé loor en até miow keteren ampa'paan kamu asalo makawangén asi upus aitambér i Amang Kasuruan. Sé atoran andumoro' ing kakanen, mandé kiiten iow, en itu ra'ica méé katoronaan ai camu.

2 Yohanes 1:8

Téiran iow sumama-sama' em paémanen si aisusuio ami wosama' ra'ica icatala. Wo in taniitu ro'na kéréan iow waya en laasa miow.

Galatia 4:3

Taniitu ka'i mai wo icita: An tutuw kita ra'ipé' makatuus si Kristus, kita pakaatané' é roh sé makakawasa ing kayo'baan anio'.

2 Korintus 10:5

Tangkisen ami em pawasa-wasan léwo' wo tongkaren ami em bénténg-bénténg ing katirayoan é tou sé mengaéma' séra ra'ica makatuus si Amang Kasuruan. Kawasan ami em bewerot é tou wo maali iséra le'tek a si Kristus.

Kolose 2:18

Anaé, tioo en laasa ing katouan iow itu léwoon in sususuien in tou si maturu' kéndo' ko'kos en até wo maapo' a sé malaékat wo mengatirayo andumoro' im papaturu'an sé aipapaturu' ai sia wo ka'i mengarangka' in owak ang karapi ra'ica wana alasan ampa'paan asalo imawero-werot ing kasalé'an ing kayo'baan.

1 Petrus 1:18

Kailekano miow sapaoka kamu tinu'buso asi katouan uré si katouan ra'ica wana torona, sé penusu-nusuio é apo-apo' miow indior. Kamu ra'ica tinu'bus ang karapi ing kasiyaan tanu mas kuma'pa pérak, sé ro'na maléwo' kuma'pa mata'incéré',

Roma 16:17

Poo-poowku, sina'uenku kamu, mareti-retio mangé a sé tou sé masalé' mengaéma' ing kapetanéan, wo sé masalé' mengasélé'kow im paémanen é tou a si Amang Kasuruan. Séra mengasusui in sususuien sé membalinaan wo in sususuien wutul sé kinéréano miow. Anaé, tumayango mangé ai séra.

Efesus 4:20

Taan en sususuien andumoro' i Kristus si liningao miow, ra'ica masusui menonou tanu siitu!

Galatia 1:14

Tanu tou si mengakiit in agama é Yahudi yaku en lébé incaya' miara ing kanaramen é apo-apo'ku, sa ipeputé wo sé kinakelian asé tou Yahudi sé merengan wo yaku.

Filipi 3:2

Mareti-retio mangé kamu a sé tou sé mengaéma' in léwo', sé patus patuulen asu wo sé malesé' sé tou maéman a si Kristus en sunaten.

Matius 16:6

Icua i Yesus ai séra, “Matéi-téiro wo maténga-téngamo andumoro' i ragi é tou Farisi wo Saduki.”

Matius 10:17

Kamu musti maténga-téngam a sé pakasa in tou! Ampa'paan awéan oka tou en sumarakan icamu an sidang agama wo samboken oka éra kamu am balé-walé paapo'an éra.

Kolose 2:22

Pakasa sé atoran itu andumoro' in sapa sé ra'io wana torona kekawus im pinaké wo ra'ica akar ing kauré-uré. Sé atoran tanu siitu asalo kumiit im perénta-perénta wo in sususuien-sususuien sé niéma' é tou.

Efesus 2:2

An tutuw itu kamu mengakiité' ing kanaramen ing kayo'baan anio', wo mengakiit si kikiiten é sétang si cumawasa an langit. Siao e roh si matawoi intarépé' an untep in até é tou sé ra'ica le'tek a si Amang Kasuruan.

Kisah Para Rasul 17:18

Ang kota Atena awéan golongan Epikuros wo golongan Stoa. Sé tou pinter asé reru itu meindo-indoan roma' wo si Paulus, awéan e makua, “Sapa réén eng kailekan i tou anio'? Eng kailekanna waya im pira taan keli nuwu'.” Wo sé walina ka'i makua, “Si tou anio' makua wona' andumoro' é opo-opo' é bangsa walina.” Icua éra in taniitu ampa'paan si Paulus mengakua andumoro' i Yesus wo andumoro' Sia si tinou sumawel am papaté.

Kisah Para Rasul 17:32

An tutuw iluminga sapaoka sé tou imatéo ro'na touen sumawel wo sia aiséro'ke' é piraan tou ai séra. Taan sé walina makua, “Kawisa oka mangé lingan ami en aicuamu tarépé'.”

1 Korintus 8:9

Taan kamu musti mareti-reti. Mandé ka'i ro'na kanen iow sé ayumper itu ampa'paan papercayan iow en itu ra'ica mamuali soal, taan tioo tumawér sé tou walina sé ra'ipé' keter em paémanen eng kuman ing kakanen itu. Paweroten éra ang karapi ing kuman sé ayumper itu, séra iméma'o ing kamesé-meséaan.

1 Korintus 10:12

Ampa'paano in itu, si séi e mawerot em paémanenna ketero, sia musti mareti-reti wosama' sia ra'ica taporak méma' ing kamesé-meséaan.

Galatia 5:15

Taan kamu ra'ica toro tanuoka sé binatang mengkang-karétan wo menlo'-lo'motan. Mareti-retio wosama' kamu ra'ica mempatéan.

Kolose 2:23

Sé atoran itu kaséréan woo loor, ampa'paan sé tou masusui in atoran-atoran itu kaséréan tanu kéndo' uli- ulit mengaapo' asi Amang Kasuruan. Wo séra kumo'kos in até wo makiit in atoran-atoran itu akar mengaokoi kéndo' in owak éra in esa. Taan pakasa en itu ra'ica wana torona, ampa'paan séra asalo makiit ing kasalé'an in owak éra in esa.

Ibrani 3:12

Anaé, é poo-poow, mareti-retio mangé oréoka awéan esaan ai camu makaaté in léwo' wo ra'io ka'i maéman, akar sia sumali'si' wo tumayang asi Amang Kasuruan si menonou.