Lukas 6:14 - Kaili Ledo

^14-16 Tona nipelisiNa haitu iamo: i Simon nidaeNa i Petrus, i Andreas tuei i Simon, i Yakobus, i Yohanes, i Filipus, i Bartolomeus, i Matius, i Tomas, i Yakobus ana i Alfeus, i Simon lako ri partai Zelot, haitumo partai Maradeka ntoYahudi, i Yudas ana i Yakobus, ante i Yudas Iskariot, anu nompobalu i Yesus.

Lukas 6:14 Referans Kwoze

Suro-Suro 1:13

Nakava ri Yerusalem, hau ira ri banua ponturora bo nompene ri tombi kalangana. Sanga nu suro-suro haitu iamo: i Petrus, i Yohanes, i Yakobus, i Andreas, i Filipus, i Tomas, i Bartolomeus, i Matius, i Yakobus ana Alfeus, i Simon Zelot topangeva pomarenta, bo i Yudas ana Yakobus.

Matius 4:21

Lako ri situ napolamo i Yesus sampe nikitaNa randuapa tona ntali sampesuvu, haitumo i Yakobus bo i Yohanes, ana-ana i Zebedeus. Tempo haitu ira nompakabelo jalara riara sakaya nosanggani ante tuamara i Zebedeus. I Yesus nompokio ira randua mangoseaka Ia.

Matius 4:18

Naria sanggani i Yesus nolipa ri tinggi Rano Galilea. NikitaNa hamai randua tona ntali sampesuvu, haitumo i Simon, anu nidae i Petrus, ante tueina i Andreas. Tempo haitu ira nantendeaka jala mompemala bau ri rano haitu sabana ira topebau mami.

2 Petrus 1:1

Sampesuvu-sampesuvuku anu mpuu-mpuu nomparasaya i Yesus Kristus, nasimbayu mpo kami. Iamo Alatala bo Topompakasalama kita, anu nompopompakule pura-pura kita nomparasaya sabana Ia nanoa bo ledo nompelenje. Sura hitu lako nte yaku, i Simon Petrus. Yaku batua bo suro i Yesus Kristus.

Suro-Suro 12:2

Nituduna tona mompatesi i Yakobus, sampesuvu i Yohanes, ante guma.

Yohanes 14:8

Nanguli i Filipus ka i Yesus, “Pue, popakita ka kami TuamaMiu ala maosa rara kami.”

Yohanes 6:8

Pade saito anaguruNa ntanina anu nosanga i Andreas, sampesuvu i Simon Petrus, nanguli

Yohanes 6:5

Tempo i Yesus nompeili ntiku, nikitaNa tona dea nakava nte Ia. Bo niulikaNa i Filipus, “Ri umba rakalauta mangali kandea radekei ka tona dea hitu?”

Yohanes 1:45

Bo hau i Filipus nosinggava nte i Natanael bo niulikana, “Kami nosinggava nte tona nitesa Nabi Musa riara Buku Atura Agama bo nitesa ri Buku Nabi-nabi ntanina, haitumo i Yesus lako ri ngata Nazaret, ana i Yusuf.”

Lukas 5:10

Ivesia muni roa i Simon, haitumo i Yakobus bo i Yohanes, ana i Zebedeus. Nanguli i Yesus ka i Simon, “Nee maeka. Komiu topebau mami, tapi nompamula sii-sii komiu mompaelo tona bo mompatuduki ira mangoseaka Yaku.”

Lukas 5:8

Tempo i Simon Petrus nanggita haitu, nantaputumo ia ri ngayo i Yesus bo nanguli, “Nee mapara nte yaku, Pue, apa yaku tona nadosa!”

Markus 14:33

NikeniNa i Petrus, i Yakobus bo i Yohanes hau mosanggani nte Ia. Nasusa bo napari mpuu raraNa.

Markus 9:2

Ono-mbongi kaliuna haitu, i Yesus nanggeni i Petrus, i Yakobus bo i Yohanes nosanggani-nggani nantende hau ri bulu nalanga. Aga i Yesus ante ira tatalu hamai. Tempo ira hamai, nikitara nabalimo lenje i Yesus ri ngayora.

Markus 5:37

Bo ledo nidekei i Yesus tona dea mantuntuni Ia hau ri banua i Yairus. Aga i Petrus, i Yakobus bo i Yohanes nidekeiNa hau mosanggani nte Ia.

Markus 1:29

I Yesus ante topangoseaka-topangoseaka Ia nompalaisi banua petupu haitu bo kaliu-liu hau ri banua i Simon bo Andreas. I Yakobus bo i Yohanes muni hau nosanggani nte ira.

Markus 1:19

Napolamo i Yesus sakidepa, bo nikitaNa i Yakobus, ana i Zebedeus, ante tueina i Yohanes riara sakayara nompakabelo jalara.

Matius 10:2

Sanga sapulu randua anaguru anu nisuroNa haitumo, Pamulana i Simon anu nosanga muni i Petrus; bo i Andreas, tuei i Petrus; i Yakobus bo i Yohanes ana-ana i Zebedeus; i Filipus; bo i Bartolomeus; i Tomas; bo i Matius topesingara balasitee; i Yakobus ana i Alfeus; i Tadeus; i Simon, saito lako ri partai Zelot, haitumo partai maradeka ntoYahudi; bo i Yudas Iskariot anu nompobalu i Yesus ka baliNa.

Markus 3:16

Hitumo sangara sapulu randua haitu: i Simon anu nipoposangaNa i Petrus,

Lukas 6:13

Naeo mpadondo, nipasiromuNa puramo tona nangoseaka Ia, pade nipelisiNa sapulu randua lako nte ira majadi anaguruNa, ala ira mompapola tesa nu Alatala ka todea.