Filipi 1:27 - En Taar Weru a nunuwu' é Tontemboan

²⁷ Anaé, em penting keli kamu musti menonou kumiit in sapa sé aisusui an Abar Kaaruien andumoro' i Kristus. Wo in taniitu, aku maai meta'up wo icamu kuma'pa ra'ica, kailekanku oka sapaoka kamu enté' makatulung an esa wasa wo rumaméji mewali-wali an esa até torona im paémanen ampa'paan makiit in Abar Kaaruien.

Filipi 1:27 Referans Kwoze

Efesus 4:1

Yaku Paulus si binui ampa'paan maselewir si Casuruan, sina'- uenku kamu sé tinowao i Amang Kasuruan wosama' kamu menonou kumiit in totowa itu.

1 Korintus 1:10

Poo-poowku! Pekiupusenku ang karapi i ngaran i Apo'ta Yesus Kristus, wosama' kamu im baya esa nunuwu'. Tioo awéan papetanéan an uner iow, aweso taré kamu meesa en até wo esa em bewerot.

2 Petrus 3:14

Ampa'paan in ituo é poo-poow sé caupusku, ang karoro'an iow maento-ento' im pakasa itu mamuali, kamu musti rumaméji menonou le'nas wo ra'ica wana kaséaan an dior i Amang Kasuruan wo meeluran ang karapi-Na.

Kolose 1:10

Wo in taniitu kamu patus menonou an dior-Na wo maarui in até-Na am baya-waya wo ro'na méé im buéna loor am pakasa im pengaémaan wo makaawes makatuus si Amang Kasuruan.

Yudas 1:3

Poo-poow sé icaupusku! En ulitna si paangé-angénku asi kataré-taré, yaku masalé' keli woo matic in surat ai camu andumoro' ing kalowiran si tinerimatao im baya. Taan intarépé' icasalé'ku keli e matic andumoro' sé walina torona miow. Icasalé'ku en sumina'u icamu wosama' kamu rumaméji kasake' imaéman. Em paémanen itu makasake' iwéé i Amang Kasuruan a sé tou le'nas akar ing kauré-uré.

1 Tesalonika 4:1

Poo-poow, aisusuio ami ai camu tambisa em peri mengaarui in até i Casuruan, wo kamu wutu-wutul menonouo tanu siitu. Wo intarépé' pangileken ami ai camu ang karapi ing kawasa i Apo' Yesus, wosama' kamu rumaméjipé' mangé menonou mengaarui si Amang Kasuruan.

Filipi 2:12

Poo-poow sé icaupusku! Kailekanku an tutuwku ang karapi miow, kamu tatap le'tek a yaku. Taniitu ka'i intarépé' an tutuwku mentayangan wo icamu, pangilekenku tatap tawoien angé ang karapi mauli-ulit eng kalowiran iow wo ang karapi wuta ing kaindé'an a si Amang Kasuruan, wo menonou angé kiit in sapa si patus émaan é tou sé linowir-Nao.

Filipi 3:18

Icuaku in taniitu, ampa'paan awéan e mangémai akar en atéku wendu keli. Tanu sé makakeli-kelio aicuaku ai camu ang karapi i maamé', ita'néiku ai camu sapaoka intarépé' keli tou imangaku séra makiit si Kristus, taan séra ra'ica menonou makiit in sususuien i Kristus si maté ang kayu salip en tumu'bus ing kamesé-meséaanta!

2 Korintus 13:11

Anaé é poo-poow, maaru-aruio mangé, wutuleno em peri miow si suméa'. Terimano mangé pakasa en sina'uku! Meesao mangé en até wo em bewerot iow wo menonouo mangé ang kaeluran. Si Amang Kasuruan, pelemboian in upus wo ing kaeluran, mewali-wali oka wo icamu!

Kisah Para Rasul 4:32

Pakasa sé tou maéman meesa en até wo esa wewerot, ra'ica wana mandé esake' tou eng kumua sapaoka en anuna, anunake' in esa. Anaé, eng kasiyaan éra anu éra im baya.

