Suro-Suro 6:3 - Kaili Ledo

³ Jadi aginapa rapelisimiu papitu tona lako nte komiu mboto radekeika bago haitu. Pelisimo tona nabelo sangana, nanoto, bo nikuasai Nosa Gasa nu Alatala, bo pura-pura bago haitu radekei kami ka ira.

Suro-Suro 6:3 Referans Kwoze

1 Timotius 5:10

Bo nisani ntonamo pokaingguna nabelo. Jonjona: nipakambasona pakabelo anana, nadamba rarana nantarima torata riara banuana, nijampangina topomparasaya, nitulungina tona nasusa, bo ia nabiasamo novia mpengaya-ngaya anu nabelo.

3 Yohanes 1:12

Pura-pura tona nantoiya i Demetrius. Lako ri pokaingguna nanoa, nisaniramo ia nangoseaka pepatuduki nakana. Kami muni nantoiya ia, bo nisanimu nuapa-nuapa niuli kami, namala raparasaya.

Yakobus 1:17

Pura-pura pedekei nabelo, anu ledo ria galona nadaa, nakava lako nte Alatala ri suruga. Ia nompajadi pura-pura anu nareme ri langi. Vayo-vayo najadi lako ri reme haitu nasaro nabali, tapi Ia ledo nabali. Ia bate-batena nabelo.

Efesus 5:18

Nee malangu, apa haitu aga mompopeumba dota rara nadaa anu mompakagero katuvumiu. Tapi komiu kana rakuasai Nosa Gasa nu Alatala.

1 Korintus 16:3

Ane makava yaku, kudekei sura popaisani ka tona anu rapelisimiu, bo ira kutudu manggeni doi petulungi lako nte komiu hau ri ngata Yerusalem.

Suro-Suro 22:12

Ri Damsyik naria tona nosanga i Ananias. Ia tona nanoa bo natutu nangoseaka Atura-atura agama anu nipapola Nabi Musa. Pura-pura toYahudi nonturo ri ngata Damsyik mpuu-mpuu nombabila ia.

Suro-Suro 10:22

Niulira, “Kami hii nitudu Kapten Kornelius tumai. Nau ia ledo toYahudi, ia tona nanoa bo ia natundu nte Alatala bo pura-pura toYahudi nombabila ia. Naria malaeka nu Alatala nantudu ia mompokio komiu hau ri banuana ala raepena anu raulimiu ka ia.”

Suro-Suro 6:6

Tona papitu haitu nikenikara ka suro-suro bo naupu nosambaya, suro-suro nombadika palera ri balengga ntona haitu mombalanti ira majadi topotulungi suro-suro.

Suro-Suro 2:4

Ira pura-pura nikuasai Nosa Gasa nu Alatala bo nompamulamo notesa ante mpengaya basa ntanina nisovadakara nangoseaka anu nidekei nu Nosa Gasa ka ira.

Suro-Suro 1:21

Bo i Petrus nompapola tesana ivei: “Sampesuvu-sampesuvu, haitumo sampe kita kana mompelisi saito tona lako nte kita mboto, ala ia mosanggani-nggani nte kita mompatolele kareba i Pue Yesus natuvu mpanjili lako ri kamateNa. Tona rapelisita haitu kana lako ri kita samporoa anu nangoseaka i Pue Yesus ri umba-umba nikalauNa bara ipia, lako ri tempo i Yohanes nompamula nombadiu tona, sampe i Yesus neore hau ri suruga.”

Matius 23:8

Tapi komiu, aga saito Gurumiu bo komiu pura-pura nosampesuvu. Jadi nee radekei tona mombabila komiu bo manggasangai komiu ‘guru’.

1 Korintus 12:8

Saito tona nidekeika nu Nosa Gasa pompakule mapande motesa. Tona ntanina nidekeika nu Nosa Gasa haitu muni pompakule mombatentei anu nipopaisani nTupu ka ia.

Suro-Suro 16:2

I Timotius nitoiya ntopomparasaya ri ngata Listra bo Ikonium pura-pura.

Suro-Suro 15:23

Jadi nitulisira santau sura rakeni ntona randua pangane. Sura haitu nanguli ivei: “Sampesuvu-sampesuvu sampomparasaya anu ledo toYahudi, anu nonturo ri ngata Antiokhia bo ri propinsi Siria bo Kilikia: Nadea tabe lako nte kami, suro-suro bo pakeni-pakeni ntodea topomparasaya.

Suro-Suro 9:30

Topomparasaya ntanina niepera i Saulus rapatesi, jadi nikeniramo ia notua hau ri ngata Kaisarea bo nitudura hau manjili ri ngata Tarsus, ngatana mboto.

Yohanes 21:23

Lako rahaitu natolelemo kareba ka topomparasaya i Yesus nanguli anaguru nipotoveNa haitu ledo mamate. Tapi ledo ivesia tesa i Yesus. Ivei niuliNa: “Ane rapana Yaku madota ia matuvu sampe Yaku makava mpanjili ri dunia hitu, haitu ledo paraluu musani.”

Suro-Suro 1:15

Naria saeo, nitasere saatu ropulu kadeara nasiromu. Neanggamo i Petrus ri tatanga nu sampesuvu sampomparasaya bo nanguli,

Suro-Suro 6:2

Sabana haitu, suro-suro sapulu randua haitu nompasiromu pura-pura topangoseaka i Yesus bo nanguli ka ira, “Ledo nabelo ane menonto kami mompatolele tesa nu Alatala aga mompakasiayu kandeamiu.

Suro-Suro 6:5

Naupu nangepe tesa nu suro-suro pangane, nasituju puramo topangoseaka i Yesus ante tesa haitu. Jadi nipelisiramo i Stefanus, saito tona naroso pomparasayana i Yesus bo muni ia nikuasai nu Nosa Gasa nu Alatala. Nipelisira muni i Filipus, bo i Prokhorus, i Nikanor, i Timon, i Parmenas, bo i Nikolaus lako ri ngata Antiokhia. Ia ledo toYahudi, tapi ia nesua agama Yahudi.

Suro-Suro 28:14

Ri sia kami nosintomu ante bara sako-ndua sampesuvu sampomparasaya, bo nikenira kami hau monturo ante ira pitu-mbongi kasaena. Naupu haitu, napolamo kami hau ri ngata Roma.