Lukas 11:36 - Kaili Ledo

³⁶ Ane pekiri rara ntaita nareme bo ledo naria nuapa-nuapa nalanda, pura-pura katuvuta mareme mpuu mpo anu nivanta mpoindo.” *

Lukas 11:36 Referans Kwoze

2 Korintus 4:6

Tempo Alatala nompajadi dunia niuliNa, “Lako ri kalandana meumbamo reme!” Ivesia muni nipakaremeNa pekirita ala pekirita majadi manoto bo rasanita kaogeNa. ToIsrael nggaulu nanggita kaoge nu Alatala nenggila ri lenje i Musa. Ivesia muni rasanita kaoge nu Alatala ane raposisanita i Kristus.

2 Petrus 3:18

Tapi komiu kana mantambai mosisani belo ante Tuputa Yesus Kristus, Topepakasalama, bo mantambai mombarasai kabelo raraNa riara nggatuvumiu. Iamo masipato ratoiyata bo rabilata, sii-sii bo sampe ri kasae-saena. Amin. Tabe lako nte yaku, Petrus

Kolose 3:16

Kareba anu notesaki i Kristus kana rapariarata bo ratanondoakata sampe mamala mosipatuduki bo mosipopatora, nangoseaka noto anu naria riara ntaita. Podadekamo dade Mazmur lako ri Buku Gasa, bo dade-dade pantoiya Alatala bo dade-dade nidekei nu Nosa Gasa. Kita kana modade ante mpuu-mpuu rarata, manguli tarima kasi ka Alatala.

Yakobus 1:25

Atura nu Alatala nagana mpuu bo naria kuasana mombakabasaka manusia lako ri dosa. Isema-sema nompariara pakabelo-belo bo batena nangoseaka Atura nu Alatala, bo ledo aga neepe bayangi bo nalinga, iamo radekeika nu Alatala belo riara bara nuapa-nuapa rapoviana.

Ibrani 5:14

Tapi kandea nakaa aga nikande ntona nambasomo, haitumo tona nipakabiasamo karona mompoposisala anu nabelo bo anu nadaa.

Efesus 4:14

Ane ivesia kita, kita domo mpo ngana anu ledo nakaja rabagiu, atau sakaya kodi nitompesaka nu balumba bo nikeni nu poiri hau tumai. Kita domo aga rataja hau tumai mangoseaka mpengaya-ngaya pepatuduki anu ledo nakana, bo domo kaliu-liu momparasaya tesa-tesa ntopebagiu anu natau gaga nodava, dava nipoviara mboto. Patujura, mompakasalandala kita.

Matius 13:52

Jadi nanguli i Yesus ka ira, “Ane guru agama Yahudi majadi topangoseaka Yaku riara Poparenta nu Alatala, nisanina pepatuduki nu Atura nu Alatala nasae bo nisanina muni pepatuduki nabaru. Ia nasimbayu eva tupu banua anu nombasuvuraka lako ri kakalumana mbara-mbara nabaru bo mbara-mbara nasae.”

Matius 5:15

Ivesia muni ante poindo. Ledo ria tona nombatunju poindo bo niloduna ntonda! Natantu poindo haitu rabolina ri kalangana, ala pura-pura tona riara banua ravanta nu remena.

Lukas 11:35

Jadi, pakabelo-belo! Nee sampe pekiri rara ntaita majadi malanda.

Lukas 11:37

Naupu i Yesus notesa, naria saito toFarisi nombagaga Ia hau mangande ri banuana, jadi hau mpuumo Ia.