Yohanes 12:43 - Kaili Ledo

⁴³ Ira nomparasaya nggalino sabana nipokonorapa ratoiya nu manusia pade ratoiya nu Alatala.

Yohanes 12:43 Referans Kwoze

Yohanes 5:44

Berimbamo komiu mamala momparasaya Yaku? Apa komiu aga madota rabila nu roa. Ledo nipasimbukumiu manggava pebila nu Alatala Saito-itoNa!

Yohanes 5:41

Yaku ledo mbeki ratoiya nu manusia.

Lukas 16:15

Tapi i Yesus nanguli ka ira, “Ri ngayo ntona ntanina, komiu nikita nabelo, tapi nisani nu Alatalamo pura-pura isi rara ntaimiu. Anu nabelo ntoto ri panggita manusia, haitumo nipovuu mata nu Alatala.

1 Tesalonika 2:6

Kami ledo muni mbeki ratoiya ntona, bara komiu bara tona ntanina. Kakanana masipato kami merapi nte komiu, sabana kami mpuu-mpuu suro i Kristus.

2 Korintus 10:18

Sabana, tona nipokono nu Alatala ledo topantoiya karona mboto tapi tona nitoiya nu Alatala.

Matius 6:2

Rapana ane komiu mombadekei petulungi ka tona napakasi, nee rapatolele poviamiu haitu eva povia ntona anu aga nabelo ri sumba. Ira nombadekei ka tona napakasi ri ngayo ntodea riara banua-banua petupu bo ri dala riara ngata ala rakita bo ratoiya ntona. Pariaramo tesaKu hitu! Petoiya ntona haitumo tambo nitarimara. Domo ria ntanina.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

Yohanes 12:26

Isema-sema mokarajaa ka Yaku kana mangoseaka Yaku ala ri umba-umba Kukalau, ia mosanggani-nggani nte Yaku. Bo isema-sema mokarajaa ka Yaku natantu rabila nTuamaKu.

Yohanes 8:54

Nesana i Yesus, “Ane Yaku mombabila karoKu mboto, ledo ntoto maria batuana. Tapi TuamaKu nombabila Yaku bo Iamo anu nipangakumiu Alatala nisombamiu,

Lukas 19:17

Pade nanguli madika ka batuana haitu, ‘Nabelomo! Iko batua nabelo. Iko namala raparasaya ante mbara-mbara sakide. Sabana haitu, iko Kupajadi topomparenta sapulu ngata.’

1 Petrus 3:4

Tapi kagayamiu kana mopuna lako riara ntaimiu, haitumo lako ri inggumiu nalusu bo natinonto. Haitumo kagayana anu ledo ntoto malipo bo noali mpuu ri panggita nu Alatala.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

Yohanes 7:18

Isema-sema nompatuduki lako ri pangisanina mboto, ia mbeki ratoiya ntona. Tapi isema-sema ledo nompekirika karona mboto tapi nompasimbuku ala topantudu ia haitu ratoiya, iamo nanoa, ledo ria tenggona.

Roma 2:29

Tapi toYahudi anu mpuu-mpuu todea nu Alatala, haitumo tona mpuu-mpuu rarana nangoseaka Alatala. Bo tona mpuu-mpuu nisuna, nisuna riara ntaira. Batuana, ira najadi todea nu Alatala sabana pokarajaa Nosa Gasa nu Alatala riara ntaira, ledo sabana pangoseakara atura-atura nitulisi. Tona ivehaitu ratoiya nu Alatala, nau ledo nitoiya nu manusia.