Pompakita 4:11 - Kaili Ledo

¹¹ “O, Alatala, Tupu kami, aga Komiu masipato ratoiya bo rabila kami. Aga Komiumo nakuasa, Komiumo nompajadi pura-pura anu naria. Bo lako ri dotaMiu mboto sampe pura-pura haitu nipajadi bo naria.”

Pompakita 4:11 Referans Kwoze

Pompakita 5:12

Bo nodademo ira ante suara namangga ivei: “Ana Bimba anu nipatesi nggaulu, masipato ratesata kuasaNa bo kakalumanaNa, notoNa bo kabarakaNa. Iamo masipato rabila bo ratoiya bo rapakaoge.”

Pompakita 10:6

Bo nojanjimo ia ante sanga nu Alatala anu natuvu sampe ri kasae-saena, anu nompajadi langi, tana bo tasi bo pura-pura isina. Nanguli malaeka haitu, “Tempona domo rakonto-konto.

Pompakita 14:7

Notesamo ia ante suara namangga, “Bilamo Alatala, bo tesamo kaogeNa! Apa nakavamo tempona Alatala mombatangara manusia! Petupumo nte Alatala anu nompajadi langi, tana bo tasi bo pura-pura mata nu uve!”

Pompakita 5:9

Totua-totua gahaitu nodade sanggayu dade nabaru ka Ana Bimba ivei: “Komiumo masipato mangala sura haitu bo mombabuka populuna. Sabana, Komiu nipatesi bo ante raa nggamateMiu haitu nitoloMiu manusia lako ri njumangu dunia majadi todea nu Alatala, haitumo tona lako ri pura-pura ngata, bo lako ri pura-pura valaa bo tona lako ri mpengaya-ngaya basa ri dunia.

Ibrani 1:10

Bo Alatala nanguli muni ka AnaNa ivei: “Pue, Iko nompajadi dunia ri ulu jadina, Bo langi muni asele mpaleMu.

Roma 11:36

Apa pura-pura anu naria, nopuna lako nte Alatala bo natuvu lako ri kuasaNa bo Iamo Tupuna. Iamo masipato ratoiyata bo rabilata sampe ri kasae-saena! Amin!

Efesus 3:9

Yaku nidekeika pokarajaa muni mompopaisani ka pura-pura tona berimba Alatala nompakadupa niaNa, haitumo, niaNa mompopakasangu toYahudi bo tona ledo toYahudi lako ri posangu rarara nte i Kristus. Lako ri lamba pamulana, Alatala Topompajadi dunia hitu dopa nompopaisani niaNa haitu.

Suro-Suro 14:15

“Nemo! Nee mpuu rasombamiu kami! Kami hii manusia biasa nasimbayu mpo komiu! Kami nakava ri sii mompatolele Kareba Belo ka komiu ala komiu mompalaisi kabiasamiu anu ledo naria gunana, evamo nombasomba viata-viata. Komiu kana metupu nte Alatala anu natuvu sampe ri kasae-saena. Iamo nompajadi langi, tana, tasi, bo pura-pura isina.

Suro-Suro 17:24

Alatala nompajadi dunia bo pura-pura isina. Iamo Tupu nu langi bo tana. Bo Ia ledo nonturo ri banua pesomba nipovia nu manusia.

Pompakita 5:2

Bo nikitaku naria saito malaeka naroso mpuu nakava nekutana ante suara namangga, “Isema masipato mombabuka populu sura bo mombavole sura hitu?”

Ibrani 1:2

Tapi ri tempo nggapuri hitu AnaNa mbotomo nompasimbayu tesaNa ka kita. AnaNa haitu nipopale nu Alatala nompajadi dunia, bo Alatala nompakatantu AnaNa haitumo masipato majadi tupuna pura-pura anu naria.

Pompakita 1:6

Kita nipajadiNa todea riara poparentaNa, kita nipajadiNa topanggeni pesomba anu manggeni pesomba ka TuamaNa Alatala. Masipato i Yesus ratoiya bo rabila, bo masipato Ia momparenta sampe ri kasae-saena! Amin!

Pompakita 19:1

Naupu haitu yaku i Yohanes, nangepe moni mpo suara ntona dea novoo nongare-ngare ri suruga. Niulira, “Haleluya! Ratoiyamo Alatala! Sabana Iamo nompakasalama kita. Iamo Alatala anu naoge bo nakuasa!