2 Petrus 3:11

Anaé, sa em pakasa pakateri-terin oka tanu siitu, tumambisa réén kamu musti menonou intarépé'? Tantu musti menonou le'nas wo le'tek a si Amang Kasuruan.

1 Korintus 15:58

Ampa'paan in ituo é poo-poow sé icaupusku, keteren em paémanen iow wo ra'ica toro marua-rua wasa. Wo mare'de-re'dem an tawoien i Casuruan, ampa'paan kailekano miow sapaoka sé tinawoi iow an dior i Casuruan ra'ica wana si ra'ica wana en torona.

Roma 1:16

Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

Yakobus 3:18

Mémang wutul eng kalooran ituo wuéna in lulumbo ing kaeluran si aiwuras é tou sé masalé' ing kaeluran.

Filemon 1:5

ampa'paan liningakuo en abar andumoro' im paémanenmu a si Apo' Yesus wo andumoro' in upusmu a sé pakasa é tou le'nas.

Titus 2:10

Séra ka'i ra'ica toro marombit in anu é tou. Aweso taré ituru' éra mangé a si tuang éra sapaoka en até éra wutu-wutul weresi wo le'tek, wo in taniitu séra ro'na percayan i tuang éra. Sa émaan éra tanu siitu, en sususuien i Amang Kasuruan, si Lumolowirta, irayo oka é tou walina.

2 Timotius 4:7

Niéma'kuo en tawoienku ang karapi in sama' akar i malekep, kaputé wo si tou repet em pakatéron kumiit mekowa' tuméron akar in sumiwak. Wo aku kasake' le'tek maéman a si Casuruan.

1 Timotius 1:19

Ico ka'i musti tatap maéman a si Apo' Yesus karapi in até weresi wo le'nas. Ampa'paan awéan tou ra'io mengakiit in até weresina akar em paémanen éra materi.

1 Timotius 1:11

En sususuien wutul itu aipatic an Abar Kaaruien andumoro' i Yesus Kristus, si asi Amang Kasuruan wangko' owo si patus parayo. Wo en Abar Kaaruien itu aitokéo a yaku en icua.

Kisah Para Rasul 2:46

Wo susur in endo séra le'tek mewali-wali wo meesa en até mengali'us ang am Balé Le'nas. Séra mengaéma' im perjamuan mewali-wali ang karapi in arui wo lekep en até si pagilir am balé-walé.

Matius 12:25

Taan kailekan i Yesus em bewerot éra, wo icua-Na ai séra, “Sa an esa kakolanoan sé tou meréndé-réndéran, tantu eng kakolanoan itu makatongka-tongkar. Wo sa an esa kota kuma'pa esa pamalé meréndé-réndéran, tantuo ka'i eng kota wo em pamalé itu ra'ica kawisa tumang.

1 Tesalonika 3:6

Intarépé' si Timotius imaréngo mai ai cami wo icuana ai cami en abar in andumoro' icamu an Tesalonika wo iméma'o icami arui. Aisisilna sapaoka kamu kasake' maéman a si Yesus wo meupu-upusan. Aicuana ka'i sa kamu makata'néi icami, en até miow arui. Wo kamu masalé' meta'up sumawel wo icami, puté ka'i wo icami masalé' meta'up wo icamu.

Kolose 1:4

ampa'paan liningao ami andumoro' im paémanen iow a si Kristus Yesus wo andumoro' in upus iow a sé im pakasa é tou le'nas.

Filipi 2:24

Wo percayanku sa woo énannai i Apo' Yesus yaku in esa ka'i makala'us oka mai ai camu.

Efesus 1:15

Ampa'paano pakasa sé niéma'o i Amang Kasuruan ai camu, an tutuwku luminga in andumoro' im paémanen iow a si Apo' Yesus wo andumoro' in upus iow a sé im pakasa é tou le'nas,

Efesus 1:13

Taniitu ka'i camu tou ra'ica Yahudi sé lumingao in sususuien wutul i Amang Kasuruan, siituo en Abar Kaaruien si mengawéé ing kalowiran ai camu. Wo an tutuw iow maémano a si Kristus, tinerimao miow e Roh Le'nas si aijanji-Na tanu tuus kamu imamualio tou-Na.

