Matius 5:14 - Kaili Ledo

¹⁴ Komiu nasimbayu eva reme nombavanta dunia. Ngata ri bavo bulu ledo namala ratabuniaka.

Matius 5:14 Referans Kwoze

Filipi 2:15

ala malanto ka pura-pura tona komiu ana-ana nu Alatala nabelo, anu ledo rasalai ntona. Komiu natuvu nanoa ri tatanga manusia natenggo bo nadaa nasimbayu mpo betue-betue nombavanta kalandana.

Yohanes 8:12

Naupu haitu nanguli vaimo i Yesus ka todea, “Yakumo hii reme dunia. Isema-sema mangoseaka Yaku ledo matuvu ri kalandana, tapi manggava reme anu mombadekei katuvua mabelo.”

1 Tesalonika 5:5

Komiu pura-pura natuvu ri karemena, komiu nokainggu nabelo mpo tona nolipa eona. Kita ledo natuvu ri kalandana, kita ledo mpo tona nokainggu nadaa bongina.

Yohanes 12:36

Parasayamo Yaku kamba da naria nosanggani-nggani ante komiu nompakareme dunia ala komiu batena matuvu riara reme.” Naupu i Yesus notesa ivesia, nalaimo Ia lako nte todea bo domo nadota Ia rakitara.

2 Korintus 6:14

Nemo mosangu rara nte tona ledo topangoseaka i Kristus. Ledo ntoto masipato. Berimbamo? Masipato tona nangoseaka dota nu Alatala masintuvu ante toposapuaka Alatala? Mamala reme ragalo ante landa?

Yohanes 5:35

I Yohanes Topediu haitu nasimbayu mpo poindo nevangga bo nanggeni reme ka komiu. Bo komiu nadamba mpuu nangepe tesana. Tapi kadamba nu raramiu haitu aga sampalai.

Pompakita 1:20

Dopa nisanimu batuana pitu-angu betue nikitamu ri pale ngganaKu hitu bo pitu nggada poindo bulava. Jadi kupakalanto batuana ivei: pitu-angu betue haitu nirapaka papitu malaeka anu nanggeniaka todea topomparasaya anu nonturo ri pitu-ngata. Bo pitu nggada poindo bulava haitu nirapaka todea topomparasaya anu naria ri pitu-ngata haitu.”

Yohanes 9:5

Sanggariana Yaku riara dunia hitu, Yakumo reme anu nompakareme pekiri nu manusia.”

Pompakita 2:5

Nakavao ntotomo kanavumiu! Haitu sampe Kuuli ka komiu, pakabelo-belo! Kajeamo komiu, bo poviamo mpo anu nipoviamiu ri pamulana. Ane ledo majea komiu, Kualasi kada mpoindo bulavamiu lako ri ponturona.