Matius 21:15 - Kaili Ledo

¹⁵ Tapi balengga-balengga ntopanggeni pesomba bo guru-guru agama naraumo rarara nanggita kabaraka-kabaraka nipovia i Yesus. Bo nagigimo rarara nangepe ngana-ngana ri Banua nu Alatala nongare-ngare, “Hosana! Ratoiyamo Muli Magau Daud!”

Matius 21:15 Referans Kwoze

Matius 21:9

Bo todea ri kolu i Yesus ante topetuntuni ri puri nongare-ngare, “Hosana! Ratoiyamo Muli Magau Daud! Maoge belo ka Magau anu nakava niposumba nu Alatala! Ratoiyamo Alatala ri suruga!” Mazmur 118:25-26

Yohanes 12:19

Nanggita haitu, nosimpotesamo toFarisi, “Nidagimo kita! Peinta vei! Pura-pura tona ri dunia hau nangoseaka Ia!”

Yohanes 11:57

Tapi balengga-balengga ntopanggeni agama bo toFarisi lave niulira mami, “Isema-sema nangisani ponturo i Yesus, kana raulina ka kami ala Ia mamala rasaka!”

Yohanes 7:42

Apa riara Buku Gasa nitulisi Magau Topepakasalama meumba lako ri muli Magau Daud, bo makava lako ri ngata Betlehem ngata nipompoanaka Magau Daud.”

Yohanes 4:1

ToFarisi nangepe lelena nadeamo tona hau nekidiu nte i Yesus ala majadi topangoseaka Ia sampe nadeapa topangoseaka i Yesus pade i Yohanes Topediu.

Lukas 22:66

Naeo mpadondo nasiromumo tona ri Polibu Mbaso Agama Yahudi, haitumo totua-totua ntoYahudi, balengga-balengga ntopanggeni pesomba, bo guru-guru agama. Pade nikenira i Yesus hau ri ngayo ntoPolibu haitu.

Lukas 20:1

Naria saeo i Yesus nompaguru bo nompatolele Kareba Belo ka todea ri doyata Banua nu Alatala. Sampesanika nakavamo balengga-balengga ntopanggeni pesomba, guru-guru agama bo totua-totua ntoYahudi

Markus 11:18

Balengga-balengga ntopanggeni pesomba bo guru-guru agama nangepe anu najadi haitu. Jadi nieloramo dala mompatesi i Yesus. Naeka rarara nanggita Ia, sabana pura-pura tona nokumaa nangepe pepatudukiNa.

Matius 27:20

Tapi balengga-balengga ntopanggeni pesomba bo totua-totua ntoYahudi nompakapane rara ntodea ala raperapira i Pilatus mombakabasaka i Barabas ka ira, bo i Yesus rahuku mate.

Matius 27:1

Naeo mpadondo, nasadondo mpuu, balengga-balengga ntopanggeni pesomba bo totua-totua ntoYahudi nasiromu nompakatantu i Yesus kana rapatesi.

Matius 26:59

Tempo haitu balengga-balengga ntopanggeni pesomba bo pura-pura topolibu ntanina ri Polibu Mbaso Agama Yahudi nompasimbuku mangelo tona nasadia mosabi dava ala i Yesus mamala rahuku mate.

Matius 26:3

Tempo haitu balengga-balengga ntopanggeni pesomba bo totua-totua ntoYahudi nasiromu ri banua nu Pakeni nTopanggeni Pesomba anu nosanga i Kayafas.

Matius 22:42

“Berimba panggavamiu? Muli isema Magau Topepakasalama anu nijanji nu Alatala nggaulu?” Nesana ira, “Muli Magau Daud nggaulu.”

Matius 21:23

I Yesus nesua riara doyata Banua nu Alatala bo nompaguru. Da ranja nompaguru Ia, nakavamo balengga-balengga ntopanggeni pesomba bo totua-totua ntoYahudi. Ira madota mangelo saba, jadi nipekutanara nte i Yesus, “Ante kuasa nuapa nipoviaMiu pura-pura haitu ri Banua nu Alatala? Isema nombadekei kuasa haitu ka Komiu?”

Matius 9:27

Tempo i Yesus nompapola polipaNa, naria randua toburo nantuntuni Ia bo nongare-ngare, “Muli Magau Daud! Poasimo kami!”

Matius 20:24

Tempo sapulu anaguru i Yesus ntanina nangepe perapi roara randua, naraumo rarara.