Lukas 12:33 - Kaili Ledo

³³ Jadi pobalumo mbara-mbaramiu bo dekeimo alina haitu ka tona napakasi. Poviamo batutu doi anu ledo mamala magero. Batuana, poviamo anu mompakadamba rara nu Alatala. Ivesiamo komiu momboli kakalumana ri suruga, anu ledo maupu-upu bo ledo rapangangga ntona atau rakandesi nu saipa.

Lukas 12:33 Referans Kwoze

Matius 19:21

Nesana i Yesus, “Ane iko mpuu-mpuu madota majadi mabelo bo masipato manggava katuvua nabelo sampe ri kasae-saena, koimo pobalu puramo kakalumanamu bo dekei alina haitu ka tona napakasi ala mukava kakalumana ri suruga. Maupu haitu oseakamo Yaku!”

Lukas 18:22

Nangepe haitu, nangulimo i Yesus ka ia, “Da naria sangayapa kana mupovia. Pobalu pura-pura kakalumanamu bo dekei alina haitu ka tona napakasi ala mukava kakalumana ri suruga. Maupu sia, oseakamo Yaku!”

Suro-Suro 2:45

Nasaro naria ira nompobalu kakalumanara bo mbara-mbarara, bo doina haitu nibagi-bagi ka ira pura nangoseaka anu niparaluura.

Lukas 16:9

Kuuli ka komiu, pakemo kakalumana ri dunia hitu mombatulungi tona ntanina, ala tempona kakalumana dunia domo maria gunana, komiu ratarima nu Alatala ri ponturo anu batena sampe ri kasae-saena ri suruga.

Lukas 12:21

Kaupu tesa haitu i Yesus nanguli, “Ivesiamo majadi nte tona nompasimbuku nompasiromu kakalumana ka karona mboto, tapi katuvuna napakasi ri panggita nu Alatala.”

2 Korintus 8:2

Nandasa mpuu kasusa bo kapari nirasaira, bo ira mboto napakasi mpai. Tapi naupa ivesia, nelabi kadambara sampe ledo mpuu natove rarara nombadekei ka tona ntanina.

Yohanes 12:6

Kakanana ledo tona napakasi nitora i Yudas, tapi aga karona mboto apa ia topelea. Iamo anaguru anu niparasaya nombaboli doira, bo sanggani-sanggani nipeleana doi haitu. Haitu sampe niulina ivesia.

Lukas 11:41

Dekeimo ka tona napakasi ante belo rara bo ivesiamo pura-pura majadi magasa ka komiu.