Yohanes 18:35 - Kaili Ledo

³⁵ Nanguli i Pilatus, “Nisaniku tano? Yaku ledo toYahudi! TodeaMu mboto bo balengga-balengga ntopanggeni agama nanggeni Iko tumai nte yaku. Sala nuapa ntoto nipoviaMu?”

Yohanes 18:35 Referans Kwoze

Suro-Suro 23:29

Ri sia, niepeku pangaduara aga nosinggambela ante atura-atura agamara mboto. Ledo ria salana anu masipato ratarunggu atau rahuku mate ka ia.

Suro-Suro 21:38

Ane ivesia, ledo iko tano toMesir nangeva pomarenta bo nanggeni pata-njobu topepatesi nalai hau ri karava bai bara ipia?”

Suro-Suro 3:13

Alatala anu nisomba ntotuata bo Nabi Abraham, i Ishak, bo i Yakub, Iamo nombabila bo nompakaoge BatuaNa i Yesus. I Yesus haitumo nidekeimiu ka pomarenta, bo Iamo nipoaramiu ri ngayo i Pilatus tempo i Pilatus madota mombakabasaka Ia.

Yohanes 19:11

Nesana i Yesus, “Ane Alatala ledo mombadekei kuasa ka komiu, komiu ledo mamala mombakuasai karoKu. Jadi dosa ntona anu nanggeni Yaku tumai nte komiu nambasopa pade dosamiu.”

Yohanes 19:6

Nanggita i Yesus, nongare-ngaremo balengga-balengga ntopanggeni agama bo topojaga-topojaga Banua nu Alatala nanguli, “Pakumo Ia ri kayu salib! Pakumo Ia ri kayu salib!” Nesana i Pilatus ka ira, “Alamiu mbotomo Ia, bo pakumiu mbotomo Ia ri kayu salib, sabana tona hitu ledo ntoto naria salaNa nikavaku.”

Yohanes 18:28

Da bobayana ntoto, nikeniramo i Yesus lako ri banua i Kayafas hau ri banua nu Gubernur. Pakeni-pakeni ntoYahudi mboto ledo nesua riara banua Gubernur Pilatus haitu, sabana ira majadi maruto nangoseaka Atura-atura agamara, bo ledo mamala mangande kandea posusa Paskah ngena.

Yohanes 18:34

Nesana i Yesus, “Nisanimiu mboto atau tona nanguli ka komiu?”

Yohanes 18:36

Nesana i Yesus, “PoparentaKu ledo nopuna lako ri dunia hitu. Ane rapana Yaku masimbayu nte magau lako ri dunia hitu, natantumo topangoseaka Yaku kana meeva ala Yaku ledo rasaka bo rakeni ka pakeni-pakeni ntoYahudi. Tapi poparentaKu ledo nopuna lako ri dunia hitu.”