Roma 8:37 - Kaili Ledo

³⁷ Tapi nau bara nuapa-nuapa majadi nte kita, kita mpuu-mpuu padagi ante petulungi i Kristus anu nompotove kita!

Roma 8:37 Referans Kwoze

1 Korintus 15:57

Tapi kita nosukuru nte Alatala! Iamo nombakabasaka kita lako ri kuasa nu dosa bo Atura agama sampe kita majadi padagi sabana anu nipovia nTuputa Yesus Kristus!

1 Yohanes 4:4

Sampesuvu-sampesuvu nipotoveku, komiumo ana-ana nu Alatala bo nidagimiumo nabi-nabi mpodava gahaitu, sabana Nosa Gasa nu Alatala anu riara ntaimiu nakuasapa pade Magau nu Seta anu nombakuasai pekiri ntona ledo nangoseaka dota nu Alatala.

2 Korintus 2:14

Yaku nosukuru nte Alatala! Ia batena nanggeniaka kami nosanggani-nggani nte Ia bo nitulungiNa kami najadi padagi sabana kami nosangu rara ante i Kristus. NitulungiNa kami nompatolele Kareba Belo i Kristus ri umba-umba ala pura-pura tona mangepena bo mosisani nte Alatala. Bo Kareba haitu nasimbayu mpo soa navangi nasilele nienga ri umba-umba.

Pompakita 21:7

Isema-sema padagi, rakavana pura-pura anu niuliKu pangane. Bo Yakumo majadi Alatalara bo ira majadi anaKu.

Pompakita 12:11

Tapi todea sampomparasaya haitu nombadagi Magau nu Seta ante kuasa lako ri raa nu Ana Bimba anu namate nombasompo dosara. Bo nidagira ia ante pepatuduki i Yesus nipatolelera. Bo ledo nipotovera katuvura, ledo ntoto nenonto nomparasaya nau sampe rapatesi.

Yudas 1:24

Ratoiyatamo Alatala sabana Ia nakuasa nombajagai kita ala ledo rakabasakata pomparasayata. Ia nakuasa manggeni kita hau ri suruga mantingayo Ia riara kaogeNa, bo ledo maria salata, bo melabi kadamba rarata.

Galatia 2:20

Jadi namala rauli ivei: nau yaku natuvu, domo aga yaku saitoku natuvu, tapi i Kristus natuvu riara nggatuvuku. Bo ri katuvuku ri dunia hitu, yaku natuvu mpuu-mpuu nomparasaya Ana nu Alatala anu nompotove yaku bo nombadekei karoNa rapatesi manjambei yaku.

2 Korintus 12:9

Tapi niuliNa ka yaku, “Nemo. Nipotoveku iko, bo haitu naganamo ka iko. Apa ane nalente iko, kuasaKu malanto mpuumo riara nggatuvumu.” Jadi, haitumo sampe yaku nadamba nangoe anu nompopakita kalenteku, apa ane yaku nalente, kuasa i Kristus nokarajaa riara ntaiku.

Pompakita 17:14

Bo ira mosieva ante Ana Bimba. Tapi Ana Bimba mombadagi ira sabana Iamo Tupu nu pura-pura tupu bo Magau nu pura-pura magau. Bo nosanggani-nggani ante Ana Bimba haitu maria muni topangoseaka-topangoseaka Ia anu nipokioNa bo nipelisiNa, anu natutu nangoseaka Ia.”

Efesus 5:2

Bo komiu kana matuvu mompotove roa, nasimbayu mpo i Kristus nompotove kita. Lako ri toveNa haitu, nidekeiNa karoNa nipatesi ala mombatolosi kita. PoviaNa haitu nompakadamba rara nu Alatala nasimbayu mpo pesomba navangi nisomba ka Ia.

1 Yohanes 4:19

Kita nepotove sabana Alatala nokolu nompotove kita.

Yohanes 16:33

Pura-pura tesaKu pangane nitesaKu ka komiu ala matinonto raramiu sabana komiu mosangu rara nte Yaku. Ri dunia hitu komiu rapandasa. Tapi pakaroso raramiu! Apa kuasa nadaa ri dunia hitu nidagiKumo!”

Pompakita 1:5

bo lako nte i Yesus Kristus. Iamo sabi anu namala raparasaya, Iamo tona paratama nipakatuvu mpanjili lako ri kamateNa. Iamo nomparenta pura-pura magau riara dunia. Ia nompotove kita bo nombakabasaka kita lako ri dosata ante raa kamateNa.

2 Tesalonika 2:16

Alatala nompotove kita, bo lako ri kabelo nu raraNa, Ia ledo naupu-upu nompakavoe rarata, bo nidekeiNa ka kita panjarumaka nabelo. Jadi kuperapi Tuputa Yesus Kristus bo Tuamata Alatala mompakavoe bo mompakaroso raramiu ala tesamiu bo pokainggumiu batena nabelo.

Pompakita 3:9

Naria tona najadi todea Magau nu Seta anu nanguli iramo toYahudi, tano mai ledo, aga davara. Tapi epemo! Ira kana Kupopantaputu ri ngayomiu. Bo raulira Yaku mpuu-mpuu nompotove komiu.

1 Yohanes 4:10

Povia nu Alatala haitu nompopaisani tove nakana ka kita. Iveimo tove nakana: ledo kita nokolu nompotove Alatala tapi Alatala nokolu nompotove kita. Ia nompotove kita sampe nituduNa AnaNa mboto tumai mamate mombasambei kita ala dosata namala raampungi.

2 Korintus 12:19

Nipekirimiu tesa kami hitu bara aga manjaliku karo kami ri ngayomiu? Sampesuvu-sampesuvu nipotoveku, ledo ntoto nakana! Pura-pura hitu nitesa kami sabana kami nosangu rara nte i Kristus bo Alatala mboto nanggita kami. Pura-pura anu nipovia kami, nipovia ala mompakaroso pomparasayamiu.

Roma 8:35

Jadi, nuapa mamala mompopogaa kita lako ri tove i Kristus? Natantu ledo ria! Nau kita masusa atau mapari atau rapandasa ntona, nau kita maara mpai atau ledo ntoto ria pakea, nau kita rakava nu susa bara rapatesi, i Kristus bate-batena mompotove kita.