Ibrani 4:2 - En Taar Weru a nunuwu' é Tontemboan

² Ampa'paan en Abar Kaaruien itu ipakua-kuao ai cita, meputé sé aicuao a sé apo-apo'ta indior. En abar sé lininga é apo-apo'ta itu ra'ica wana torona ai séra, ampa'paan ra'ica percayan éra.

Ibrani 4:2 Referans Kwoze

1 Tesalonika 2:13

An tutuw ipakua ami en taar i Amang Kasuruan, tinerimao miow en itu tanu nunuwu' i Casuruan ra'ica nunuwu' é tou. Wo en aisowat iow itu wutul, ampa'paan en taar i Amang Kasuruan itu ang karoro'ano i matawoi ang katouan iow sé maéman a si Apo' Yesus. Ampa'paan in ituo kami mengua-ngua i makapulu'sama' ai Sia.

Ibrani 11:6

Si tou ra'ica maéman a si Amang Kasuruan, sia ra'ica kawisa mako maarui in até-Na. Si tou mai a si Amang Kasuruan sia musti maéman sapaoka si Amang Kasuruan itu awéan, wo sia musti maéman ka'i sapaoka si Amang Kasuruan méé mai in laasa a sé tou sé uli-ulit mengaéré Sia.

Ibrani 3:12

Anaé, é poo-poow, mareti-retio mangé oréoka awéan esaan ai camu makaaté in léwo' wo ra'io ka'i maéman, akar sia sumali'si' wo tumayang asi Amang Kasuruan si menonou.

1 Timotius 4:8

Numaram in owak akar i maketer wayake' im pira eng katoronaan taan numaram in owak mengaapo' a si Amang Kasuruan, kelian eng katoronaanna. En itu tanu si aijanji-Na e maali mai ing kamang ang katouanta intarépé' asi cayo'baan anio' wo ka'i ang katouanta sa.

Roma 2:25

Pakasa sé tou Yahudi sinunato. Sa kamu le'tek mengaéma' in ukum Torat, en sunat itu awéan torona. Taan sa kamu ra'ica mengaéma' in ukum Torat, en sunat iow itu ra'ica wana torona ai camu.

Kisah Para Rasul 13:46

Taan ang karapi in da'ica wana kaindé'an, icua i Paulus wo si Barnabas, “Mémang wutul, en Taar i Amang Kasuruan itu musti icuao owo ai camu. Taan ra'ica kiim iow mercaya, kamu mawerot en owak iow ra'ica patus makéré ing katouan akar ing kauré-uré. Ampa'paano in itu, kamu itela'u ami wo kami maangé a sé tou ra'ica Yahudi eng kumua in taar i Casuruan itu.

Yakobus 1:21

Anaé, itiya'o waya sé ra'ica wutul wo ka'i mentoo mengéma-ngéma' ing kaléwo'an' sé taloso keli itu. Terimano mangé en Taar i Casuruan ang karapi ing ko'kos en até. En Taar si ayusew an até miow awéan kawasa en lumowir icamu.

Ibrani 4:6

Anaé, en tampa pengaenaan itu makawuka'pé' torona é tou wo séra awéané' témpo mangé muntep am bitu. Taan sé apo-apo'ta tou Israel sé kinuanano in Abar Kaaruien itu, séra ra'ica toro muntep asi tampa pengaenaan itu ampa'paan séra ra'ica le'tek a si Amang Kasuruan.

1 Korintus 13:3

Wo mandé ka'i yéké- ékéku waya eng kasiyaanku a sé tou lengéi wo iwééku en owakku tunun, taan sa aku ra'ica wana upus a sé tou walina, pakasa en itu ra'ica wana torona a yaku.

1 Petrus 1:12

Aicuao i Amang Kasuruan a sé nabi sapaoka sé ipakua éra itu ra'ica torona in owak éra in esa, taan torona miow intarépé'. Sé pakua éra itu, siituo en Abar Kaaruien andumoro' i Yesus Kristus. Wo intarépé' awéan sé tou kinawasa i Roh Le'nas an sorga owo, séra ituo sé tou makua in Abar Kaaruien itu ai camu. Sé malaékat ka'i masalé' makailek andumoro' ing kalowiran sé aicuao ai camu.

1 Tesalonika 1:5

Kailekan ami en itu ampa'paan asi makasa kami mangé ai camu an Tesalonika e mangé kumua in Abar Kaaruien andumoro' i Yesus Kristus. An tutuw itu kami ra'ica asaloke' maké i nunuwu' ami, taan ang karapi ing kawasa i Casuruan wo ang karapi i Roh Le'nas si méma' icamu uli-ulit mercaya in Abar Kaaruien andumoro' i Yesus Kristus itu. Wo sinéréo ka'i miow em peri ami. Anaé, kailekano miow sapaoka en Abar Kaaruien itu wutul.

Galatia 3:8

Ang Kitap Le'nas, ro'na kakailekanta sapaoka tumo'tolke' mai indior aitantuo i Amang Kasuruan sé tou ra'ica Yahudi anggapen-Na oka wutul an dior-Na sa séra maéman a si Kristus. En Abar Kaaruien itu aicuao i Amang Kasuruan indior a si Abraham an janji anio', “Pakasa im bangsa ang kayo'baan kamangen oka, ampa'paan ico.”

Galatia 4:13

Tantu kata'néiané' miow an tutuwku kataré-taré mai ai camu. An tutuw itu aku sumakit, anaé aku mangéke' an sangkum ing Galatia e mena' in owak, wo tutuw itu aku sumangkumo kumua in Abar Kaaruien andumoro' i Yesus Kristus ai camu.

Kisah Para Rasul 3:26

Ampa'paan in ituo, si Amang Kasuruan isumisiro si Ata-Na wo yutus-Na kataré-taré ai camu wosama' Sia kumamang icamu, en lalanna tawangen-Na kamu si esa wo si esa en tumela'u ing kaléwo-léwo'an.”

Roma 3:3

Taan tambisa sa an uner éra awéané' sé ra'ica le'tek a si Amang Kasuruan? Anaé, tambisa eng kale'tekkan i Amang Kasuruan asi janji-Na ai séra itu batalen-Na?

Galatia 3:2

Sowateno mai em buwuéienku anio': Ampa'paan in sapa réén kamu tumerima i Roh Le'nas? Ampa'paan mengaéma' in ukum Torat kuma'pa luminga in Abar Kaaruien wo maéman a si Kristus?