Ibrani 10:1 - En Taar Weru a nunuwu' é Tontemboan1 En atoran-atoran ang kitap Torat itu, asaloke' im bayangan andumoro' sé loor si maai sa, ra'ica modél aseli asé loor itu. Sa kumiit sé atoran itu, sé tou sé mai maapo' a si Amang Kasuruan, séra musti meméé-méé raragés meputé susur in ta'un. Taan e raragés binatang pinokol sé airagés éra itu, ra'ica kawisa méma' iséra makaleke-lekep an dior i Amang Kasuruan. Gade chapit la |
Ampa'paan in itu en ténda paapo'an wo pakasa im pakakas sé pengapakén am bitu, musti le'nasen in enda' i binatang. Wo en ténda paapo'an wo em pakakas sé pengapakén ang kayo'baan tanuke' modél sapa sé an sorga. Anaé, sa en ténda ang kayo'baan musti le'nasen in enda' i binatang, ténda an sorga musti le'nasen i raragés si lumoorai wo in enda' i binatang.
En ukum Torat ra'ica kawisa lumowir icita, ampa'paan kita makiit in ukum Torat si ra'ica kaémaanta. Taan niéma'o i Amang Kasuruan si ra'ica kaémaan in ukum Torat. Sia mutuso mai si Toyaang-Na in esa ang kayo'baan anio' mamuali tou tanu iméma'o ing kamesé-meséaan wo imaté e mekar sé tou iméma' ing kamesé-meséaan. Wo ampa'paan im papaté i Toyaang-Na itu, kinala-Nao eng kawasa ing kamesé-meséaanta in tou.
An tutuw é suku Lewi mamuali imam, si Amang Kasuruan méé mai in ukum Torat a sé tou Israel. Mandé ka'i sé imam taranak i Lewi mengaéma' in tawoien éra mengatuur an ukum Torat, taan em pakaselewir éra ra'ica ro'na méma' sé tou mamuali lekep an dior i Amang Kasuruan. Anaé, musti awéan imam walina kaputé i Melkisedek, wo ra'ica imam asé taranak i Lewi kaputé imam Harun.