Roma 16:20 - Kaili Ledo

²⁰ Kuperapi Alatala, anu nombadekei katuvua nabelo, masalisa mompakaropu kuasa Magau nu Seta bo radekeiNa ka komiu kuasa mombadagina. Kuperapi kabelo rara nTuputa Yesus Kristus bate-batena maria nte komiu.

Roma 16:20 Referans Kwoze

Lukas 10:19

Jadi, pariaramo! Yaku mombadekei kuasa ka komiu ala rapakulemiu mombajeje ule bo supitole bo mombadagi pura-pura karoso nu balita, bo ledo ria nuapa-nuapa mamala mombakuyasi komiu.

1 Yohanes 3:8

Tapi isema-sema batena novia dosa, ia nangoseaka dota Magau nu Seta, sabana Magau nu Seta nadosa mami lako ri lamba pamulana. Patuju kakava Ana nu Alatala ri dunia ala mompakaropu povia Magau nu Seta.

Pompakita 12:10

Naupu haitu niepeku suara riara suruga namangga mpuu nanguli, “Sii-sii nakavamo gantana Alatala mompakasalama todeaNa. Sii-sii nipopakitaNamo kuasaNa, nompamulamo Ia nomparenta mpo Magau. Sii-sii nakavamo Magau Topepakasalama anu nipelisi nu Alatala mompopakita kuasaNa, sabana Magau nu Seta nipopalaimo lako ri suruga, Magau nu Seta haitumo anu nompangadu todea sampomparasaya eo bongi ri ngayo nTuputa Alatala.

Roma 15:33

Kuperapi Alatala, anu nombadekei katuvua nabelo, mombatulungi komiu pura-pura. Amin.

Pompakita 22:21

Kuperapi i Pue Yesus mombadekei belo ka pura-pura todea nu Alatala. Amin.

1 Tesalonika 5:28

Kuperapi Tuputa, Yesus Kristus bate-batena mabelo nte komiu pura-pura. Tabe lako nte yaku, Paulus

2 Tesalonika 3:18

Kuperapi Tuputa Yesus Kristus bate-batena mabelo nte komiu pura-pura. Tabe lako nte yaku, Paulus

Roma 8:37

Tapi nau bara nuapa-nuapa majadi nte kita, kita mpuu-mpuu padagi ante petulungi i Kristus anu nompotove kita!

Filemon 1:25

Kuperapi komiu pura-pura mombarasai kabelo rara nTuputa Yesus Kristus. Tabe lako nte yaku, Paulus

Filipi 4:23

Kuperapi Tuputa Yesus Kristus bate-batena mabelo nte komiu. Amin. Tabe lako nte kami, Paulus bo Timotius

Galatia 6:18

Sampesuvu-sampesuvuku, kuperapi Tuputa Yesus Kristus bate-batena mabelo nte komiu. Amin. Tabe lako nte yaku, Paulus

1 Korintus 16:23

Kuperapi i Pue Yesus mombadekei belo ka komiu.

2 Timotius 4:22

Kuperapi i Pue Yesus momporoa iko, Timotius. Kuperapi Ia bate-batena mabelo nte komiu pura-pura. Tabe lako nte yaku, Paulus

Roma 16:23

Tarima muni tabe lako nte i Gayus. Yaku i Paulus, nipalogana nonturo ri banuana, bo topomparasaya ri sii muni biasa nasiromu nodade ri banuana. Tarimamo tabe lako nte i Erastus, topompasiayu doi ri ngata hitu. Bo tarima muni tabe lako nte sampesuvuta i Kwartus.

Matius 4:10

Tapi nesanamo i Yesus ka ia, “He, Magau nu Seta! Palaimo iko lako ri sii. Sabana nitulisi riara Buku Gasa ivei: ‘Komiu kana mombasomba Alatala, Tupumiu. Aga Iamo masipato rapetupumiu.’”

Roma 16:24

[Kuperapi Tuputa Yesus Kristus bate-batena mabelo nte komiu pura-pura. Amin.]