Lukas 7:34 - Kaili Ledo

³⁴ Yaku, Ana nu Manusia nakava nangande bo nanginu mpo tona biasa, bo niulimiu ivei: ‘Peintamo tona haitu! Nadoko, nalangu, vega ntopesingara balasitee bo vega ntodosa!’

Lukas 7:34 Referans Kwoze

Lukas 15:2

Nanggita haitu, toFarisi bo guru agama nongau. “Hm! Ledo nabelo tona hitu! Ia nosimporoa ante tona nadaa bo nangande singgani nte ira!”

Yohanes 12:2

Hamai nipovia posusa mombabila i Yesus. I Marta nantulungi nanggeni kandea ka toposusa bo i Lazarus nonturo ri tatangara nangande nosanggani-nggani ante i Yesus.

Lukas 19:7

Tapi pura-pura tona nanggita i Yesus hau ri banua i Zakheus, nongua-ngua. “Hm, ledo nabelo i Yesus nesai ri banua ntodosa!”

Lukas 14:1

Naria saeo ri eo penonto, i Yesus hau nangande ri banua pakeni ntoFarisi. Tona ri sia nompariara nuapa rapovia i Yesus.

Lukas 7:36

Naria saito toFarisi nosanga i Simon. Nigagana i Yesus mangande ri banuana. Jadi haumo i Yesus ri banuana, nonturo bo nangande.

Lukas 5:29

Naupu sia, i Lewi novia posusa ka i Yesus ri banuana. Nadea topesingara balasitee ante tona ntanina nangande nosanggani-nggani nte ira ri posusa haitu.

Matius 9:11

Sampanggita haitu, nangulimo bara sako-ndua toFarisi ka anaguru i Yesus, “Nakuya gurumiu nangande nosanggani-nggani ante topesingara balasitee bo tona nadosa?”

Yohanes 2:2

I Yesus bo anaguruNa muni nigaga hau ri posusa haitu.

Lukas 11:37

Naupu i Yesus notesa, naria saito toFarisi nombagaga Ia hau mangande ri banuana, jadi hau mpuumo Ia.

Matius 5:46

Ane komiu aga mompotove tona nompotove komiu, natantumo komiu ledo masipato ratoiya nu Alatala. Apa nau topesingara balasitee nadaa ingguna, nompotove tona anu nompotove ira.

Matius 11:19

Yaku, Ana nu Manusia nakava nangande bo nanginu uve anggur eva tona biasa, tapi niuli ntona, ‘Peintamo tona haitu! Nadoko, nalangu, vega ntopesingara balasitee bo vega ntodosa!’ Tapi nau ivesia, nisanita kanoto nia nu Alatala sabana aselena nikita ri pokainggu ntopangoseaka Ia.”

Lukas 7:33

Ivesia muni najadi nte kami bo i Yohanes. I Yohanes nakava, nopuasa ledo nangande, bo ledo muni nanginu uve anggur, bo niulimiu ia nipesua nu seta!

Lukas 7:35

Tapi naupa ivesia, rasanita kanoto nia nu Alatala apa aselena rakita ri pokainggu ntopangoseaka Ia.”