Hechos 26:22 - Nuevo Testamento Toba Maskoy

²² koka Eniapom Neten alhta hepasmak ma'a. Ka ngkanek mokhom alhengkeskama alheianma ania'a aktaqmanma apkellelto nema apkelletsekama, metka apkelletsekamaha, aplhamakho enenlhet'avok na asketlhekmoskama mota apketlheianmo lhnak nanek apkeleltennasemmap ania'a kakpota nhan Moises.

Hechos 26:22 Referans Kwoze

Hechos 24:14

Vanlha ko'o askeliehekho Eniapom Neten apanko'ok nelieihengka, kakpota nhan asieplekama Alhnankok Amai. Koka enenlhet'avok anak apketlhengke mota Amai Alhnankok akto lhnak apasmekama enenlhet'avok ngkolatsekama hengetlhekmoskama. Ko'o koka askeliehekho nhan aklheianma vakkahak ley kakpota nhan vakkahak apanko'ok apkeleltennasemmap ania'a annenga.

Hechos 10:43

Apketlheianmek nak nanek na apkeleltennasemmap ania'a Eniapom Neten etneskesama lhna lhta apankek meleliehekho apkellaskamakha apkellelto la meliaskeiam apvesai'a Jesús ma'a —lhna aptemak apkellanemo Pedro enenlhet'avok ma'a.

Lucas 24:44

Netamen nak Jesús ma'a lhna aptemak apkellanemo mokhom: —Aktakha nak asvetammalhka ko'o, askeleltennaskangke lhta mota ketlhengkap, ntemengkek askaniemhaikama aklheianmo lhnak nanek ley Moises, apkeleltennasemmap ania'a annenga kakpota nhan vakkahak Salmo hetlheianma ko'o —lhna aptemak Jesús.

Lucas 24:27

Ka apkelpeiveskasekho lhnak Jesús aktemakha aktalhesammalhka Vakkahak Eniapom Neten Apaivoma aplhenammap Cristo, ampai'o lhnak nanek aktalhesammalhka ley Moises, ka amhaiangko nhan vakkahak apnaktalheskama lhnak nanek apkeleltennasemmap ania'a annenga.

Apocalipsis 15:3

Apkennekmasengke lhta nhan apkennekmaskamo lhnak nanek Moises apto apkasennaikama Eniapom neten, kanhan nennekmaskama apvesai'a Nepkesek Apketkok, ka ntemak hengke'e: —Aliavai'a nkek qaselha apkelanai'a lheiap, hempelapkeskama nhan, apto apveske vanlha lhema aphapak aknema apmopvana apanke lheiap Eniapom Neten, apkelan'a mota qaselha akpeivomo kakpota nhan akto akietemo nkoie lheiap apto apveske takhaplhet'ok aplhamakho apkellavakha.

Romanos 3:21

Koka kolhvave nak hengelvetaskaskek Eniapom Neten antangkok nengelpeivomo have m'a aniem'o ley anak, lhnak nanek na ntemak aklheianma m'a Vakkahak ley Moises kakpota nhan vakkahak apanko'ok apkeleltennasemmap ania'a.

Hechos 28:23

Ka apkelpekkeno lhta lhema aknem eniaqnekhak hata mokhom ma'a. Ma lhta ntek enenlhet'avok apkenmeioiam apnakha nhan Pablo m'a apkenmahai'a ellailhok ma'a. Sosekhe anke lhta apkempak apkeltennaikama Pablo m'a akvakho ienaqteso ania'a aktemakha aptema apveske Eniapom Neten. Ka apkelpeiveskasakho lhta nhan ley Moises kakpota nhan vakkahak apnaktalheskama apkeleltennasemmap ania'a annenga aktemakha aplhenammap Jesús.

Hechos 26:17

Avongkesek hata nhan tep lheiap apkenmak'o la enaqtevaksek judios kanhan metnangko nak judios. Kolhva koka angvapaksek hata apieseksek metnangko nak judios kakpota etlhekmosangkok ma'a.

Hechos 26:6

Koka kolhvave nak heliantemantek napaqtek lheiap judios anak kakpota heiekpelkok lheiap aniem'o m'a al·halhnekama evalhok atak hata lhema apaivoma apkellaiangko lhnak nanek Eniapom Neten nelieihengka aktemakha ngkotnek hata m'a. Alel·halhneiangka nhan apvalho'ok 12 apkelpasmekha apketkak neptamen Israel elvetak hata m'a, ka nkanek apkellasennaikama mota lhamakho aknem kanhan pelhasep akvakmo akvo'o ta m'a.

