Matius 1:18 - Kaili Ledo

¹⁸ Iveimo tesa pompoanaka i Yesus Kristus. TinaNa i Maria anu nijanji moberei ante langgai nosanga i Yusuf. Tapi dopame ira noberei, natianamo i Maria lako ri kuasa Nosa Gasa nu Alatala.

Matius 1:18 Referans Kwoze

Ibrani 10:5

Haitu sampe tempo i Kristus nakava ri dunia hitu, Ia nanguli ka Alatala ivei: “O Pue Alatala, ledo nipodotaMiu pesomba bo pedekei, Ledo nipokonoMiu pesomba nipalabu bo pedekei-pedekei nidekei raposompo dosa. tapi naria karoKu mboto nipakasadiaMiu.

Ibrani 7:26

Jadi i Yesusmo Pakeni nTopanggeni Pesomba anu nompakule nombatulungi kita. Ia nagasa, ledo ntoto ria salaNa atau dosaNa. Ia nitaniaka lako ri tona nadosa, bo Ia nioretaka sampe ri ponturo nalangapa pade pura-pura anu naria ri langi, haitumo ri suruga.

Lukas 1:25

I Elisabet nanguli, “Ivesia tano kabelo i Pue nte yaku. Ia nompakalipo eya nu mataku lako ri kagampaku.”

Matius 1:1

Iveimo sunju nu muli ntotua i Yesus Kristus, muli Magau Daud, muli i Abraham:

Matius 2:11

Bo nesuamo ira riara nu banua bo nikitara ngana kodi haitu ante tinana i Maria. Bo nantaputumo ira nombasomba Ia. Naupu haitu nibukaramo peti pomboli kakalumanara, bo nidekeira ka Ia pedekei-pedekeira, haitumo bulava, bo rongaya lana dupa nasuli mpuu alina, haitumo kemenyan bo mur.

Matius 12:46

Tempo i Yesus da notesa-tesa ka todea haitu, nakavamo tinaNa bo sampesuvuNa. Ira neangga ri savalikuna madota motesa ante Ia.

Lukas 2:5

I Yusuf hau nosanggani-nggani nte tengeana i Maria anu da natiana, ala sangara ratulisi hamai.