Yohanes 1:44 - Kaili Ledo

⁴⁴ I Filipus haitu tona lako ri ngata Betsaida, haitumo ngata ponturo i Andreas bo i Petrus.

Yohanes 1:44 Referans Kwoze

Yohanes 12:21

Ira nakava nangulika i Filipus, “Ane mamala, kami madota mosinggava nte i Yesus.” (I Filipus haitu tona lako ri ngata Betsaida ri bagia Galilea.)

Matius 11:21

NiuliNa, “Mandasa mpuumo komiu, toponturo ri ngata Korazim! Bo mandasa mpuumo komiu toponturo ri ngata Betsaida, sabana komiu ledo najea. Ane rapana kabaraka-kabaraka nipoviaKu ri ngatamiu Kupovia ri ngata Tirus bo Sidon, natantu nasaemo kajeara, nau ira ledo toYahudi. Bo natantu nasae munimo popakeara karu bo podikara sovu ri balenggara, tandana nabuku rarara bo nanjosomo nokainggu nadaa. Komiu toYahudi nanggita kabaraka-kabaraka haitu, tapi komiu ledo ntoto najea!

Lukas 10:13

I Yesus nompapola tesaNa ivei: “Mandasa mpuu komiu toponturo ri ngata Korazim! Bo mandasa mpuumo komiu toponturo ri ngata Betsaida, sabana komiu ledo najea! Ane rapana kabaraka nipoviaKu ri ngatamiu, Kupovia ri ngata Tirus bo ngata Sidon natantu nasaemo kajeara, nau ira ledo toYahudi! Bo tantu nasae munimo popakeara karu bo podikara avu ri balenggara, tandana nabuku rarara bo nanjosomo nokainggu nadaa. Komiu toYahudi nikitamiu kabaraka-kabaraka haitu, tapi komiu ledo ntoto najea.

Lukas 9:10

Naupu ana-anaguru i Yesus nompatolele Kareba Belo bo nompakabelo tona nadua, nanjilimo ira. Bo pura-pura anu nipoviara hamai, nitesara ka i Yesus. Naupu haitu, ira niunaka i Yesus hau nompatani ri sangu ngata nosanga Betsaida.

Markus 8:22

Naupu sia, hau ira sampe nakava ri ngata Betsaida. Hamai naria tona nanggeni saito langgai naburo ka i Yesus. Ira nerapi mpuu ala i Yesus mantui mata ntoburo haitu bo mompakabelo matana.

Markus 6:45

Naupu haitu, kaliu-liu nitudu i Yesusmo anaguruNa mesavi sakaya, mokolu hau ri ngata Betsaida ri sambote rano. Apa Ia da mompopanjili todea hau ri ngatara mboto.

Markus 3:18

Naria muni i Andreas, i Filipus, i Bartolomeus, i Matius, i Tomas, i Yakobus ana i Alfeus, i Tadeus, i Simon lako ri partei Zelot,

Suro-Suro 1:13

Nakava ri Yerusalem, hau ira ri banua ponturora bo nompene ri tombi kalangana. Sanga nu suro-suro haitu iamo: i Petrus, i Yohanes, i Yakobus, i Andreas, i Filipus, i Tomas, i Bartolomeus, i Matius, i Yakobus ana Alfeus, i Simon Zelot topangeva pomarenta, bo i Yudas ana Yakobus.

Lukas 6:14

Tona nipelisiNa haitu iamo: i Simon nidaeNa i Petrus, i Andreas tuei i Simon, i Yakobus, i Yohanes, i Filipus, i Bartolomeus, i Matius, i Tomas, i Yakobus ana i Alfeus, i Simon lako ri partai Zelot, haitumo partai Maradeka ntoYahudi, i Yudas ana i Yakobus, ante i Yudas Iskariot, anu nompobalu i Yesus.

Yohanes 1:43

Eo kamailena i Yesus nonia hau ri bagia Galilea. Ia nompotomu i Filipus, bo niulikaNa, “Kaimo, oseakamo Yaku.”

Yohanes 1:45

Bo hau i Filipus nosinggava nte i Natanael bo niulikana, “Kami nosinggava nte tona nitesa Nabi Musa riara Buku Atura Agama bo nitesa ri Buku Nabi-nabi ntanina, haitumo i Yesus lako ri ngata Nazaret, ana i Yusuf.”

Yohanes 1:46

Tapi nesanamo i Natanael, “Ah! Ledo nisarumakaku anu nabelo meumba lako ri ngata Nazaret!” Nanguli Filipus ka ia, “Kaimo. Peinta mbotomo!” Bo hau mpuumo i Natanael.

Yohanes 1:48

Nangepe tesa haitu nanguli i Natanael ka i Yesus, “Berimba sampe nisaniMiu yaku?” Nesanamo i Yesus, “Dopame i Filipus hau nompokio iko, nikitaKumo iko hamai ri puna kayu ara.”

Yohanes 6:5

Tempo i Yesus nompeili ntiku, nikitaNa tona dea nakava nte Ia. Bo niulikaNa i Filipus, “Ri umba rakalauta mangali kandea radekei ka tona dea hitu?”

Yohanes 6:7

Nesanamo i Filipus, “Nau roatu kadeana doi salaka raalika roti, ledo magana rapakande ka tona dea hitu. Nau aga mbo sakide rabagi ka ira, ledo magana.”

Yohanes 12:22

Nangepe perapira haitu, hau i Filipus notesa ka i Andreas bo ira randua hau nanguli perapi haitu ka i Yesus.