Matius 23:26 - Kaili Ledo

²⁶ Komiu mpuu-mpuu eva tona naburo! Pegasa ntanimo ruru rara nu boda ala bagia savalikuna muni majadi magasa!

Matius 23:26 Referans Kwoze

Yakobus 4:8

Pekitulungimo nte Alatala bo Alatala mpuu-mpuu mombatulungi komiu. Komiu topovia dosa, tumo movia dosa. Komiu toporompenga pekiri, pakasangumo pekirimiu mangoseaka Alatala.

2 Korintus 7:1

Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

Ibrani 10:22

Jadi kita kana metupu nte Alatala ante rarata naliangu bo pomparasayata ledo nolengga-lengga. Apa rara ntaita nipakagasamo ante raa i Kristus, jadi nisanita domo ria salata. Kita nidiu ante uve gasa, tandana kita nipakagasaNamo.

Matius 12:33

Ane kayu nabelo, nabelo muni vuana. Ane kayu ledo nabelo, ledo muni nabelo vuana. Kabelo nu kayu nikita ri vuana.

Lukas 6:45

Ivesia muni manusia. Tona nabelo, nabelo muni pokaingguna bo potesana, sabana pekiri rara ntaina nabelo. Bo tona nadaa, pokaingguna bo potesana muni nadaa sabana pekiri rara ntaina nadaa. Apa tesa nisovadakana nopuna lako ri pekiri rara ntaina.”

Matius 14:8

Nangepe tesa i Herodes haitu, i Herodias nantudu anana merapi ivei: “Keni ka yaku ri sii balengga i Yohanes Topediu nituu ri dula.”

Markus 7:4

Ivesia muni ane ira manjili lako ri potomu. Dopame ira nangande, kana nipegasara ntani karora pade mamala mangande. Bo nadea muni ada-ada ntanina nioseakara. Evamo, cara motoposi boda, jolo, kura, bo paturu.

Lukas 11:39

Haitu sampe i Yesus nanguli ka ia, “Komiu toFarisi nangoseaka ada-ada agama anu nikita ntona, tapi raramiu nadaa bo nainoka mbara-mbara ntona ntanina. Komiu nasimbayu mpo tona notoposi boda bo suraya ri savalikuna tapi riarana bate-batena natagara!