Yakobus 1:9 - Kaili Ledo

⁹ Sampesuvu-sampesuvu sampomparasaya, ane komiu mapepa, kana madamba raramiu, sabana nau napakasi katuvumiu, Alatala nompakaoge komiu.

Yakobus 1:9 Referans Kwoze

2 Korintus 6:10

Nau kami nasaro nipakasusa, tapi kami batena nadamba. Kami napakasi, tapi kamimo anu nanggeni belo ka tona nadea. Nikita eva ledo ria nuapa-nuapa nte kami, tapi kakanana mpengaya-ngaya naria nte kami.

Pompakita 2:9

NisaniKu kasusa bo kapari nirasaimiu. NisaniKu komiu mpuu-mpuu napepa, tapi kakanana komiu nakalumana riara pomparasayamiu. NisaniKu komiu nisalai ntona anu nompangaku karona toYahudi tano ledo nakana. Ira aga todea nu Magau nu Seta.

Lukas 1:52

Magau-magau nakuasa nilelakaNa panggara, bo tona naede rara nipakaogeNa.

Filipi 3:14

Yaku mpo topangova anu ledo neili nompeinta anu ri puri tapi nangova nompetoto anu raalana. Yaku nompasimbuku njuu mangoseaka i Kristus, ala kukava hadia padagi radekei nu Alatala ka yaku ri suruga, haitumo, nipokiokaNa kita matuvu mosangu rara nte i Yesus Kristus ri suruga sampe ri kasae-saena.

Filipi 3:3

Kakanana, kitamo anu nanoa ri panggita nu Alatala, ledo ira, apa kita nombasomba Alatala ante pekeniaka Nosa GasaNa. Kita nadamba sabana kita nosangu rara nte i Yesus Kristus, bo ledo nisarumakata pompasimbukuta mboto atau tonuapa kita, ala majadi manoa ri panggita nu Alatala.

Roma 8:17

Bo ane kita mpuu-mpuu ana-ana nu Alatala, natantumo kita mantarima belo nipakasadia nu Alatala ka ana-anaNa. Kita muni mantarima pura-pura anu nipakasadia nu Alatala ka i Kristus, sabana ane kita nombarasai kasusa bo kapari mpo anu nirasaiNa, kita muni rapakaoge nasimbayu mpo Ia.

Lukas 10:20

Naupa ivesia, nee madamba raramiu sabana seta-seta natundu nte komiu. Agina madamba sabana sangamiu nitulisi riara buku nu Alatala ri suruga.”

Lukas 9:48

bo niulikaNa ira, “Isema-sema nantarima ngana hitu sabana pomparasayana Yaku, nasimbayu mpo nitarimana muni Yaku. Bo isema-sema nantarima Yaku, nitarimana muni Alatala anu nantudu Yaku. Jadi isema-sema naede rarana, iamo nalangapa panggana ri panggita nu Alatala.”

1 Petrus 2:9

Tapi sampesuvu-sampesuvu, komiu ledo mpo ira haitu. Komiumo todea nipelisi nu Alatala. Komiumo nipelisi majadi mpo topanggeni pesomba anu mantulungi magau. Komiumo todeaNa nipatani ka Ia, komiumo najadi bagiaNa. Komiu nipelisi nu Alatala mompatolele panggaviaNa anu nipokumaaka ka tona ntanina. Iamo nompokio komiu mesuvu lako ri kalandana ala matuvu riara karemeNa anu nabelo mpuu.

Lukas 14:11

Isema-sema nompakalanga rarana mboto, kana rapakaede nu Alatala. Bo isema-sema nompakaede rarana mboto, kana rapakaoge nu Alatala.”