Matius 14:24 - Kaili Ledo

²⁴ Tapi tempo haitu, sakaya anu nipesavi nu ana-anaguruNa nakavaomo lako ri kabatana, ri tatanga ranomo. Sakaya haitu ntompe-ntompena nikeni balumba mbaso sabana poiri mbaso nantomu sakayara haitu.

Matius 14:24 Referans Kwoze

Yohanes 6:18

Tempo haitu nakavamo poiri narimboso sampe nambasomo balumba rano.

Markus 6:48

NikitaNa nandasamo anaguruNa nombavose sakayara sabana poiri narimboso nantomunaka ira. Nitasere tinti tatalu bobayana, nakavamo i Yesus nolipa ri bavo nu uve bo Ia madota mombaliunaka ira.

Matius 8:24

Tempo ira nosakaya sampesani nakavamo poiri narimboso nompakambaso balumba ri rano. Sakidepa natala sakayara nitompe balumba mbaso. Tempo haitu i Yesus naluru namonjo.

Suro-Suro 11:24

I Barnabas haitu tona nabelo rarana, bo nikeniaka Nosa Gasa nu Alatala. Naroso mpuu pomparasayana. Bo nadea tona ri Antiokhia nikenina nomparasaya i Pue Yesus.

Suro-Suro 27:4

Lako ri sia kami nompapola polipa kami. Tapi kapala kami nosintomuka poiri, jadi kami nomparinjoso ri bivi ntalinti levuto Siprus anu natelendu sakide lako ri poiri haitu.