Filipi 1:17 - En Taar Weru a nunuwu' é Tontemboan

¹⁷ Taan sé tou menganganat wo meindoan roma', séra mengakua andumoro' i Kristus ampa'paan mawasa in léwo'. Wo paweroten éra ang karapi i méma' in taniitu, en atéku lébé masusa am bui.

Filipi 1:17 Referans Kwoze

Filipi 2:3

Tioo mengaéma' in sapa-sapake' sé asalo mangéré ing katoronaanke' in owak in esa, kuma'pa mengatirayo in owak in esa. Taan ituru'o eng kako'kosan in até asi esa wo si esa wo weroteno mangé sé tou walina en lébé loorai wo in owak in esa.

Filipi 1:7

Mémang patuso aku méé i makapulu'sama' in taniitu andumoro' icamu im baya, ampa'paan icamu im baya an atékuo. Wo ka'i kamu imamualio kara-karapi an tawoien si aitambérai i Amang Kasuruan a yaku. Kamu ra'ica mento' matawang yaku, mandé ka'i yaku am bui kuma'pa an tutuwku mengakua im pembélaan e méé tuus a sé tou sé ra'ica mapercaya in Abar itu, sapaoka en Abar Kaaruien si pakuaku itu wutul.

2 Timotius 4:16

An tutuw ing kataré-taré aku méla in owakku am pengadilan, ra'ica wana esaan angé asé tou en tumawang yaku. Pakasa in tou tumela'uo yaku. Taan pangilekenku a si Casuruan wosama' ra'ica ukumen-Na séra.

1 Timotius 2:7

Siituo imangémai aku sinisir i Amang Kasuruan mamuali ruru'du'an-Na e mangé a sé tou ra'ica Yahudi eng kumua in abar andumoro' im paémanen wutul. Pakasa sé aicuaku anio' ulit! Yaku ra'ica matowo.

Kisah Para Rasul 26:24

Ang karoro'an i Paulus mabéla in owakna, wo positen i Festus i rumoma' ang kerapi in depet, “Ra'io lekep ko é Paulus! Ico keliano eng kailekan, akar em ipakawerotmu ra'io wutul.”

Kisah Para Rasul 26:1

Wo icua i colano Agripa a si Paulus, “Intarépé', wéanku kaloasan ko e rumoma' e méla in owakmu.” Wo si Paulus méé tuus mangkai ing kamana wo kumua,

Kisah Para Rasul 22:1

“Éi tuang-tuang wo sé poo-poow, lingan iow, awéan en icuaku ai camu e méla in owakku!”

Lukas 21:14

Ampa'paano in itu, ketereno mangé en até miow wo tioo maindé-indé' andumoro' in sapa si musti icua miow e méla in owak.

Roma 2:8

Taan sé tou menonou toronake' in owak éra in esa wo ra'ica le'tek mengaéma' in sususuien wutul-Na wo sé asalo mengéma-ngéma' sé léwo', séra icae'bow-Na keli.

Filipi 1:18

Taan ra'ica sapa-sapa! Ampa'paan mandé ka'i tambisa, en Abar Kaaruien aicuao éra a sé tou. Pakua éra en Abar itu ang karapi im pawasan ra'ica loor kuma'pa im pawasan i lekep en até, em penting keli si Kristus ipakuao a sé tou. Siituo e méma' in atéku arui. Wo ka'i yaku kasake' arui,

2 Timotius 2:9

Ampa'paano aku makua in Abar Kaaruien itu, yaku pengaokoien é tou, pengawa'kesen éra i ranté tanuoka tou léwo', taan en taar i Amang Kasuruan ra'ica toro kawa'kesan.