Matius 1:1 - Kaili Ledo

¹ Iveimo sunju nu muli ntotua i Yesus Kristus, muli Magau Daud, muli i Abraham:

Matius 1:1 Referans Kwoze

Galatia 3:16

Ivesia muni ante pojanji nu Alatala. Ia nombadekei pojanjiNa ka i Abraham bo mulina. Riara Buku Gasa ledo nitulisi belo haitu radekei “ka muli-mulimu”, batuana, ka muli dea i Abraham. Anu nitulisi, belo haitu radekei “ka mulimu”, batuana ka saito muli i Abraham, haitumo i Yesus Kristus.

Roma 1:3

Kareba Belo haitu notesaki Ana nu Alatala, haitumo Tuputa Yesus Kristus. I Yesus najadi manusia apa Ia nipoanaka lako ri muli Magau Daud. KagasaNa nasimbayu nte kagasa nu Alatala sabana Ia Ana nu Alatala mami. Nisanita Ia mpuu-mpuu Ana nu Alatala sabana Alatala nompakatuvu Ia mpanjili lako ri kamateNa ante kuasa nipokumaaka.

Pompakita 22:16

“Yaku i Yesus, nombatudu malaekaKu hau mompopaisani petevaiKu hitu ka komiu todea topangoseaka Yaku. Yakumo hii muli bo valaa Magau Daud. Yakumo hii betue pompaeo anu nareme.”

Yohanes 7:42

Apa riara Buku Gasa nitulisi Magau Topepakasalama meumba lako ri muli Magau Daud, bo makava lako ri ngata Betlehem ngata nipompoanaka Magau Daud.”

Suro-Suro 2:30

Alatala nojanji bo nipakarosoNa ante sumpa, kana maria saito lako ri muli i Daud mboto raanggataka majadi magau bara maipia. Nisani i Daud pojanji haitu bo ia muni nabi, jadi nisanina anu rapovia nu Alatala. Nibotona Magau Topepakasalama anu nijanji nu Alatala matuvu mpanjili lako ri kamateNa. I Daud nanguli: ‘Ia ledo rapalamba maboli ri ponturo ntomate, karobataNa ledo maboli riara dayo sampe mapopo majadi avu.’ Mazmur 16:10

Matius 1:18

Iveimo tesa pompoanaka i Yesus Kristus. TinaNa i Maria anu nijanji moberei ante langgai nosanga i Yusuf. Tapi dopame ira noberei, natianamo i Maria lako ri kuasa Nosa Gasa nu Alatala.

Roma 9:5

Ira muli i Abraham, i Ishak bo i Yakub, totua toIsrael nggaulu anu nipelisi nu Alatala. Bo tempo i Kristus najadi manusia, Ia nipoanaka lako ri muli ntoIsrael. Iamo nombakuasai pura-pura. Iamo Alatala anu masipato ratoiya sampe ri kasae-saena. Amin!

Roma 4:13

Tempo nggaulu Alatala nojanji ka i Abraham bo muli-mulina, dunia majadi bagiara. Alatala nojanji ivesia ledo sabana i Abraham nangoseaka Atura-atura agama, tapi sabana niparasayana Alatala bo Alatala nombareke ia nanoa ri panggitaNa.

Matius 15:22

Naria saito mombine toKanaan, tona ledo toYahudi, nonturo ri bagia haitu. Ia nakava nte i Yesus bo nongare-ngare ivei: “Pue, Muli Magau Daud! Poasimo yaku hii! Anaku mombine nipesua seta sampe nandasa mpuumo ia!”

Matius 9:27

Tempo i Yesus nompapola polipaNa, naria randua toburo nantuntuni Ia bo nongare-ngare, “Muli Magau Daud! Poasimo kami!”

Matius 3:16

Naupu nidiu, nesoremo i Yesus lako ri uve. Bo eva nisuka tempona haitu muni langi natebuka bo nikitaNa Nosa Gasa nu Alatala nolenje mpo tonji banggebodo nanau bo netuu nte Ia.

Matius 1:2

i Abraham nomulika i Ishak, i Ishak nomulika i Yakub, i Yakub nomulika i Yehuda ntali sampesuvu,

Lukas 1:33

Ia momparenta toYahudi mpo Magau sampe ri kasae-saena. Bo poparentaNa haitu ledo maupu-upu.”

1 Timotius 2:5

haitumo, Alatala aga saito, bo aga saito muni topetariolo anu nompoposinggabelo Alatala bo manusia. Topetariolo, Iamo i Yesus Kristus.

2 Timotius 2:8

Ane murasai kasusa, toramo i Yesus Kristus, muli Magau Daud. Ia namate bo natuvu mpanjili evamo anu nitesa riara Kareba Belo nipatoleleku.