Galatia 1:7

En ulitna ra'ica wana lalan walina e makéré ing kalowiran. Taan kamu tinawéro é tou sé mengalicoko icamu ang karapi in sususuien andumoro' in abar sé mengasélé'kow. Em peangé-angén éra en sumali'si' in Abar Kaaruien andumoro' i Yesus Kristus si pakua ami.

2 Korintus 9:13

Wo asi kasamaan in até sé aituru' miow itu, kelian oka en tou an Yerusalem rumayo si Amang Kasuruan ampa'paan séra isumeréo icamu wutu-wutul menonou makiit wutul in Abar Kaaruien andumoro' i Yesus Kristus. Wo ka'i séra rumayo si Amang Kasuruan ampa'paan kamu wutul lekep en até mawéé in tatawang ai séra wo a sé pakasa in tou walina.

2 Korintus 4:4

Sé tou ra'ica mapercaya, em pakawerot éra winolao i opo' léwo' si makakawasa ing kayo'baan anio', akar séra ra'io mailek in sendot in Abar Kaaruien itu. Anaé, séra ra'ica makailek tambisa eng kawangko' i rarayo wo in sisiri' i Kristus, si meputé ulit wo si Amang Kasuruan.

Roma 15:29

Kailekanku, sa aku mangé meta'up ang karapi miow, tantu paalianku oka mangé ai camu keli kamang i Kristus.

Roma 15:16

Yaku mamuali ata maselewir a si Kristus Yesus e mengakua in Abar Kaaruien andumoro' i Yesus Kristus a sé tou ra'ica Yahudi. En tawoienku tanu in tawoien é imam si mengawéé i raragés, ampa'paan aku makawali sé tou ra'ica Yahudi a si Amang Kasuruan wosama' séra teriman-Na tanu raragés si casalé'-Na wo si line'naso i Roh Le'nas.

Roma 10:8

Taan eng kaangéanna tana'i, “En Taar i Amang Kasuruan itu tawi keli ai camu; Am ba'ba' miow wo an untep in até miow.” En Taar itu si Abar Kaaruien andumoro' im paémanen sé ipakua-kua ami.

Roma 1:9

Kamu ipenomba-nombayangku wo si Amang Kasuruano en sairi sapaoka aku uli-ulit mengasombayang torona miow. Siao si Amang Kasuruan si pengaselewiranku ang karapi in lekep en até an tutuwku mengakua in Abar Kaaruien andumoro' i Toyaang-Na.

Roma 1:5

Wo ampa'paano i Yesus Kristus ituo, si Amang Kasuruan imééo mai ing kamang a yaku mamuali ruru'du'an e makin waya sé tou ang kayo'baan wosama' séra maéman wo le'tek a si Yesus Kristus. Émaanku waya en itu, wosama' e ngaran i Yesus Kristus iparayo-rayo wo pasiri-siriin.

Kisah Para Rasul 24:24

Mawaya'o pirao ngando si Paulus tinang, wo mai si gubernur Feliks mewali-wali wo si penanaanna makangaran Drusila si tou Yahudi. Wo iru'du' i gubernur itu en tumowa si Paulus wo linganna asi Paulus andumoro' tumambisa wosama' sé tou ro'na maéman a si Yesus Kristus.

Filipi 1:5

Pengakuaku i makapulu'sama' a si Amang Kasuruan, ampa'paan tumo'tolke' mai asi endo kataré kamu luminga in Abar Kaaruien in andumoro' i Yesus Kristus akar intarépé', kamu tumawango in tawoienku mengakua in Abar Kaaruien.

Filipi 3:20

Taan icita imamualio tou in sorga. Wo an sorga itu owo, maai oka si Lumolowir si paento-entoonta, Siao si Apo' Yesus Kristus.

Filipi 4:1

Ampa'paano in itu, é poo-poow sé icaupusku wo sé pengalelonku, pangilekenku entééno mangé em paémanen iow a si Apo' Yesus tanu in tou si uli-ulit keter makatulung. Icamuo eng kaaruianku wo eng katirayoanku si tanu mahkotaku.