Pompakita 21:10 - Kaili Ledo

¹⁰ Bo yaku nikuasai Nosa Gasa nu Alatala bo nikeni nu malaeka hau ri bavo bulu anu nambaso bo nalanga. Lako ri bavo bulu haitu nituduakana ka yaku ngata nu Alatala anu nosanga ngata Yerusalem nanau lako nte Alatala ri suruga.

Pompakita 21:10 Referans Kwoze

Pompakita 21:2

Bo nikitaku muni ngata nu Alatala, ngata Yerusalem nabaru nanau lako nte Alatala ri suruga. Nagaya mpuu ngata haitu mpo boti mombine nopakea nagaya nasadia raala boti langgai.

Pompakita 17:3

Naupu haitu yaku nikuasai Nosa Gasa nu Alatala bo nikeni nu malaeka haitu hau ri karava bai. Hamai nikitaku saito mombine nesavi binata nalei buluna. Ri njumangu karo nu binata haitu nitulisi tesa-tesa anu nompandaente Alatala. Binata haitu muni nobalengga papitu bo notandu sapulu.

Pompakita 1:10

Ri eo petupu yaku nikuasai Nosa Gasa nu Alatala, bo niepeku suara lako ri puriku namangga mpo moni ntabue.

Suro-Suro 8:39

Nesore ira lako riara nu uve, Nosa Gasa nu Alatala nangala i Filipus lako ri sia bo domo nikita ntoEtiopia. ToEtiopia haitu nompapola polipana bo nadamba mpuu rarana.

Pompakita 4:2

Sampesanika yaku nikuasai Nosa Gasa nu Alatalamo bo nikeniNa yaku hau ri suruga. Nakava hamai, nikitaku sangu Gadera Kamagaua, bo naria saito Toponturo ri Gadera haitu.

Galatia 4:26

Tapi i Sara nirapaka Yerusalem ri suruga. I Sara nireke tinata, sabana ia ledo najadi batua, bo kita ledo nipobatua nu Atura agama.

Pompakita 3:12

Isema-sema padagi, ia masimbayu mpo tinja naroso ri banua nTuamaku Alatala. Ia matetida ri suruga sampe ri kasae-saena. Bo ri karona Kutulisi sanga nTuamaku Alatala, bo sanga nu ngata nTuamaku Alatala, haitumo Yerusalem nabaru anu manau lako nte Tuamaku Alatala ri suruga. Bo sangaKu mboto nabaru kana Kutulisi ri karona.

Pompakita 11:2

Tapi nee mureke kaluona doyata ri savaliku BanuaKu, sabana doyata haitu nidekei ka tona ledo nomparasaya i Yesus. Talu-mpae santanga kasaena ira mombakuasai ngataKu Yerusalem.