Juan 5:39

Apkeltakmelkasavek niekhe apkelietsatekamok Vakkahak Eniapom Neten Apaivoma ketlhengkap, ngketlheianmek apvalho'ok elvetangvomok hata m'a aliennaktema apnenio'ok mankotnengveianlha nnelha, koka helheianme' ko'o vakkahak anak aktalhesammalhka.

Juan 1:45

Netamen apmeiakho lhnak Felipe apiantengvekho Natanael, lhna aptemak apkanemo: —¡Nelvetakhek lhek ennengko'o aklheianmo ley Moises anak kakpota nhan vakkahak apkeleltennasemmap ania'a annenga, Jesús ko Nazaret lhaiek, José apketka! —lhna aptemak Felipe.

Lucas 24:46

lhnak aptemak: —Ka ntemak aklheianma Eniapom Neten apaivoma enietsepok hata Cristo, koka hanetolhem'a aknem hata ngkotnek apketsepma m'a, elhatekhangvomok hata mokhom, ka ntemak ania'a m'a.

Apocalipsis 20:12

Askelvet'o lhta nhan apkeletsepma lhta, apkeliav'o, apketkeietse apkelanvakhe lhta m'a naqtek aptanema apveske. Netamen alhta m'a akno anmaiesakho vakkahak, netamen na mo'ok vakkahak akiennaktema enneniek ankok. Nne lhta alietsato vakkahak kakpota ngkolhek aliekpelkok apkeltemakha ngkollatsekama nlho ka la aktaqmanma m'a neksa apkelaniemhaikama lhta nalhepop.

Apocalipsis 11:18

Avanhek apkelloma enenlhet'avok lhmankek ham ngkanek ngva'ak aknem aploma lheiap. Eliekpelkok hata nhan aktaqmanma nlho ka la ngkollatsekama apkelanai'a apkeletsepma nak, ellangkok hata nhan apianmongkeskama apkellelto lhta apkellasennaikama apkeleltennaskamo ania'a apankok. Ellangkok hata nhan apianmongkeskama apkellelto apkelpokkenammap, apkellelto nhan apkellai'o apvesai'a, nlho ka la nhan apkelientalhnemo, melientalhnemo nhan, nkolhok hata mo'ok apkellaikamok akiaqmoiekha m'a. Koka enaqtevaksek hata lheiap apkellelto nak apnaqtevaskama takhalhet lhepop —lhta aptangkok metno apketko'ok ma'a.

2 Timoteo 3:11

Apiavek na lheiap aslengaiangko akientalhnema aniem'o nema heiaqmasekama lhta metka nnelha, ka aktemo lhta asvetai'a m'a apiav'akha temma Antioquia, Iconio kanhan Listra, koka Apveske lhtoka hevongkeskama mota tep ma'a.

Lucas 16:28

kakpota eleltennaskakhak 5 elialheng'a aktakha asvetai'a hengke'e, elianmongkesek hata apvalho'ok kakpota melvek hengke'e nenlengaiankolha nak akmaska akiavai'a", lhna aptemak ma'a.

Hechos 13:29

Ka apkellaqhemo lhta nhan ma'a, ngvai'ak aknem aktemakha lhnak nanek apnaktalheskama apkeleltennasemmap ania'a. Netamen ma'a nemo nhan aklekvekho aphapak neten iamet aktenneskama, nemo nhan aklhengkeskaiakmo aphapak nemakha aklhengkeskaianlha enghapak.

1 Corintios 15:3

Asketlhekmoske lhta ko'o ketlhengkap emanie nke lhta alhevai'a ania'a aktemakha apketsepma lhta Cristo aniem'o mongeleliehekho hengaskamakha Eniapom Neten: Ka ntemak na aklheianma vakkahak Eniapom Neten apaivoma m'a.

1 Corintios 15:4

Nnengkek nak aklhengkeskaiakmo nhan metaimong alhva aphapak ma'a, nemo nhan aklhatekhaskeiakmo neksa apketsepma m'a akvakmo hanetolhem'a aknem, ka ntemak ma'a aklheianma Eniapom Neten Apaivoma.