Ibrani 3:5 - Kaili Ledo

⁵ Ane Nabi Musa, ia natutu nokarajaa ka Alatala nantulungi todeaNa, nasimbayu mpo potudua nombatulungi riara banua nu tuana. Pura-pura anu nipovia i Musa nogambara anu rapopaisani nu Alatala ri tempo makava.

Ibrani 3:5 Referans Kwoze

Ibrani 3:2

Ia natutu novia anu nipakatantu nu Alatala ka Ia nasimbayu mpo Nabi Musa natutu nokarajaa nantulungi todea nu Alatala, anu nirapaka banua nu Alatala.

Suro-Suro 28:23

Jadi nipakatantura eo rakasiromura ante i Paulus. Nanggavapa eo niovora, nadea tona nakava nasiromu ri banua i Paulus. Lako ri mpadondona sampe nggoviana i Paulus nombatesa Poparenta nu Alatala ka ira bo nombatentei pepatuduki i Yesus. Nibacana lako ri Buku Atura Agama nitulisi Nabi Musa bo Buku Nabi-nabi ntanina, ala rasanira tesana nakana bo raparasayara i Yesus mpuu-mpuu Magau Topepakasalama.

Ibrani 8:5

Pokarajaa nipoviara kakanana aga gambara bo vayo lako ri anu naria ri suruga. Haitu sampe tempo Nabi Musa nggaulu nasadia novia Tenda nTupu ri karava bai, Alatala nompopatora ka ia ivei: “Toramo! Pura-pura haitu kana mupovia mangoseaka jonjo nipopakitaKu ka iko ri bavo nu bulu.”

1 Timotius 1:12

Yaku notarima kasi nte Tuputa Yesus Kristus sabana nipekiriNa yaku namala raparasaya mompatolele Kareba Belo, bo nidekeiNa kuasa ka yaku ala kupakule mombatui pokarajaa haitu.

Ibrani 9:24

Sabana, i Kristus ledo nesua ri tenda petupu ri dunia anu nipovia mpale manusia, anu nogambarai Tenda nTupu mpuuna ri suruga. Tapi Ia nesua ri suruga bo hamai Ia batena mantingayo Alatala ala mantulungi kita.

Roma 3:21

Tapi sii-sii, Alatala nompopaisani berimba manusia mamala majadi manoa ri panggitaNa. Kita ledo majadi manoa ante mangoseaka atura-atura agama. Cara manusia majadi manoa niboto riara Buku Atura Agama bo riara Buku Nabi-nabi.

Yohanes 5:39

Komiu natutu neguru isi Buku Gasa sabana niulimiu riara buku haitu rakavamiu katuvua mabelo sampe ri kasae-saena. Tano isi Buku Gasa haitumo anu nompakalanto isema Yaku.

Lukas 24:44

Naupu haitu, niuliNamo ka ira, “Hitumo niuliKu ka komiu bara ipia tempo Yaku da naria nosanggani ante komiu. Pura-pura anu niboto nu nabi-nabi nggaulu nantesaki Yaku, kana rapakadupa. Haitumo, anu nitulisi ri Buku Atura Agama nitulisi Nabi Musa, Buku Nabi-nabi ntanina, bo Buku Mazmur.”

Lukas 24:27

I Yesus nombatesa ka ira pura-pura anu nitulisi ri Buku Gasa, anu nombaboto karoNa mboto, nompamula lako ri buku-buku nitulisi Nabi Musa sampe ri buku-buku nabi ntanina.

1 Korintus 4:2

Bo anu nopoko ka batua, ira kana matutu mangoseaka parenta nu madikara.

Suro-Suro 7:37

I Musa muni nanguli ka todea toIsrael, ‘Alatala mombadekei ka komiu saito Nabi nasimbayu mpo yaku, rapelisiNa lako nte komiu mboto.’

Lukas 12:42

Nesanamo i Yesus, “Haitu niuliKu ka batua nanoto bo natutu neoseaka. Tona haitu raanggataka nu madikana majadi topompasiayu pura-pura batua ntanina riara banua. Iamo mompasiayu kandea ka batua-batua ntanina eo-eo.

Matius 25:21

Nanguli madika, ‘Nabelomo! Komiu batua nabelo, natutu nantui bago anu niparasayaka komiu. Komiu namala niparasaya ante mbara-mbara sakide. Sabana haitu, mbara-mbara nadea kuparasayaka komiu. Kamaimo madamba mosanggani ante yaku.’

Matius 24:45

“Rapana naria batua anu nanoto bo natutu neoseaka, iamo raanggataka nu madikana majadi topompasiayu pura-pura batua ntanina riara nu banua. Iamo mompasiayu kandea ka batua-batua ntanina eo-eo.

Ibrani 1:1

Tempo nggaulu, nadea ngganimo Alatala nompasimbayu tesaNa ante mpengaya-ngaya cara ka nabi-nabi anu nompapola tesaNa haitu ka totuata nggaulu.

Ibrani 3:4

Pura-pura banua, naria topoviana. Tapi topovia mpengaya-ngaya Iamo Alatala.

Pompakita 15:3

Bo nipodadekaramo dade Nabi Musa, batua nu Alatala nggaulu. Bo nipodadekara muni dade mombabila Ana Bimba ivei: “O Pue Alatala, neliu mpuu KakuasaMiu! PoviaMiu naoge bo mpuu-mpuu nipokumaaka. Komiumo Magau nu pura-pura manusia ri dunia! Pura-pura pokaingguMiu nakana bo nanoa.